جوليات للشاعر عبدالرحمان الكافي

 

جوليات "لُطف" وروميو مسكوكة
كيف السلاطة بعد مالشكشوكة
***
جوليات رشيدة
جاء موافق قاعدة وقعيدة
"لُطف" انشهرت بارعة مزيدة
من الشهامة مطلـّعة مسبوكة
***

صاحبة فهامة
أخت التهذيب بنيَّة الشَّهامة
حفيدة الآداب إسم وفامة
فن التمثيل ماهوش بالدربوكة
***
بالموزيكة
ولاهوش طقطوفات رست وصيكة
التمثيل ما تقدٌّوش منهي ركيكة
ما يحب كان العارفة الدكدوكة
***

 
مولاة لطافة
تمثل أدوار الطهر والعفافة
أم مسكوكة أوضاعها سَخَافَة
في نظر الفاهم دورها أضحوكة
***
ظهرت عالمرسح
تنقز كما بوساق ساعة تفركخ
قولولها خاطيك هذا إركح
لوكان شطيح تنجميلَه حرُوكـَه
***

 
الرقص تقدَّه
أمَّا التمثيل رمز ما يتعدَّى
أثقل وأشوم من أيام الشدة
دور الرفيس ما ما تمثلـُه المحكوكة
***
والله غريبة
دور العقاب تمثلـُه تبِّـيـبَـة
الفرق بعيد بين السّبَع والذيبة
مابعَدْ الجَو على الذي في فلوكـَه
***

أدوار الرجَّاله
صعاب ياسر على النساء الزَّلآله
عليك بعوادة عروستها هجَّالة
هذا اللي يصلح بيك يا مسكوكة
***
خرجتي من طورك
مثَّلتي لينا دور ماهو دورك
مولى العقل ما يدوّخاش بخورك
أمَّا الهُمَّاع أقوالهم كتروكة
***

 

يكلـُّه منكم
يا كشخان الوقت ما أهبلكم
درباتكم بشطيحها سحرتكم
بقيتو تسلـُّوا من الصبع في شوكة
***
ناري عليكم
شقف الهوى والكيف ياسر فيكم
بعيوني ريتَه للشقاء مدِّيكم
حتى تعودوا احوالكم مدروكـَه
***

 
بيكم غقلـّة
مليون راجل تعشقوا في طفلة
إذا سمعتوا باسمها في حفلة
تمشوا وترموا المال في مسكوكة
***
في شقَّاقة
لا يتحسب لله لاهو صداقَة
تضحك عليكم فاجرة فرناقة
عملتوا ليها صيت وهي صعلوكـَة
***

عملتوا صايه
لوحدة شرموطة ما لهاش غاية
إلا كي تبقوا اميزرين عرايا
ورقابكم لاهل الربى مملوكأَه
***
جنَّنتوها
أم البويه بالقمر وصفتوها
يكذيكم انتم اللي هبّلتوها
ألفين كاشخ في الجنينة روكـَه
***

 
شركة فيها
ألفين مغط الكل يجروا عليها
بنت القايد زهرها امَّاتيها
ادخل من الباب تخرج على شوكة
***
القُعر تعنَّى
القهدي واقف في الدروج يستنَّى
قليل الفلوس في وصولها يتمنَّى
صاحب المال غرق في مسكوكة
***
في كـــابينَة
اللي يعين الفجور ربِّي يهينَه
يا ولاد تونس إرجعوا يزِّينا
الشاعر عليكم دمعتّه مسفوكة
----

 

