دروشة: الحمَّاص روح وسكر كل باب

سر الحديث يا سامع ليه اسباب

وحلو الكلام معروف لأماليه

ثم اللي ملافظـُه أحلى من كبَّاب

وثمة اللي الشوك في لغاويه

أصل السبب جبناه بالتجراب

على اللي السّم يقطر من سنِّيه

عطاه الرب والعرش حل الباب

نكر الخير على اللي فرحو بيه

يهدد ويتوعد كاينـُّه فدار قحاب

نصب المشانق جاء يهدد بيه

زاد المقاصل  زعمة قرى الكتاب

وتاريخ الفرنج حافظـُّه راوِيه

صارلنا من جديد من جملة الكلاب

ينبح لاجل سيَادُه المقطرن والسفيه

كشاكشـُه رغاوي  لين شاحلـُه اللعاب

يهدد في اليطاول واللي ضحك عليه

***

فاتتكم يا سادة ليلة الدخول

لا عندكم علينا لا حكم لا جواب

حكم الباطل راح لا بقالـَه قول

والحمَّاص روَّح وسكـّر كل باب.

عامين ليَّام عدَّان

عامين للماء بطبخان

وما صبنا كان الرغاوي
ساس الكلام ليه كهَّان

يقدُّو فك اللغاوي
ثمَّاش في القوم فطـَّان

يبري العلـّة يداوي
عيينا من الكذب سمعان  

ما بين عاقر وحاوي

***

عامين ليَّام عدَّان

تلبليب بلاشي نفيعة

الوطن ملكوه خصيان

بلا عقد تمُّو البيعة

خانوه وما فيهم آمان

لآحمد صارو صنيعة

بالدين خثلة وبهتان

وقالو هاذي الشريعة

وضحكو على شعب مطمان

ورموه في همهمية

من بعد ما خداو لامان

غدروه بالشاكرية

ثورة البُكْ

ثورة البُك

كيف اللي في صبعُو خاتم

وهو عريان الزُّك

ثورة البُك

كي اللي دخل سوق الدواب

وما يعرفش يصٌك

***

ثورة الڤيز

نحبو نطيرو

وبكلنا معيز

الهيئة بغولة

وما زعام كان تدلويح الكراريز

***

ثورة التيفاف

وآش يشبّع السعي  وما زالت ما شبعت البعاير أم لاحفاف

نتدارسو ونتدافعو ونتڤاتلو

ولافادت فيها لا مرافق ولا لاكتاف

والمندرة تلحفو عليها اصحاب صنعة الإلتفاف

***

ثورة التَّالمة

شخَّت ولمت مخاريڤها وما روحت سالمة

لا سكتت ولا تكلمت

ولا بالعين شيرت

صبحنا عليها راڤدين

لاهي  باحوالنا متحيرة ولاهي عالمة

***

ثورة الكوازي

وازيت وازيت

وفي الوز ما لڤيت ما نوازي

بين الحارزة والطهَّار وجمع الخرد ڤعدت نزازي

لا فادني ما قريت ولا العرَّاف ولا التڤَّازي

***

ثورة البودرنة

لا يتكل ولا يتلعب بيه ولافيه بنَّة

ڤعدنا في زبل البڤر نكركرو في الشنة

ما بين منّه ومنّه

والخلايق مرجّدة في غداها تستنى

لين يجيها  الزيت قالو يا -حسرة ڤَبل- من غريان

أمَّا صار اليوم من الدوحة والا من أم درمان

***

ثورة الهتَّاكة

ما طڤّها كانش اللي منفّخين حناكة

وڤعدو زواوة في الشقاء وآدراكة

ضحكو عليهم كل من هب

ورجع يدب

يكُرّ عليهم في شنتَه وشلايكَه

***

من جهلي وقلة تدبيري: عبدالرحمان الكافي

ملزومة للشاعر عبدالرحمان الكافي في بداية العشرينات وقت اللي لا ثمة لا مجلة الاحوال الشخصية يتعرض فيها بطريقتو المعهودة لتعدد الزوجات يقول فيها:
-------------------------------
من جهلي وقلة تدبيري
تزوجت بجوز نساوين
ما نظرتش لحالة غيري
من وحده يعاني في البين
***
من جهلي يا كبر شقايا
تزوجت بثنتين صبايا
قلت نعدِّي كيف نهاية
ورياضة بين البنتين
ليلة غادي وليلة هنايا
نتشخلع بين فراشين
***
نتخلـَّع بين فروشات
كل ليلة حذا وحدة نبات
حلـُّمة سود الرمقات
وفريدة ذبَّال العين
نعدِّي ليالي ونهارات
متمتَّع بين الاثنين
***
نريض معاهم نتهنَّى
وحدة منَّا والاخرى منَّا
وآنا مثيل عصيفر جنَّه
مدلل بين بساتين
ساعة نقطف من الحنَّه
وساعة ورد وياسمين
***
ساعة نقطف من النوار
فل ونسري وجلنار
وساعة ناكل مالآثمار
عوينة كحلة وخوخ وتين
لاهي مع زينات ملاح
فارح وايامي زاهيين
***
....
هافكرة من كثر هبالي
محنة ما كانت في بالي
خان عقلي بي اسآلي
ورماني بين لفعتين
حلومة رقعة فيلالي
فرهودة ذكاء وتزعبين
***
فرهودة خفيفة ودكاكة
وحلومة قباحة وركاكة
وحدة فردة والاخرى شلاكة
سلعة حرفةمبارين
خلوني نحك بحكاكة
زادو على همِّي همين
***
زادو على همي هموم
لانرقد لا يجيني نوم
آنا هو عمر الشوم
لا نعرف راحة درجين
فرهودة تشخر وتزوم
وحلومة سبَّابة دين
***
حتَّى لين يقول في الاخر:

