ْالصَّحَافَة والصَّحْفَجِيَّة شَادِينَّا بالشـْكِيمَة والعقَال

أغلبهم كان موش الكل من فصيلة الله ينصر من صبح، ديمة مع الوقف حتى إذا كان بغل. طول حياتهم عدَّاوها يمجدو في الحاكم من العهد البورقيبي الغابر وربما فيهم اللي ما زالو يثبتو على "فرانسا أمنا الحنينة" وسيدنا صاحب العرش الحسيني.
طول حياتهم يكتبو عكنسي... وهوما في الواقع كيف هاك الصَّيادة في البحر اللي يخبطو في الماء بالمقادف باش الحوت يجفل و يدخل طول في بيت الغزل. مناشر، رابحين مع الرابحين ورابحين مع الخاسرين، ما يركبو كان الموجة الرابحة، ساعات يظهرلك اللي كيف يحربوها بالفضايح اللي هوما يصليو على طرفهم، في وقت اللي هوما يخدمو في الناس اللي يستفيدو من الفضايح على خاطر تكبرلهم أساميهم. ساعات يظهرلنا وقت اللي يعملو فيها بطولات وعنترية على بعض الكرز تجد علينا الحكاية... حتى كان ما جدتش على البعض منا اللي حاسبين رواحنا فاهمينلها، المؤكد أنه تجد على العوام اللي يقراو صحف بودورو ما بين محطة ومحطة في الميترو والا في التران والا على كنتوار قهوة وغينيهم مدهشرة بالنوم وبالتعب، والا في وقت الفطور في حانوت أكلة خفيفة والا ريسطوران بالبونوات... هالناس قادرين يهبطو خبر يقولو فيه اللي أمك تخدم في غسلان الفلوس المسخة مع شبكة فلان وعلان يمكن ياسر تصدق الخبر وقت اللي تعرف اللي أمك ربما تكون في حاجة باش تغمل فركة صابون في بعض الديار باش تخلص ورقة الضو والا الكراء...
ثمة منهم ناس يخدمو بالنيابة لحساب ناس أخرين اللي ما عندهمش الوقت باش يكسرو فلان والا يوسخو فلتان، والا يدوروها بنفسو غليك انت الزوالي اللي ما تنجمش تطاول على فلان يظهرولك اللي هوما ينجمو يعملوه في بقعتك على خاطر لقمة العيش ما تخليلكش الوقت والا القوة والا تخاف باش تحطها في خطر كي تحل فمك... يلعبوها عليك وتقول بينك وبين روحك: "يرحم الجوف اللي تخبطو فيها كيف عملوها في بلاصتي" منها تتنفس ومنها ينحيو فتيل الغضب اللي سكن في جوجيك، كيف اللي انت ناقص...الناس اللي اللي كيفك وربما كيفي والا أقل مني ومنك اللي أحلامهم تقصفت وطموحاتهم تخضات، يجعلهاش تنجم تسرق سويعات نوم باش تنجم تواجه غدوة تخمم في الحليب المقطوع ودبابز القاز اللي مارشي نوار وفاتورا الكراء والماء والضوء والسخط المسخط منين باش يخلقوه الحلم؟؟؟؟ قبل ما يحطو ريوسهم للمخدة، يضربو هاك الحربوشة المنومة من صحيفة بودورو اللي حبروها أصحاب الكشط بأنواعها تهبط على قلوبهم وامخاخهم كي البنج المعسل، زيد يعمل دورة على أخبار الدعارة والسب والشتم وريق الكوارجية والبعض من العنتريات بوبلاش مكفنين بكوش ديمقراطية وحقوق انسان على تأسيسي على حرية تغبير في بلاد هي السباقة في ناريخ الثورات العربية... وهكاكة تكمل زريقة البنج اللي تمحي هموم ابنادم و تهديلو توتير أعصابه ادرجة أنه ينسى واجباتو البيولوجية مع حرمه المصون وقاله: انت تخزرلي وآنا ما ناكلك يا طجين الحوت... وغدة يفرجها اللي ما ينام الليل.
كي تجي تشوف في نهاية الآمر اللي النص والا الثلثين متاع الناس كانو ماذابيهم أن الأمور تتبدل باش يكسرو القلق والروتين اللي استقر أكثر من اللازم، المجانين اللي قامو في هبلة ليالي البيض غام ناول هالزمان في نهاية ألمر حفنة ما تفوتش المليون كان طارت كي نجمعوهم مدينة مدينة قرية قرية زنقة زنقة...أغلبية الناس كانو يستناو تتبدل الوجوه فيقورات جديدة هاي جات... الباقي، الصحايف الصفراء توة تتكفل بيه، توة نعيط، تخمم، تتغشش كان لزم في بلاصتهم، و في الواقع هي تضحك عليهم وعلينا حتى منا لوقت ما تجي الانتخابات الجاية بعد عام والا عشرة والا ممكن ياسر ما تجيش، الصحافة والصحفاجية مكتوبة على الورق والا افتراضية مسموعة والا مرئية قالنلنا إيدكم لريوسكم ما تهزوهاش، ابقاو في نومكم وغالمكم الافتراضي وزيدو ارقدو واشخرو في الظلمة. هوما يفصلولنا واحنا نلبسو اللي عجبو عجبو واللي ما عجبوش يطير قرنو.
.