صدرت في جحجوح العدد 293 يتاريخ 10 أفريل 1924 

من الأرشيف: عبدالرحمان الكافي ملزومة الصبر لله*

باش نبدا ها القليم في التدوينة كل مرة و الخاطر وين باش يسرح، و تبديل السروج فيه راحة يقول المثل و ساعة هلس و ساعة جد.
ماذا بية نعرفكم على شخصية مهمة في تاريخ الشعر الشعبي التونسي في أول القرن اللي فات. هو واحد من الشعراء اللي ربما لوكان خلط على وقتكم راهو بلوڤاجي يعمل ستة و ستين كيف، لأنه في وقتو استغل بداية الصحافة الهزلية و خذا بايو فيها مليح. هالشاعر هو عبدالرحمان الكافي يرجع عبيدي من أولاد عبيد اللي هي قبيلة متفرقة بين الغرب التونسي و الشرق الجزائري مرتبطين بجدهم سيد عبيد مواضبين لتوة على الزيارة و الحضرة متاعو عندهم إنشاد يركب الكيف في مهوى منسوب عليهم يتسمى العبيدي كيما يجيبو في مهوى الركروكي و الجندوبي و الطرخاني و الريش اللي هي مهاوي يتقاسموها كل لاسكان المرتفعات الغربية بين تونس و شرق تزاير. يعتقد اللأستاذ فيصل المنصوري اللي خدم على الكافي و حققله الديوان متاعه و المنشور عند سحر اللي الكافي مولود عام 1885 و نشاء في عائلة علم و بوه كان خدم عدل و قاضي عند أولاد عيار بالطبيعة عبدر الرحمان باش يتعدى في قرايته بالزيتونة ما نعرفوش كمل ولا لا المهم من صغرته (17 انعام) طلع مشوش و اتغرم بالسياسة. و الشي اللي نستنتجوه انو روى الشعر من العين العبيدية و شوية معرفة من الوسط العايلي و من جامع الزيتونة و حسب السي المنصوري الكافي ما كانش مستقر ياسر في حياته و خدم برشة خدم و تنقل في برشة بقايع منها أنوصغير مشى يفلح في السرس مع بوه في ارض ليهم، و مشى اخدم السكر و كي جا لتونس خدم صانع برانسي ( بشمار) و وقت غزو الطليان لطرابلس اتطوع مع اللي اتطوعوا لليبيا و من غادي قصد ربي لتركيا اللي خدم فيها طيّاب مدة ثلاث سنين. و كيف رجع لتونس عاودو دخلوه للعسكر وقت الحرب العالمية الأولى . و من بعد دخل –شدو عندكم- للحركة الشيوعية و منها جا للصحافة و بدا ينشر في جرائد هاك الوقت.
شاعر صاحب سوابق: أول ربطية كانت في دواير 1905/1906 و هو في العسكر تربط 4 شهر على تزرتية. و الثانية هو و جماعة الحزب الشيوعي، عام 1922 في شهر فيفري سي الكافي يرشقلها ملزومة و مسدس ( موش فرد) شعر و يترجموهم جماعة الحزب و يطبعوهم في 3000 نسخة باش يسربيوهم كي التراكتوات . تحجزو المطبوعات و توقفو الجماعة و تحكم على الكافي 5 أشهر. الحاصل شخصية مهمة ما نيش باش انطول بالهدرة أحنا قلنا تنفيسة عليكم بالكتاب في دار النشر سحر يستاهل باش يكون تحت ايديكم ماهوش من الأدب "العاصم" و باب علم الشي و لا جهله.
أخترت لكم ملزومة في ميزان البورجيلة الكامل ملزومةتنجم تكون النشيد الرسمي متاع الحركة الأنارشيست هاك اللي شعارهم
« Ni Dieu ni maitre »
الملزومة منقوشة و مرتوبة و مسنكسة تسنكيسة ما نحكيلكمش تبعوني.
ملحوظة اللي وذنيهم ديليكاتو يحطو بول كياس و المكب متاع القافية مانيش باش نكتبو باش نعملو فيه مسابقة اللي يطلعو يربح جايزة قمقومة .

