سالف على الفايزة في الملاح

ميزان: مسدس
الغرض: سالف

        يعتبر الطالب محمد العياري من اكبر الشعراء الشعبيين الذين اشتهروا ببراعتهم ونظمهم في قالب المسدس، إلى درجة أن بعض الرواة يؤكدون أنه نظم ما يربو عن المائة مسدس أو كثر تغزلاً في من اسمها فاطمة. وقصائد المسدس على عكس قصائد الملزومة أو القسيم تعتبر قصيرة لا يتجاوز عدد أدوارها العشرة في الغالب تكون بدايتها بالطالع المتكون من بيت ذي شطرين( نسميها عرفين وأعراف) غير متساويين ومكب بمفرده وتكون القافية موحدة في كل الأشطار وتعتمد بالضرورة في كل من الشطر الخامس والمكب الأخير من كل دور، في حين يستقل كل دور بقافية جديدة في الأعراف الأربعة الأولى. وجاءت تسمية المسدس من عدد الأعراف المكونة للدور فهي تعتبر لدى الشعراء الشعبيين بمثابة "أبيات" مثل ما يسمى الموقف أيضا بالمربع بحكم تركيبته من أربعة أعراف كقول منصور العلآقي:

بالأشراح *** من وجد الأطراح

مولآه في الڨول فصَّاح *** يجيب الغناء في طريڨه

أو كقول صالح بوراس التامزرتي

أول بدو في المربع *** ومولاه في النحو ينبع

يجسس ويوزن و يطبع *** يصيغ المعاني الرفيعة

ومن قواعد المسدس أن يعود الشاعر في كل دور لبداية العرف الأول والثالث من الطالع وفي هذا المثال تكون العودة في كل دور بـ: سالف على الفايزة في العرف الأول و ظلي مال قفز في العرف الثالث. أو كما في مسدس أحمد ملآك قوله:

بزَازيل حكـَّرتهم بالنظر*** فوڨ الصّدَرْ
مماليك لبسوا شواشي حمُر
***
بزازيل حكـَّرتهم بالالحَاظ *** أعضاهُم بِياضْ
مماليك لبسوا شواشي أعراض
حمَڨ سيدهم بين الاحكام هاض *** بالسيف ناض
ما يسيِّب إلآ طويل العْمُرِ

أما من ناحية عدد مقاطع أعراف المسدس فهي  سبعة مقاطع في الأعراف الطويلة وثلاثة مقاطع في القصيرة.

سالف على الفايزة

سالف على الفايزة في الملاح *** ع الصّدر طاح

ظليم ال ڤفز كيف كر الجناح

***

سالف على الفايزة في الڤبيل *** ما له مثيل

ظليم ال ڤفز كيف لزُّه خيل

والاّ شواشين في عڤب ليل *** غُرما كساح

بيناتهم صار ضرب السّلآح

***

سالف على الفايزة في البنات *** ع الصدر فات

ظليم ع الدحي حضّن وبات

والآ سحابات متلآڤيات *** في أرض الشياح

بيناتهم شيّر البرڨ لاح

***

سالف على الفايزة في الجوار *** طايح اغمار

ظليم ع الدحى في أرض الڤفار

والآ سحابات ال طلع في النهار *** تڤوَّى اكساح

واللي شبح يحسب الليل طاح

***

سالف على الفايزة في الصبايا *** طايح رمايا

ظليم ال ڤفز شاف صيَّاد جايه

هكـَّاك في اللفظ حكـّرت نايا *** بالمسك فاح

مع عنبر الطـِّيب زادَه وشاح

***

سالف على الفايزة في الولآيف *** ع الصدر حايف

ظلي مال ڤفز فز م الزُّول خايف

على فاطمة أم الحزام السفايف *** كحيل الشباح

هوى حبها زاد ڤلبي اجراح

***

سالف على الفايزة في الغوالي *** طايح حمالي

ظلي مال ڤفز م الزول جالي

من اولاد عيَّار نرتب مقالي *** الفاظي صحاح

أنا كيد للي طلب المزاح

الليل وطَّى رواقه وظلـّم الطالب محمد العياري

ميزان مسدّس

------

من الأغراض المعتمدة عند الادباء والغنَّايا،  الليل سواء كان الليل  في بدايته ووقت ما يزهى المحفل ما بين الغنَّايا والحفَّالات، والا في نهاياته وقت ما يبدى الأديب  يودع في الساهرين والا يرمي في إشارات معينه للمخلولة على خاطر الليل هو موعد العشاق يتواعدوا فيه.

الطالب محمد العياري اشتهر ما بين الادباء متاع وقته بأنه كان من أغزرهم في نظم الفصائد اللي في ميزان المسدس واللي تتدفع بطريقة غناء محددة يمون الغنَّاي وحده في وسط السالحة والا وسط الدار متاع المحفل ويغني حسب السلطنة متاعه والطبع اللي اختاره في هيبو ووقار استماع واستمتاع السامعين والحفَّلات اللي ما يتدخلوا بالزغاريت  كان في قفلة غصن القصيدة والا وقت ما يتكلم السلاح متاع المقرين والابَّاردية كتعبير على استحسان الكلام والصور الشعرية وحسن الآداء متاع الأديب. الدفع متاع المسدس بأجزاء الغصن الستة فيه رونق ونوع من الاعتداد عند الأديب الشيء اللي يفرض صمت السامعين ويخلـِّهم يركزوا على معاني القصيد.

