عشـّا الطاير والذيب يراجي: الفيتوري تليش

عشا الطـَّاير والذيب يراجي

سفرة وغناجي

مواتيها ولد الدغباجي

***

عشا الطـَّاير والذيب تعاوى

من الدم تراوى

حَب المستيكة يزَّاوَى

***

البارود تغاوى *** دارولَه طرنشي وحفراوة

واهل الجِّملاوي *** داهم عل هوكة يتقاوى

الدغباجي تخاوى *** فاوي من فمة يتفاوى

واقف قمراوه *** واللي ضّربَه ما يتداوى

لا ثم غدارَه *** منهم لا سايق وسقاوه

قطـّف غصناوي *** قتَل خمسة ركوب الهملاجي

شروه في هدَّاوي *** وسوق خاسر وترسلها جواجي

***

عشا الطـَّاير والذيب يراجي

سفرة وغناجي

مواتيها ولد الدغباجي

ثورة واشي؟ . نورالدين الورغي

ثورة واشي؟
ثورة " هوشي منه "
وإلّا واشي ؟
ثورة لينين وإلّا حواشي؟
ثورة برانيس وإلّا شواشي؟
ثورة قاعد، وإلّا ماشي؟
ثورة مجرم وإلّا فاشي؟
ثورة عريان وإلّا لابس؟
ثورة ضبع عالعصا كابس؟
ثورة الخبز اليابس؟
ثورة الماء في العيون حابس؟
ثورة صكّر الفم واقعد ثـمّة
ثورة خدّام المرمّة؟
ثورة فنان الغلبة والحمّى؟
ثورة اللّات والعزّى وهُـبلِ
ثورة بوسة يهوذا على خدّ الجبل؟
ثورة الغنّاي والشاعر؟
ثورة صهيد الصوّان الواعر؟
ثورة صوت الثكالى النّاعر؟
ثورة الـقـحـبة
دمدومة، نوارها نور أحسن صحبة ؟
ثورة عريان
محروق، مسلوب
مالبلاء والنّهبة؟
ثورة ربّي
وإلّا نـقـطـة فوق حرف الرّاء
تـشـعـّل حـــــربي؟

بنت طراد: مبروك للظلام سوادو

بنت طراد: مبروك للظلام سوادو: مبروك للظلام سوادو مبروك للعبيد اسيادو مبروك للجهل بليلة عيدو مبروك للدّموع يفيضوا و يزيدوا مازال القلب حيّ رغم القهرة و الخسارة مبروك ...

Années rondes ou carrées...

Par: Zouzi-Chebbi Mohamed Hassen

Années rondes ou carrées quelle importance

Amarrés aux profondes racines des baobabs

Rappelez les lointaines années de l'enfance

Que les arabes en arabe nomment "chabab"