الصبر لله.
الصبر لله و الرجــــــوع لربي
أما الدنيا و اهلهافي ........
****
الرجــــــــــــاء في المولى
أما الدنيا و اهلها مجمولة
جميع الدول الكل دولـة دولــــــــــة
اللي ظهر منها و اللي ڨعد متخبي
برياسها بملـــوكها بالصـــولة
بتيجانهم بعروشهم في .....
****
باللي فيــــــــــــــــــــــها
برياسها بسلطانها بواليها
أبيها بمقيمها بقاضيها
أبباصها بإمامها بالربي
بشيخ الاسلام بعدولها بمفتيها
المدير و المراقبة في.............
****
على والــــــــــــــــــــــــة
حكامها و ﭬياد كل عمالة
الشيخ و الهيدوك و اللــي بماله
و اللي صندوقه بالفلوس معبي
التاجر و الفلاح و البطــــــالة
الناس الغنيا كسبهم في ......
****
زيد اللوســـــــــــــــــــــــــــــــــــــــــــي
و اللي يصدر في الأحكام حتى بروسي
و كل ما يسمي الحاكم دوسي
حتى التريبونال و الجوج دو بي
وكيل الدولة تونسي أو سوسي
الرئيس و الأعضاء حكمهم في .....
****
ما ننســــــــــــــــــــــاوش
الكاهية و وظيفته و باش شاوش
و كذلك اللي قراو أو ما قراوش
و اللي عمل طربوش ولا كيبي
البوليس و الجادارمي و الشاوش
أعوان الحكومة بكلهم في....
****
العالم و الكــــــــــــــــــاتب
و اللي توظف في أعلى المراتب
و اللي تسمى و صار ياخذ راتب
و اللي يهذب في العقول يربي
و معلم الصبيان في المكاتب
و المؤدبين عقولهم في ....
****
وزير العدليــــــــــــــــــــة
و مديرها و نائب الداخلية
و شيخ المدينة و رايس الجمعية
لو كان يكون جنسه عربي
و وزير القلم و قايد الحربية
بسلاحهم و اسطولهم في ....
****
المتكـــــــــــــــــــــــــــــــبر
المستبد في الخلق و المتجبر
و اللي ركب على الخيول العبر
و اللي يسكن في قصر ولا ﭬربي
و اللي خطب بالكذب فوق المنبر
أهل السياسة أفكارهم في....
****
المدمــــــــــــــــر
و اللي بعثاته فرانسا معمر
العواد و القصاب و اللي يزمر
كذلك الدرويش و المتنبي
شيخ الطريقة إذا بدا متخمر
ببركته و بنادره في ....
****
الشيخ و التلمـــــــودة
و اللي لبس أنتيكة ولا مودة
و اللي سماوها الشابة الخندودة
و اللي عشق أم الغثيث مجبي
و كل يد للبوس هي ممدودة
عوض نقبلها نحطها في....
****
هاكة هــــــــــــــــــــــــــو
و اللي ما عجبوش ياخذه في الصوة
ربي خلقني ليه عبده هو
لا نخاف لا نذل و لا نخبي
أصغو كلامي يا ذراري حوة
و إذا ما فهمتوش يدكم في....
****
إفهم تـــــــــــــــــــوة
خيار الحديث ﭬصاص موشي دوة
إذا تجيني من جانب الأخوة
أنا خديم عبد مطيع ليك مربي
إذا تقلي حبني بالقوة
نقلك استنى لين نشاور.....
****
حلفت يميــــــــــــــــــــني
لا نخضع لمخلوق لو يغنيني
الموت مرة برك يا صاغيني
و القسم مسوﭬر في كفالة ربي
****
اللي مات تهنـــــــــــــــى
و الموت أحسن من حياة المنة
العز في النار و لا الذل في الجنة
موت الشرف و لا حياة الكبي
هذا فكري صغت بيه الغنة
صححتها و طبعت فيها بــــــ........