مسدسة في رثاء افتراضي للفايسبوك

إذا تسكر الفايسبوك يا رجَّالة

غير فكرو في الحالة

إبكو على التدوين والمقالة

***

إذا تسكر الفايسبوك يا صاغين

ما عاد بيها وين

لا من يجيب اخبار عالتدوين

باب البحر مسكين

وفات اشغالة

والتن بلوڨ الباج غلڤوهالة.

***

إذا تسكر الفايسبوك يا حرَايِرْ

الوقت يصبح جاير

لا ثم من ينشد عليكم زاير

لا J’aime يبري الحاير

الورد في الزبَّالة

والعشق تفلس مشى راسماله

***

إذا تسكر الفايسبوك يا شبيبة

هالدهر بيِّنْ عيبه

لاLoool لا غمزان لا تسرسيبة

لا Waaw ترد حبيبة

الكل وعلى والة

يا جامع تصلِّي يا بار تعمل حالة.

***

إذا تسكر الفايسبوك يا مُبيد

آش ما زالك ما تكيد

على اشكون ترمي صميتك يا بليد

ما عادلك ما يفيد

جو صحاح ضربوهالك

لانك دخلت غريڨ شر مهالك

***

إذا تحصدو الفايسبوك يا حجَّابة

أش تربحو من الصَّابة

غير فسرو واحكولنا برتابة

الحڨ لاش تغلڤولَه بَابَه

راهو الظلام الحالك

مهما الزمن يطوال ديمة هالك

المخبر: أحمد مطر

عندي كلام رائع لا أستطيع قوله،

أخاف أن يزداد طيني بلة،

لأن أبجديتي،

في رأي حامي عزتي،

لا تحتوي غير حروف العلة ؛

فحيث سرت مخبر يلقي علي ظله،

يلصق بي كالنملة ،

يبحث في حقيبتي ،

يسبح في محبرتي،

يطلع لي في الحلم كل ليلة ،

حتى إذا قبلت يوما طفلتي ،

أشعر أن الدولة

قد وضعت لي مخبرا في القبلة ،

يقيس حجم قبلتي،

يطبع بصمة لها عن شفتي،

يرصد وعي الغفلة ،

حتى إذا ماقلت يوما جملة،

يعلن عن إدانتي، ويطرح الأدلة ،

لا تسخرو مني ، فحتى القبلة

تُعدُّ في أوطاننا حادثة تمس أمن الدَّولة.ء

اللي عطى حاجة للبلاد و خذا متاعه، يفك علينا من المزايدة بالوطنية، واللي عطا و ما خذاش ما يعملش من الوطنية أصل تجاري

