خاطري متكدر من داك يا عنود

للعرف أحمد بن موسى

قسيم عوارم

خاطري متكدر من داك يا عنود *** صار قلبي واجي قبس الهوى شعيل

الرجاء نستنَّى سرِّي خفى جحود *** لا حكيم نفعني لا من شفى غليل

تاركه خُنَّارك وقصَّرت عالوُدود *** يا حلآة البرني يا زهوة الدليل

جلْ رب ان زانك الباسط الوَدود *** انفردت بزينكلا تعتني بميل

البدور السبعة وهياكل الضدود *** الهاقعة والجنزل والطلح والكليل

من شعاع جبينك وبوارق الخدود *** يغتشوا ويغيبوا منك ضوى الليل

حين ما تدّرج فوق الوطى تعود *** كما القضيب الرَّاجح من شمهلة يميل

تختبل شعورك بنوافج النفود *** كما فزوع البردي في أثر واد سيل

سوالفك نحزيهم غلمان لون سود *** قالقين تنشروا من فوق خرطبيل

والجبين منوّر كطالع الصعود *** والحواجب تسحر هاروت في المثيل

على خدودك لاحتْ أنوار كل عودْ *** كل عود مفتّق بالطيب يعتديل

في جنينة باشا متنفجة نفوذ *** والأنف طير البرني على الصيّدة محيل

ثغرك المتنظم جوْهر على عقوذ *** قرقفة والصهباء ومجاز سلسبيل

رقبتك والغبّه وعواتق الزنود *** كما الطمج يلجُّوا عن صدرها حفيل

زرد خان تشرّع عن ميزر النهود *** وزرفقان تهندل عن جدول ان يهيل

حكمة ابن داود عن طلسم الرصوذ *** طلصمان الفصة وحكم شرحبيل

انجلات بمهلة لا شافها حسود *** في لباس مسكـّل لا جات عند جيل

لا حدث مثلها في السند والهنود *** فازت على العُنّس بمحاسن ال تهيل

مزفزفة مرتجّه معففة الورود *** محسّنة محتسنة محسّنة الدليل

واضحة متبشره تجلـِّي على النكود *** زاعمة مزتعمة مشفيه الغليل

مدرّبه ممتنعه تربية كل جود *** قاصرة بالملقى ودليلها عتيل

آش نظرك بالله يا غاية القصود *** إمتثل لكلامي في الحق ما تعيل

للوصول استاجب هاهي النساء شهود *** آنا مثيلي غارق ما صابشي مثيل

ليك ناشب شابب ما عادشي صدود *** صرت حازز عاجز للقاك ما نقيل

أعطف بوصولك يا لحظة الشرود *** أصنعي اللي قصدك ما تقبلي الدخيل

ما حكاوا قبلنا في اللفظ والنشوذ *** الخصَص ما يبذر وفِّي بكل كيل

رجّحي موازينك لمحاسن الضدود *** عيشتك في الدنيا لا زهو لا خليل

مايسة مزهودة كما ساكن اللحود *** واهمه متروكه والقلب جا ذليل

برّدي حرقاتك وسوامر الوقود *** لآ بغيت تقرّب لا مبعّده مبيل

كان قصدك توبه رب الأعلى وجود *** رضيت على قتلاني يا شارد الجفيل

لو يحولوا دونك يا عازبه صيود *** وعاهد الله منِّي لا نترك السبيل

مدّيلي عربونك لا تقصّري الودود *** نا في رضاك مغيّر وتمّمي الجميل

ليس نقصّر دونك لو تمنعت جنود *** حين ما يهدفلي من عندك الرسيل

نعتني ونقبّل ونفرعس النهود *** نحوز ما في بالي ما عادش وكيل

من كؤوس المحنة نتوادُّوا ودود *** على العشم ولهمَّه والعاعد الأصيل

أنا الذي نتصرّف وملآفظي نفود *** إسمي احمد بن موسى وزَّان كل هيل

وادعوني يا لبنات بالله.

من الأغاني التونسية الخضراء اللي سرات سريان النار في الحصيدة  عند التوانسة بمختلف شرائحهم وجهاتهم من غير حتى تحفظ باستثناء بعض الأفليات اللي من طبعها عندها الغناء مكروه وربما محرم وحاجات من هالقبيل،وادعوني يا لبنات بالله.

المهم أن الغنَّاية في الواقع هي من نوع الأخضر القصيل يحب يقول الغامق لأن الإيحاءات الإيروسية فيها باينة تعيط يا بابا يامِّي من نوع الوصول وحصَّاد السبول اللي يد منجله  تكسرت هههه والفاهم يفهم وكل حد كيف ما يحب يفهم، ورقاد فرد حرام وفرد جبَّة آش يحب يقول البحث على الدفاء زعمة..... 
قالت صديقة (هي كانت سبب في هالنصيص) نتفكر كي كنت صغيرة كي يبداو النساء والصبايا يغنيو في أوادعوني يبداو يتغامزو ويضِّيحكو......

الحاصل ومحل الشاهد عملية تنقية وتطهير الذاكرة الجماعية من الحرِّيات اللي كانت دارجة عند الخاص والعام عملية ربما تكون "مهمة" خللي يخدموا الباحثين والمتخصصين في التراث الشعبي ويصورو خبيزة أمَّا مع ذلك صعيب ياسر يضربو الخيال الجماعي الشعبي بالكارشار وللتذكير هالعمليات اللي اختصوا بيها الأنظمة الفاشية برغم قوتها وجبروتها ما عندها وين وصلت....

أه وادعوني يا لبنات بالله

وادعوني وإذا طلع الفجر

بالله شيعوني يا لبنات بالله.

***

بعد العقيدة خانت فاطمة

بعد العقيدة قالت خال والله

محبة جديدة خانت فاطمة

***

بعد الوصول وبعد اللي رقدنا

الليل يطول جرالي كما جرى

لحَصَّاد السبول تقطع منجلـَه

انكسرت إيدَه وخانت فاطمة

***

بعد وصال وبعد اللي رقدنا

"في الحلال*" جرالي كما جرى

صيَّاد الغزال طاح الليل وللى

بلادة بعيدة وخانت فاطمة

***

بعد المنام وبعد اللي رقدنا

فرد حرام جرالي كما جرى

صياد الحمام طاح الليل والله

الخمجة شديدة وخانت فاطمة

***

بعد المحبة وبعد اللي رقدنا

فرد جبَّة جرالي كما جرى

صياد الغربَّة طاح الليل وروَّح

 مصهود الكبيدة وخانت فاطمة

 * وفع تغييرها في تسجيل الإذاعة ما زلت ما عرفتش الكلمة بالضيط في تسجيل صالة الفتح