من الأرشيف: عبدالرحمان الكافي ملزومة الصبر لله*

باش نبدا ها القليم في التدوينة كل مرة و الخاطر وين باش يسرح، و تبديل السروج فيه راحة يقول المثل و ساعة هلس و ساعة جد.
ماذا بية نعرفكم على شخصية مهمة في تاريخ الشعر الشعبي التونسي في أول القرن اللي فات. هو واحد من الشعراء اللي ربما لوكان خلط على وقتكم راهو بلوڤاجي يعمل ستة و ستين كيف، لأنه في وقتو استغل بداية الصحافة الهزلية و خذا بايو فيها مليح. هالشاعر هو عبدالرحمان الكافي يرجع عبيدي من أولاد عبيد اللي هي قبيلة متفرقة بين الغرب التونسي و الشرق الجزائري مرتبطين بجدهم سيد عبيد مواضبين لتوة على الزيارة و الحضرة متاعو عندهم إنشاد يركب الكيف في مهوى منسوب عليهم يتسمى العبيدي كيما يجيبو في مهوى الركروكي و الجندوبي و الطرخاني و الريش اللي هي مهاوي يتقاسموها كل لاسكان المرتفعات الغربية بين تونس و شرق تزاير. يعتقد اللأستاذ فيصل المنصوري اللي خدم على الكافي و حققله الديوان متاعه و المنشور عند سحر اللي الكافي مولود عام 1885 و نشاء في عائلة علم و بوه كان خدم عدل و قاضي عند أولاد عيار بالطبيعة عبدر الرحمان باش يتعدى في قرايته بالزيتونة ما نعرفوش كمل ولا لا المهم من صغرته (17 انعام) طلع مشوش و اتغرم بالسياسة. و الشي اللي نستنتجوه انو روى الشعر من العين العبيدية و شوية معرفة من الوسط العايلي و من جامع الزيتونة و حسب السي المنصوري الكافي ما كانش مستقر ياسر في حياته و خدم برشة خدم و تنقل في برشة بقايع منها أنوصغير مشى يفلح في السرس مع بوه في ارض ليهم، و مشى اخدم السكر و كي جا لتونس خدم صانع برانسي ( بشمار) و وقت غزو الطليان لطرابلس اتطوع مع اللي اتطوعوا لليبيا و من غادي قصد ربي لتركيا اللي خدم فيها طيّاب مدة ثلاث سنين. و كيف رجع لتونس عاودو دخلوه للعسكر وقت الحرب العالمية الأولى . و من بعد دخل –شدو عندكم- للحركة الشيوعية و منها جا للصحافة و بدا ينشر في جرائد هاك الوقت.
شاعر صاحب سوابق: أول ربطية كانت في دواير 1905/1906 و هو في العسكر تربط 4 شهر على تزرتية. و الثانية هو و جماعة الحزب الشيوعي، عام 1922 في شهر فيفري سي الكافي يرشقلها ملزومة و مسدس ( موش فرد) شعر و يترجموهم جماعة الحزب و يطبعوهم في 3000 نسخة باش يسربيوهم كي التراكتوات . تحجزو المطبوعات و توقفو الجماعة و تحكم على الكافي 5 أشهر. الحاصل شخصية مهمة ما نيش باش انطول بالهدرة أحنا قلنا تنفيسة عليكم بالكتاب في دار النشر سحر يستاهل باش يكون تحت ايديكم ماهوش من الأدب "العاصم" و باب علم الشي و لا جهله.
أخترت لكم ملزومة في ميزان البورجيلة الكامل ملزومةتنجم تكون النشيد الرسمي متاع الحركة الأنارشيست هاك اللي شعارهم
« Ni Dieu ni maitre »
الملزومة منقوشة و مرتوبة و مسنكسة تسنكيسة ما نحكيلكمش تبعوني.
ملحوظة اللي وذنيهم ديليكاتو يحطو بول كياس و المكب متاع القافية مانيش باش نكتبو باش نعملو فيه مسابقة اللي يطلعو يربح جايزة قمقومة .