*نشرت قي النسخة الأولى من خيل وليل في 14/06/2007

من جهلي وقلة تدبيري: عبدالرحمان الكافي

ملزومة للشاعر عبدالرحمان الكافي في بداية العشرينات وقت اللي لا ثمة لا مجلة الاحوال الشخصية يتعرض فيها بطريقتو المعهودة لتعدد الزوجات يقول فيها:
-------------------------------
من جهلي وقلة تدبيري
تزوجت بجوز نساوين
ما نظرتش لحالة غيري
من وحده يعاني في البين
***
من جهلي يا كبر شقايا
تزوجت بثنتين صبايا
قلت نعدِّي كيف نهاية
ورياضة بين البنتين
ليلة غادي وليلة هنايا
نتشخلع بين فراشين
***
نتخلـَّع بين فروشات
كل ليلة حذا وحدة نبات
حلـُّمة سود الرمقات
وفريدة ذبَّال العين
نعدِّي ليالي ونهارات
متمتَّع بين الاثنين
***
نريض معاهم نتهنَّى
وحدة منَّا والاخرى منَّا
وآنا مثيل عصيفر جنَّه
مدلل بين بساتين
ساعة نقطف من الحنَّه
وساعة ورد وياسمين
***
ساعة نقطف من النوار
فل ونسري وجلنار
وساعة ناكل مالآثمار
عوينة كحلة وخوخ وتين
لاهي مع زينات ملاح
فارح وايامي زاهيين
***
....
هافكرة من كثر هبالي
محنة ما كانت في بالي
خان عقلي بي اسآلي
ورماني بين لفعتين
حلومة رقعة فيلالي
فرهودة ذكاء وتزعبين
***
فرهودة خفيفة ودكاكة
وحلومة قباحة وركاكة
وحدة فردة والاخرى شلاكة
سلعة حرفةمبارين
خلوني نحك بحكاكة
زادو على همِّي همين
***
زادو على همي هموم
لانرقد لا يجيني نوم
آنا هو عمر الشوم
لا نعرف راحة درجين
فرهودة تشخر وتزوم
وحلومة سبَّابة دين
***
حتَّى لين يقول في الاخر:

اللي يعمل في الدار غوالي *
يجرالو كيف اللي جرالي
غذا يربح يربح من تالي
ما يلقاشي صدر حنين
ترصيلو في الهم يكالي
واش يلزّك للاثنين
***
هذاك اللي عنده ثنتين
تتعدَّى حياتو في البين
النسوة ما فيهمش حنين
لو تبدا عمرها تسعين
النار تشعلها في الحين
وتلزك عالفعل الشين
***
العاقل عازب أحسن ليه
ما كانش وحده تكفيه
الكافي نظم معانيه
ناصحكم يا مخبوطين
راهو الوقت على ما فيه
قالو الناس الغارفين
-----------------------------------
* الغوالي : النسوان
ملحوظة: عبدالرحمان الكافي كيف البعض من الشعراء عنهم شوية ميزوجينية، والقصيد هو من نوع الدروشة يحب يقول يعالج مسألة مهمة بطريقة فكهة ما تغيبش عليها بعض الأحكام "المهينة" للمرا من وجهة نظرنا اليوم.