من مسدسات الطالب محمد العياري في الليل،"الليل وطَّى رواڤه وظلـّم " اللي ساعات يتدفع على نمط الملزومة عند غنَّاية الدويرات أمَّا بطريقة خاصَّة يكون الغنَّاية قاعدين في شكل دائرة حول الطبل وهالطريقة تتسمَّى "الدرز" وما تصير كان نهار الثلاثة اللي يتم فيها اختتام الالعرس واللي يصادف اليوم التاسع متاع "البدو" واللي يكون دائما بنهار الاثنين. وفي  نهار الثلاثة لمة الغناية تكون دائما جلوسا وما يتغنى فيها كان النوع اللي يتسمَّى المحجوز او المجزوز كيما ينطقوها البعض.

الليل وطَّى رواڤه وظلـّم *** رڤد كل مجرم

يا من بغى زول مشكاه يعزم

***

الليل وطَّى رواڤه وغلّس ***  رڤد كل معسس

يا من بغى شور مشكاه يدعس

أمَّا الذي هو رڤَّاد يتعس *** م الفرج  ييأس

ويحسب حسابه من الهوش الأبكم

***

الليل وطَّى رواڤه تلايم ***  رڤد كل نايم

يا من بغى شور سمح التمايم

يحمل على المشنقة والجرايم *** وكبر التهايم

وما راجل إلآ ل يخلـّط ويڤسم 

***

الليل وطَّى رواڤه تمسَّه ***  ورڤدت العسّه

يا من بغى شور خاضب الخُمْسَه

بين العضى والحوالي تدِسَّه ***ينضَال وكسَه

نجَّى عظلمَه من النَّار تُحْرُمْ

***

الليل وطَّى رواڤه تمَاسَه ***  رڤدوا العسَاسَه

يا من بغى زين كاحل انعاسَه

يعملْ على الليل ويبيع راسَه *** يجوز بالسياسَه

عاتي مع رقَّة البيت يُخْطـُمْ.

مسدس للطالب محمد العياري: حواجب كما نون

 

حواجب كِمَا نون خط البريَّة
وشَفَّة نقية
والعين من الكحل ترفع وقية

***

حواجب كما نون خط المثل
وشفة عسل
والعين م الكحل تسبي العقل
حسِّيت سامور منهم شعل
وقلبي انذبل
مريض لا نبات ليلة هنية

***

حواجب كما نون خط الكهين
وشفّة تزين
والعين بالكحل تشوي الكنين
عملوا على ميتي ناصبين
متعمّدين
وما دريت عن غمرتي كيف هيَّ

***

 حواجب كما نون خط النزيل

وشفة تهيل
والعين بالكحل تقتل قتيل
خذو العقل والروح هيا خليل
حار الدليل
ما نرقد الليل واش القضية

***

حواجب كما نون في خط الوزير
وشفة حرير
والعين م الكـُحل تنحر نحير
جا نفدهم في الحشا والضمير
داهم كبير
شوى كبدتي فوق سامور غيّه
***

حاجب كما نون خط الثبات

وشفة طرات

و العين مالكحل ماضا حلات

فازت ما بين جمع البنات

نجمة ضوات

تاهت على الغيب طفلة صبية

***

حاجب كما نون خط العرب

وشفة عذب

والعين م الكحل سوده عجب

حسيت سامور منهم لهب

لا صبت طب

لا دريت على حالتي واش بيا

***

حاجب كما نون خط الهلالي

و شفة زلالي

والعين م الكحل يا غبن حالي

تمنيت نحوزهم في حلالي

آه يا رجالي

ميتين مليون نعطي الهدية.

***

ميتين مليون نعطي بشارة

و موشي خسارة

و نحوز عيون طير الحبارة

وإحنا على سرير برّ النصارى

يمينه يساره

لثنين عشاق عل فرد نية

***

لثنين عشاق ها من صغاني

و القلب هاني

نحمد المولى على ما عطاني

من أولاد عيار شاعر زماني

وثابت أوزاني

على كل غناي نأخذ خطية

يا عين لا تعشقي

مسدس

يا عين لا تعشقي عشق تالف

وبالك تخالف

الفائدة في الحبيب الموالف

***

يا عين لا تعشقي عشق عادي

وافهم قصَادي

الفائدة في الحبيب المقادي

يا عين لا ياخذك قول رادي

ليس يفادي

ولا يعجبك زين خجلة وسالف

***

يا عين لا تعشقي عِشق عاجل

بشبح النواجل

الفـائدة في الحبيب المباجل

أمَّا الذي يشغلك ما يواجل

يزلق الرَّاجل

آش لزِّك على القضا والتكالف

الطـَّالب محمد العياري