ثلاث حروف ياما تبيلكت ناس في جرتها ، و ياما فنات اعمار على خاطرها، و ياما تعادات عباد على المحاكم من سبايبها و ياما و ياما و ياما، وياما ناس تزايد على ناس للوفاء ليها...ه
هاك العام، -والحديث يجبد بعضه- في العدوان الصهيوني غلى حمَّام الشط،،"تخلط " الدم التونسي بالدم الفلسطيني، وبعد ما تواراو الضحايا في التراب، مادامتش مديدة لين تحيرت مطالب التعويضات، يقول القايل باهي أنه أهل الضحايا يطالبو بتعويضات، تبقى من عند أشكون؟ من عند المجرم و المعتدي والا من عند الضحايا لخرين؟ يا سيدي أمالة المسألة ولات سوق و دلاَّل لمطالبة منظمة التحرير بالتعويضات وعباد فازعة تضربش حنيك من عند "الأخوة" في المنظمة ... وما دام اللي ماتله حد خذا متيِّعُه ما عادش ثمة داعي باش نحكيو على "تخليط الدم" بالقضية و التشرُّف بهالتضحية وبالقومية و هات من هاك اللاوي...ء
وحديثتا قياس،اللي يعطي حاجة لبلاده ووطنُه ما ثمة علاش باش يتبجح بيها و الا يعملها محل فخرة يزايد بيها على غيرُه، كيف ما الصدقة والآ رُبَّما أكثر لأن إذا كان الصدقة حاجة باهية و مستحسنة، المعطى و التضحية للبلاد والوطن واجب .
كيف اللي خذاو الهناشر والسواني و رخض اللواجات والدخان ، ولآ وظيفة شاوش في إداة والآ قرديان حبس والآ عسَّاس جنينة و غيرها و غيرها من الامتيازات على جدة الاستقلال على أنهم مقاومين و شاركو في تحرير البلاد، كيف الكوَّارجية والا أي رياضي قال اشنوة من مستوى عالمي اللي ما يهبط للملعب و للميدان والا اللي هو الآ ما يبشتروله الملاين، كيفاش هالتضحية تصُح وفي حق آش تتسمَّى وطنية.ء
وطنية الامتيازات والمكاسب اللي من غير مورب شرعي ما تنجمش تكون وطنية و يتأكد فيها مقولة عبدالله العروي المؤرخ المغربي أن "حركات التحرر الوطني ماهي كان مظهر من مظاهر السيبة والتفليقة العامة واللي يترتب عليها قسمة غنائم"ء
كلمة الوطَن- بالفتحة على الطَّاد- ما تعلأّمتها وآنا صغير كان في المدرسة "الفراكو آراب" واللي بناتها فرانسا في قرية جات في قطعة من خلا، من شيرة معلم فرنساوي يحفظ فينا في المرسياز و يجبرنا تغنيوها قارد آ فو قدَّام العلم لمثلث الآلوان، و من شيرة معلم جرجيسي الله يرحمه يحفظ فينا في حيُّوا العلم رمز الوطـَن ووطني بالآمس كنت....ء
عند العامة و بالخصوص عند أهلنا من الجنوب الناس تعرف يعضها بانتمائها "للوطْن" و من الجملة يستعملو هاللفظة كيف ينعتو واحد من الجنوب و الا مروح والا جاي منه و يقولو فلان من الوطـْن والا مروح للوطـْن، والا الفطايري الغمراسني كيف يحب يذاري واحد ولد بلادُه يقول: "أهل الوطـْن قبل البَطـْن".ء
ثمة اللي يمشي في بالهم اللي مفهوم "الوطـَن" شيء جديد و حدث مع بداية المقاومة للمستعمر، في حين العبارة وردت في عدد كبير من القصائد اللي تقالت في معرك المقاومة بين 1881 و 1887 و اللي قدمتها فب عدبد التدوينات في خيل وليل.أمَّأ الا ستعمال متاعها درج أكثر بين الناس مع الحركة التحررية بالخصوص في أوساط الدساترة اللي كانو يبداو مراسلاتهم و الا مناشيرهم بكلمة "الوطني الغيور" من شيرة أخرى كانت وحدة من أكبر الجرائد الهزلية الساخرة و اللي في صف الحركة التحررية و يصدرها بن فضيلة اسمها "الوَطـَنْ".ء