عبد الرحمان الكافي: يا أهل الشورى

ملزومة بورجيلة

يا آهل الشورى والدبارة رضيتو*** وقت الصِّيام في قوتنا تراخيتو

***

حيا مغبونـــــــــــــــــــــــــــة*** وقت الصيام صُعبت علينا المونة

استنصرنا بيكم شيء مانفعتونا*** غضّؤيتو علينا الطرف وتهنيتو

***

أعطـُـــــــــــونا دبارة *** لآشكون نشكو الخَلق راهي حيارة

في وسط تونس قايمة حُبارة *** وانت جملة رقُود ليس دريتو

***

قـــــــــــــــُـــــول نعاسة *** كأنكم ما كمش أهل رياسة

لا حد منكم جايبتُّو حماسة *** في زهوكم وفنونكم تلهيتو

***

مجلــــــــــــــس الأمة *** وين رياسة البلاد وين الهمة

راهي الخلايق عايشة في غُمَّة *** هاني نفكـّر كانكم نسيتو

***

آشكون فيكم فالح *** ينفع الأمة ويجلب المصالح

ترضاو شعبكم في المعيشة كالح *** القلـِّيل حاير جايغة ذرِّيتو

***

رحنا ضعنـــــــــــا *** بين المناهل من المعاش تمنعنا

أرباب المناصب ليس حد نفعنا *** هذا العجب يا ناس ليس رضيتو

***

صرنا فضيــــــــــحة *** نتأسفو على قوتنا بقريحة

كيلو السميد ناكل عليه طريحة *** وانتم عجبكمشي ما حسِّيتو

***

آش هالحــــــــــــــــــــالة *** إتكلمو عالحق يا رجَّالة

خيار الحديث يكون دالة بدالة *** إذا عزمتو في الصلاح بديتو

***

ما تكرُّوشِـــــــي *** إتكلمو في الحق ما تذلـُّوشي

ربِّي مع المضطر ما تخافوشي *** هاذي معاني لاش عنها سهيتو

***

المعمرين حرمتنا *** أرباب المطاحن حمّمُو عيشتنا

إذا دام هذا الحال رانا متنا *** كل حد حاير ضايعة عقليتو

***

غُلـْو المعاش وفَّانا *** الدولة علينا كانها غضبانة

الظـَّاهر معاها ما عملنا دوانة *** مُحال عالسميد وزيتو

نُشرت بجريدة المضحك غدد 38 بتاريخ 12 جوان 1920

هي مزمرة وزادولها زمـّارة: عبدالرحمان الكافي

صابة القمح السنا عجرودة زيدها صيف والحصة الواحدة وجمل عليهم رمضان والعيد في الآيادي و الدخول للمكاتب ...أكهو ما يفيد فيها كان عبدالرحمان الكافي يعمل ضربة على الأسعار اللاهبة

في بداية العشرينات تم وضع صفارة إنذار (Sirène) فوق مبنى وزارة الأشغال العامة سابقا بنهج القصبة قبالة سوق الشواشية، تطلق أزيزها كل يوم في منتصف النهار، يبدو أنها كلفت ميزانية الدولة مقدارا باهضا. عبدالرحمان الكافي كعادته لم يترك الفرصة تمر دون أن تجود قريحته بلاذع الشعر