اللي يعمل في الدار غوالي *
يجرالو كيف اللي جرالي
غذا يربح يربح من تالي
ما يلقاشي صدر حنين
ترصيلو في الهم يكالي
واش يلزّك للاثنين
***
هذاك اللي عنده ثنتين
تتعدَّى حياتو في البين
النسوة ما فيهمش حنين
لو تبدا عمرها تسعين
النار تشعلها في الحين
وتلزك عالفعل الشين
***
العاقل عازب أحسن ليه
ما كانش وحده تكفيه
الكافي نظم معانيه
ناصحكم يا مخبوطين
راهو الوقت على ما فيه
قالو الناس الغارفين
-----------------------------------
* الغوالي : النسوان
ملحوظة: عبدالرحمان الكافي كيف البعض من الشعراء عنهم شوية ميزوجينية، والقصيد هو من نوع الدروشة يحب يقول يعالج مسألة مهمة بطريقة فكهة ما تغيبش عليها بعض الأحكام "المهينة" للمرا من وجهة نظرنا اليوم.

دِزْ معاك حويجة

اللي برجو بالدزَّان*** يعدِّي حياتو في الدَّز

لا يهنا ولا هو مطمان*** بعمرو ما يعرفش العز

دِزْ تخطف، دِزْ النَّح

دز البيدق دز الفازة

دِزْ معاية صوتي بح

عمري تعدَّى مع الدزَّازَة

***

كاللي يخدم عند الحاكم *** يبدا في الدز على بكري

ما تنسوني هاني معاكم *** تعلمت الدزة من صغري

دوسيات وخدم تتراكم *** دزْ حويجة تسلك بكري

كون فطين وعايق فاهم *** أمورك تمشيلك تجري

إفهم في فعل الدَّز

ولا تقعد مغبون تزازي

ولا تخللي روحك للزَّز

من خلطك في الكوازي

***

دِزْ تخطف، دِزْ النَّح

دز البيدق دز الفازة

دِزْ معاية صوتي بح

عمري تعدَّى مع الدزَّازَة

***

كان حصُلت في معبوكة *** نُوازل ومحاكم قدَّامك

لا يفيدك طار ودربوكة *** كانش ما تبشطر من مالك

لا وكيل يغيثك بحْرُوكَه *** تقول ربحت مشا في بالك

نازلتك تطلع مشروكة *** كي نسيت الدزة لخوالك.

فعل الدَّز فعل أَمْر،

لاهو مضارع لا ماضي

دِزْ وكُح وذوق المُرْ

دِزْ آش يهمك في القاضي

***

دِزْ تخطف، دِزْ النَّح

دز البيدق دز الفازة

دِزْ معاية صوتي بح

عمري تعدَّى مع الدزَّازَة

***

لا لا نا قُلت نتوب

شعر و غناء الباجي الصَّالحي: تالة

لا لا نا قـُلت نتوب

بركة يزي ماللي فات

باقي واثقني المكتوب

ما صبتش فرقة لبنات

***

زعمة قـُلت نتوب نصللي

يزِّي من الغُناء خير اللِّي

تعرضني بو كف محني

مشوك وفقلبي الخلجات

هو شَوَّرْ بيده زطـَّلني

ذِهبوا من بالي الرَّكعات

***

لا لا نا قـُلت نتوب

بركة يزي ماللي فات

باقي واثقني المكتوب

ما طـُقْـتـش فُرقة لبنات

***

ذهبوا من بالي و نسيت

نا نحسب روحي صلـِّيت

على الركعة لولى فَزِّيت

تراه ما زالي ثلاث أوقات

حِدِّي دبَّت نايا غميت

عقلي هزُّوه الخالات

***

لا لا نا قـُلت نتوب

بركة يزي ماللي فات

باقي واثقني المكتوب

ما صبتش فرقة لبنات

***

عقلي هزُّه الحفـَّاله

وآدَّاته يمِينة قـُبَالة

قوللِّي هأخَّيّْك في حالة

كثير ال،َّاس هَمْ قالوا مات

بعثوا فارس شوره تالة

جابوا كفني مع اللـَّحْدَات

***

لا لا نا قـُلت نتوب

بركة يزي ماللي فات

باقي واثقني المكتوب

ما صبتش فرقة لبنات

***

جابوا كفني وآنا مريض

من خدُّوجة ركبني الغيض

دَرْبَاني بوحزام عريض

اللي ملوي ستَّة ليَّات

إسم النقع عندي عزيز

منـُّه لا نرقد لا نبات

***

لا لا نا قـُلت نتوب

بركة يزي ماللي فات

باقي واثقني المكتوب

ما صبتش فرقة لبنات

***