الحاصل هالثلاث حروف في الربع ساعة الاخر من وجود الاستعمار كان عندهم ثقل كبير من شيرة نخوة و مفخرة عند البعض، و من شيرة ريبة و خوف عند المواليين لفرانسا و حكم البايات، مع هذا ما ننساوش آش كان لــ"سيدي المنصف باي" من شعبية لأن حب يكون تونسي بالكامل لِمَا كان له من الشعور الوطني التلقائي بلا سياسة ولاهم يحزنون. أمَّا ما قال حد لحد على الوطنيين الجدد اللي تسبغو بعد 31 جويلية 1954 و الا كيما يقولولهم دساترة منداس فرانس وقت اللي هذا يحك راسه يلقاش عنده ربطية بين 52 و 54 باش يحسبها على "أعمال المقاومة وتحرير الوطن" و ماذا من بزقليفات رجعت مقاومين و ماذا من حسابات تصفات باسم محاسبة الـ"قوادة وعملاء الفرنسيس".ء
عاشت الكلمة و مشتقَّانها مديدة و ما طولتش باش تخلِّي بقعتها لكلمة جديدة في المعجم السياسي التونسي و يرزت بالخصوص في أول انتخابات تشريعية كيف تقدمت القوائم الدستورية في جبهة مع المنظمات الحليفة ليها تحت تسمية الجبهة القومية، و ننجمو نتأكدو أنه من هاك الوقت حتى لسبعة نوفمبر ما كان استعمال للنعت أو الصفة "وطنية" كان لكل ما يتعلق بتاريخ الحركة الوطنية و حصريا الدستورية لافيها لا شيوعيين و لا غرانطة... وعلى فكرة آش خص لكان المؤرخين ينورونا على ضروف و ملابسات و أسباب هالتبديل اللغوي/السياسي.ء
و بعملية تونسة الشركات كيف كبَّانية بن قالمة و الترنفاي و الماء و تكوين شركات و صناديق و دواوين جديدة صارت صفتها "الوطنية" يعبرو عليها بـ "القومية"ء
و ما تثار الجدل حول "المسألة الوطنيةكإشكالية سياسية،(La question nationale)
كان في أوساط الجيل الثاني من اليسار التونسي بداية من 72 كمحاولة للتخلص من معاداة الحزب الشيوعي التونسي اللي كانت ميكانيكيا منقولة من الموقف الصيني تجاه الاتحاد السوفياتي، و بالتالي اقتداء بالحركات الماوية الأوروبية. كيف ما تطورت بعض الحركات الطلابية بعد هالفترة وبرزت بتسميات الوطنيون الديمقراطيون (الوطد او الوطدج)ء
باذن الله، بعد 7/11/87، كاينه وقع رد اعتبارللعبارة وولات كي الحيط القصير، و اجتمعت مجالس إدارات الشركات "القومية" و أدرجت فب جدول أعمالها نقطة تغيير اسم الشركات والا الدواوين والا الصناديق -كاينو واحد كان عنده اسم العيفة والا بخُّوش و حب يردو نوفل- لا بالك لا وسَّع... أمر يدوخ و يحير....ء و كذلك ضهرو برشة وطنيين كيف مع كل تبديل سروج.....
محل الشاهد هالبلوقوسفار كيف القهوة والا طبرنة و الا مطعم اللي عنده شهوة يعملها في طاولته (مدونته)، كان لقى اشكون يقسم معاه هاك الشهوة و الا يعطي فيه راي بالملاحة و حتى بالقباحة من غير ما توصل الامور خرّجني و نخرجك و كفّرني و نكفرك وخوني و نخونك.ء
البارح في الايام قاملنا ثلاثي يدَّعي امتلاكه لنقاوة ديننا و دين ولدينا، واحتكاره للذكاء، و بقدرتُه على اقتناص الآغبياء و المتربصين بمصالح الأمة و قضاياها المقدسة حقة حقة الأغبياء ماخذين حريتهم في التعبيرأكثر من اللازم.
اليوم ولات المسألة تفتيش في الضمائر من ناحية وطنيتها و نقاوتها و إذا لزم الامر تعليمها و تلقينها أسس الوطنية
في الحالتين التشابه كبير و الواحد يتساءل إلى مدى أنه هالإتجاهين متحالفين موضوعيا و يتقاسموا فكرة إلغاء الفكر المخالف و المختلف، ويمكن نزيدو في البرانويا أكثرو نقولو: إلى أي مدى هالتيارين ما يهدفوش للقضاء على الفضاء التدويني موش لأنه يهدد مصالح معينة بقدر ما أنه يعطي لأي شخص يستأنس في روحه القدرة على التعبير خارج القوالب بذكاه الخاص و بتعبيره الذاتي والمتحرر من كل المكبلات و الكوابح ( موش بقص و لصق) الجيل اللي يتكون على الإبحار بكل طلاقة اعتمادا على ذكاه و طاقاته، جيل يوللي صعب المراس موش بالساهل تدجينه و استقطابه هو الجيل اللي ينجم يوصل لتحديد آليات خلاصُه.ء

مَنْ بَغَى يَشـَّهَرْيطلع لرُوس لَشْفَاق*** يقوم يدفع حاضر بِملازمُه جدُدْ