هي مزمرة وزادولها زمـّارة *** لا فايدة لا منفعة لا ضمارة

***

الوقت مزمــــــــــر***الشر خلط على ذراعته مشمر

الناس تشكي من الخلاء تتذمر*** الفقري بحالي عيشته مرّارة

يا من آتيت و جيت باش تعمر ***دزتك ماهي شبوب عمارة

***

الأمة حـــــــــــــــــــــــــــــارت *** الأسعار في يومين صعدت طارت

التجار علينا يا رفيقي جارت *** بياع الخضرة عاند الجزارة

على بعضها العباد راهي غارت *** سبب الهم حرية التجارة

***

حرية القيـــــــــمة *** عاقبتها ناتنة و عقيمة

أبو العيلة حالته سقيمة *** على حق الخبز عجز ماكبر ناره

سوم الزيت يزيد عالتبريمة *** للصعود ركب في طيارة

***

علا و تعـــــــــــــــــــــــلى *** دخل الجو وغاب يا وعد الله

ما عاد يرُدُّه جُند ولا محَلـَّة *** ولا ترَجَّعُو زُمَّارة الإدارة

الفقري مسكين ما بقى ما يوصلَّه *** لوكان يندب حتَّى تحفى اظفارَه

***

وَعد البـــــــــــــــــــــاري *** عملولنا زمامير شغل ذراري

في كُل يوم نتصنطوه عماري *** لاهوش صوت رباب لا قيطارة

طَرڨ الكِسرة خير يا سي القاري *** راس الجيعان ما يطيقش الزُمَّارة

***

زَمَّرتوهــــــــــــــــــــــا *** على الضعيف من ساسها قلبتوها

في الجو الخبزة عليه طيرتوها *** التاجر استغنى ربَح في مشوارة

غنيتو البعض والبعض فقَّرتوه *** ما تخُصّنا كان نغمة الزمَّارة

***

خصَّتنا نغمـــــــة *** وقت اللي صرنا نشربو بالجمَّه

الايَّام سودة كالليلي الدَّغمة *** تهردت الحالة وقامت الغُبَّارة

مل يخُصّنا عل الموت كانش فغمة *** آشكون مش يسمع الزمَّارة

***

لإذا متــــــــــــــــــــــــنا*** آش كون يسِخَف ينظر لحالتنا

ذنوبنا في رقبة رجالتنا *** اللي خلـَّتنا امِّيزرين فقارة

شكيناله قدَّاش ما سمعتنا *** أضنها اتلهات بالزمَّارة

***

رانا جعنا *** من الغلا في الهاوية اتبلـَّعنا

حس التزمير في ريوسنا صدَّعنا *** من الشَّر صرنا مزَمـرين سكارة

غُلـْو المعيشة ضامنا ضَعضَعْـنا *** مليحنا ما بقاش يكسب بــارة

***

الغِلـْو كوانــــــــــــــــــــــــا *** سَيِّبْ علينا عسكره وآعوانه

اللِّي نشمولَه ما قبَل دعوانا *** من جيهتنا مغَمضين آنظـــاره

طبيبنا ما حب يعطي دوانا *** في عوض المشهل جاب هالزمَّارة

***

جِت من غـــــــــــــادي *** صياحه يا رفيق موحش صادي

نا فهمت منها على خلاها تنادي *** نبقاو عشرة نرفعو على حمارة

بفلوسنا يشريو هالغَرَّادِي *** تسعين ألف فرنك راحو خسارة

***

راحو رزيـــــــــــــــــــــة *** تسعين ألف فرنك موش شوية

تسعين ألف يأسسو كُـلية *** و يعملو بابور أو طيَّارة

تسعين ألف يعونو الخَيرِية *** أحس وأفضل من شراء زمَّارة

***

خير من شقلالـــــــه*** تسعين ألف يِمَوّنو العمَالة

تسعين ألف فرنك تعمل حالة *** لو يشدهم الآديب تعمر داره

يوَلـِّي خرجيته تجيبها الحمَّالة *** وكسوته من لندرة مختارة

***

لوكان يجـــــــــونـــــي *** يداوولي ميزيرتي وجنوني

تسعين ألف فرنك يا مضنوني *** يسَيِّدو المَزلوط بين أجواره

تسعين ألف من الفقَـَرْ يغنوني *** نشري منهم هنشير لا زُمَّارَة

***

لا زُمِّــــــــــــــيـــــرة *** تسعين ألف فرنك حاجة كبيرة

يِـبْـنُـولِـي بلاص في البحِيـــــرة *** ويعرسولي اِبِّنت خالي عمارة

تسعين ألف يِفـََيِّضو الخميرة *** لا تحرم منهم ناظم الزُّمَـــارة

هي مزمرة وزادولها زمـّارة

في بداية العشرينات تم وضع صفارة إنذار (Sirène) فوق مبنى وزارة الأشغال العامة سابقا بنهج القصبة قبالة سوق الشواشية، تطلق أزيزها كل يوم في منتصف النهار، يبدو أنها كلفت ميزانية الدولة مقدارا باهضا. عبدالرحمان الكافي كعادته لم يترك الفرصة تمر دون أن تجود قريحته بلاذع الشعر

هي مزمرة وزادولها زمـّارة *** لا فايدة لا منفعة لا ضمارة

الوقت مزمــــــــــر***الشر خلط على ذراعته مشمر

***

الناس تشكي من الخلاء تتذمر*** الفقري بحالي عيشته مرّارة

يا من آتيت و جيت باش تعمر ***دزتك ماهي شبوب عمارة

***

الأمة حــــــارت *** الأسعار في يومين صعدت طارت

التجار علينا يا رفيقي جارت *** بياع الخضر عاند الجزارة

على بعضها العباد راهي غارت *** سبب الهم حرية التجارة

***

حرية القيــــــمة *** عاقبتها ناتنة و عقيمة

أبو العيلة حالته سقيمة *** على حق الخبز عجز ماكبر ناره

سوم الزيت يزيد عالتبريمة *** للصعود ركب في طيارة

علا و تعـــــــلى *** دخل الجو وغاب يا وعد الله