S'estompent englouties par d'épaisses brumes

Echos ténus suspendus au bord de la mémoire

Bleus de l'aube laiteuse les ors pâles du soir

L'âcre fumée de bois odorant qui les parfume

Signes précurseurs annonceurs de la mélancolie

Compagne habituelle de l'hiver sombre et acéré

Aux rives féeriques de la plus charmante folie

De l'esprit éveillé fusent des sources vives libérées

Et puisqu'il faut ouvrir aux bagatelles rituelles

Je t'offre ce soir à minuit toute l' année nouvelle

Pour prendre pied ferme en ton rêve souterrain

Où règne en paix l'unique loi de l'Amour souverain

من جهلي وقلة تدبيري: عبدالرحمان الكافي

ملزومة للشاعر عبدالرحمان الكافي في بداية العشرينات وقت اللي لا ثمة لا مجلة الاحوال الشخصية يتعرض فيها بطريقتو المعهودة لتعدد الزوجات يقول فيها:
-------------------------------
من جهلي وقلة تدبيري
تزوجت بجوز نساوين
ما نظرتش لحالة غيري
من وحده يعاني في البين
***
من جهلي يا كبر شقايا
تزوجت بثنتين صبايا
قلت نعدِّي كيف نهاية
ورياضة بين البنتين
ليلة غادي وليلة هنايا
نتشخلع بين فراشين
***
نتخلـَّع بين فروشات
كل ليلة حذا وحدة نبات
حلـُّمة سود الرمقات
وفريدة ذبَّال العين
نعدِّي ليالي ونهارات
متمتَّع بين الاثنين
***
نريض معاهم نتهنَّى
وحدة منَّا والاخرى منَّا
وآنا مثيل عصيفر جنَّه
مدلل بين بساتين
ساعة نقطف من الحنَّه
وساعة ورد وياسمين
***
ساعة نقطف من النوار
فل ونسري وجلنار
وساعة ناكل مالآثمار
عوينة كحلة وخوخ وتين
لاهي مع زينات ملاح
فارح وايامي زاهيين
***
....
هافكرة من كثر هبالي
محنة ما كانت في بالي
خان عقلي بي اسآلي
ورماني بين لفعتين
حلومة رقعة فيلالي
فرهودة ذكاء وتزعبين
***
فرهودة خفيفة ودكاكة
وحلومة قباحة وركاكة
وحدة فردة والاخرى شلاكة
سلعة حرفةمبارين
خلوني نحك بحكاكة
زادو على همِّي همين
***
زادو على همي هموم
لانرقد لا يجيني نوم
آنا هو عمر الشوم
لا نعرف راحة درجين
فرهودة تشخر وتزوم
وحلومة سبَّابة دين
***
حتَّى لين يقول في الاخر:

اللي يعمل في الدار غوالي *
يجرالو كيف اللي جرالي
غذا يربح يربح من تالي
ما يلقاشي صدر حنين
ترصيلو في الهم يكالي
واش يلزّك للاثنين
***
هذاك اللي عنده ثنتين
تتعدَّى حياتو في البين
النسوة ما فيهمش حنين
لو تبدا عمرها تسعين
النار تشعلها في الحين
وتلزك عالفعل الشين
***
العاقل عازب أحسن ليه
ما كانش وحده تكفيه
الكافي نظم معانيه
ناصحكم يا مخبوطين
راهو الوقت على ما فيه
قالو الناس الغارفين
-----------------------------------
* الغوالي : النسوان
ملحوظة: عبدالرحمان الكافي كيف البعض من الشعراء عنهم شوية ميزوجينية، والقصيد هو من نوع الدروشة يحب يقول يعالج مسألة مهمة بطريقة فكهة ما تغيبش عليها بعض الأحكام "المهينة" للمرا من وجهة نظرنا اليوم.

ْالصَّحَافَة والصَّحْفَجِيَّة شَادِينَّا بالشـْكِيمَة والعقَال

أغلبهم كان موش الكل من فصيلة الله ينصر من صبح، ديمة مع الوقف حتى إذا كان بغل. طول حياتهم عدَّاوها يمجدو في الحاكم من العهد البورقيبي الغابر وربما فيهم اللي ما زالو يثبتو على "فرانسا أمنا الحنينة" وسيدنا صاحب العرش الحسيني.
طول حياتهم يكتبو عكنسي... وهوما في الواقع كيف هاك الصَّيادة في البحر اللي يخبطو في الماء بالمقادف باش الحوت يجفل و يدخل طول في بيت الغزل. مناشر، رابحين مع الرابحين ورابحين مع الخاسرين، ما يركبو كان الموجة الرابحة، ساعات يظهرلك اللي كيف يحربوها بالفضايح اللي هوما يصليو على طرفهم، في وقت اللي هوما يخدمو في الناس اللي يستفيدو من الفضايح على خاطر تكبرلهم أساميهم. ساعات يظهرلنا وقت اللي يعملو فيها بطولات وعنترية على بعض الكرز تجد علينا الحكاية... حتى كان ما جدتش على البعض منا اللي حاسبين رواحنا فاهمينلها، المؤكد أنه تجد على العوام اللي يقراو صحف بودورو ما بين محطة ومحطة في الميترو والا في التران والا على كنتوار قهوة وغينيهم مدهشرة بالنوم وبالتعب، والا في وقت الفطور في حانوت أكلة خفيفة والا ريسطوران بالبونوات... هالناس قادرين يهبطو خبر يقولو فيه اللي أمك تخدم في غسلان الفلوس المسخة مع شبكة فلان وعلان يمكن ياسر تصدق الخبر وقت اللي تعرف اللي أمك ربما تكون في حاجة باش تغمل فركة صابون في بعض الديار باش تخلص ورقة الضو والا الكراء...
ثمة منهم ناس يخدمو بالنيابة لحساب ناس أخرين اللي ما عندهمش الوقت باش يكسرو فلان والا يوسخو فلتان، والا يدوروها بنفسو غليك انت الزوالي اللي ما تنجمش تطاول على فلان يظهرولك اللي هوما ينجمو يعملوه في بقعتك على خاطر لقمة العيش ما تخليلكش الوقت والا القوة والا تخاف باش تحطها في خطر كي تحل فمك... يلعبوها عليك وتقول بينك وبين روحك: "يرحم الجوف اللي تخبطو فيها كيف عملوها في بلاصتي" منها تتنفس ومنها ينحيو فتيل الغضب اللي سكن في جوجيك، كيف اللي انت ناقص...الناس اللي اللي كيفك وربما كيفي والا أقل مني ومنك اللي أحلامهم تقصفت وطموحاتهم تخضات، يجعلهاش تنجم تسرق سويعات نوم باش تنجم تواجه غدوة تخمم في الحليب المقطوع ودبابز القاز اللي مارشي نوار وفاتورا الكراء والماء والضوء والسخط المسخط منين باش يخلقوه الحلم؟؟؟؟ قبل ما يحطو ريوسهم للمخدة، يضربو هاك الحربوشة المنومة من صحيفة بودورو اللي حبروها أصحاب الكشط بأنواعها تهبط على قلوبهم وامخاخهم كي البنج المعسل، زيد يعمل دورة على أخبار الدعارة والسب والشتم وريق الكوارجية والبعض من العنتريات بوبلاش مكفنين بكوش ديمقراطية وحقوق انسان على تأسيسي على حرية تغبير في بلاد هي السباقة في ناريخ الثورات العربية... وهكاكة تكمل زريقة البنج اللي تمحي هموم ابنادم و تهديلو توتير أعصابه ادرجة أنه ينسى واجباتو البيولوجية مع حرمه المصون وقاله: انت تخزرلي وآنا ما ناكلك يا طجين الحوت... وغدة يفرجها اللي ما ينام الليل.
كي تجي تشوف في نهاية الآمر اللي النص والا الثلثين متاع الناس كانو ماذابيهم أن الأمور تتبدل باش يكسرو القلق والروتين اللي استقر أكثر من اللازم، المجانين اللي قامو في هبلة ليالي البيض غام ناول هالزمان في نهاية ألمر حفنة ما تفوتش المليون كان طارت كي نجمعوهم مدينة مدينة قرية قرية زنقة زنقة...أغلبية الناس كانو يستناو تتبدل الوجوه فيقورات جديدة هاي جات... الباقي، الصحايف الصفراء توة تتكفل بيه، توة نعيط، تخمم، تتغشش كان لزم في بلاصتهم، و في الواقع هي تضحك عليهم وعلينا حتى منا لوقت ما تجي الانتخابات الجاية بعد عام والا عشرة والا ممكن ياسر ما تجيش، الصحافة والصحفاجية مكتوبة على الورق والا افتراضية مسموعة والا مرئية قالنلنا إيدكم لريوسكم ما تهزوهاش، ابقاو في نومكم وغالمكم الافتراضي وزيدو ارقدو واشخرو في الظلمة. هوما يفصلولنا واحنا نلبسو اللي عجبو عجبو واللي ما عجبوش يطير قرنو.
.

الشاعر يكتب ويكذب وساعات ما ينجم ينسى

ما غاضني كان أبيات شعر كذبت عليها وكذبت علي
ما غاضني كان ترشيقات رجعتلي من الصغر شوية
ما غاضني كان ضحكات في عقابات الليالي هربت بي
ما غاضني كان اللي دماياتهم تفيات
والحزن سكن قلوب أهلهم وكل والي
أمَّا الباقي يا ما ضحكت علينا الآيام
وما لُمناها
وياما سكرو بينا أولاد الحرام
وعديناها
والشعراء أول ما يكذبو يكذبو على ارواحهم
كان كذبنا عليكم في ليلة من ليالي السود
عام أحداش
سامحونا
شرابنا هاك الليالي كان مغشوش
وكيفنا كان أقرب للفصَّة
منو لغرس كتامة وواد حندوش
إحسبوها منامة تفسيرها جاء غالط
ياما غلطنا قبل......