الصبر لله.
الصبر لله و الرجــــــوع لربي
أما الدنيا و اهلهافي ........
****
الرجــــــــــــاء في المولى
أما الدنيا و اهلها مجمولة
جميع الدول الكل دولـة دولــــــــــة
اللي ظهر منها و اللي ڨعد متخبي
برياسها بملـــوكها بالصـــولة
بتيجانهم بعروشهم في .....
****
باللي فيــــــــــــــــــــــها
برياسها بسلطانها بواليها
أبيها بمقيمها بقاضيها
أبباصها بإمامها بالربي
بشيخ الاسلام بعدولها بمفتيها
المدير و المراقبة في.............
****
على والــــــــــــــــــــــــة
حكامها و ﭬياد كل عمالة
الشيخ و الهيدوك و اللــي بماله
و اللي صندوقه بالفلوس معبي
التاجر و الفلاح و البطــــــالة
الناس الغنيا كسبهم في ......
****
زيد اللوســـــــــــــــــــــــــــــــــــــــــــي
و اللي يصدر في الأحكام حتى بروسي
و كل ما يسمي الحاكم دوسي
حتى التريبونال و الجوج دو بي
وكيل الدولة تونسي أو سوسي
الرئيس و الأعضاء حكمهم في .....
****
ما ننســــــــــــــــــــــاوش
الكاهية و وظيفته و باش شاوش
و كذلك اللي قراو أو ما قراوش
و اللي عمل طربوش ولا كيبي
البوليس و الجادارمي و الشاوش
أعوان الحكومة بكلهم في....
****
العالم و الكــــــــــــــــــاتب
و اللي توظف في أعلى المراتب
و اللي تسمى و صار ياخذ راتب
و اللي يهذب في العقول يربي
و معلم الصبيان في المكاتب
و المؤدبين عقولهم في ....
****
وزير العدليــــــــــــــــــــة
و مديرها و نائب الداخلية
و شيخ المدينة و رايس الجمعية
لو كان يكون جنسه عربي
و وزير القلم و قايد الحربية
بسلاحهم و اسطولهم في ....
****
المتكـــــــــــــــــــــــــــــــبر
المستبد في الخلق و المتجبر
و اللي ركب على الخيول العبر
و اللي يسكن في قصر ولا ﭬربي
و اللي خطب بالكذب فوق المنبر
أهل السياسة أفكارهم في....
****
المدمــــــــــــــــر
و اللي بعثاته فرانسا معمر
العواد و القصاب و اللي يزمر
كذلك الدرويش و المتنبي
شيخ الطريقة إذا بدا متخمر
ببركته و بنادره في ....
****
الشيخ و التلمـــــــودة
و اللي لبس أنتيكة ولا مودة
و اللي سماوها الشابة الخندودة
و اللي عشق أم الغثيث مجبي
و كل يد للبوس هي ممدودة
عوض نقبلها نحطها في....
****
هاكة هــــــــــــــــــــــــــو
و اللي ما عجبوش ياخذه في الصوة
ربي خلقني ليه عبده هو
لا نخاف لا نذل و لا نخبي
أصغو كلامي يا ذراري حوة
و إذا ما فهمتوش يدكم في....
****
إفهم تـــــــــــــــــــوة
خيار الحديث ﭬصاص موشي دوة
إذا تجيني من جانب الأخوة
أنا خديم عبد مطيع ليك مربي
إذا تقلي حبني بالقوة
نقلك استنى لين نشاور.....
****
حلفت يميــــــــــــــــــــني
لا نخضع لمخلوق لو يغنيني
الموت مرة برك يا صاغيني
و القسم مسوﭬر في كفالة ربي
****
اللي مات تهنـــــــــــــــى
و الموت أحسن من حياة المنة
العز في النار و لا الذل في الجنة
موت الشرف و لا حياة الكبي
هذا فكري صغت بيه الغنة
صححتها و طبعت فيها بــــــ........

*نشرت قي النسخة الأولى من خيل وليل في 14/06/2007

عندما يستشهد الباجي قائد السبسي بالشاعر الشعبي أحمد بن موسى

في بعض ما جاء على لسان الجازية الهلالية في ذكرها لخصال الرجال هذا الوصف:

" والثاني خفيف النفس فصيح اللسان ياخذ حقه وحق من يريدها"

نحن ما زلنا ثقافيا مجتمعات مشافهة مهما اجتاحنا المطبوع والورق في حياتنا اليومية، وتتأكد المشافهة أكثر فأكثر في الحياة السياسية وفي زمن الصورة التلفزيونية ليتحول السارد والراوي التقليدي للميعاد ليصبح نجم الشاشة الصغيرة سواء كان منشطا أو زعيما سياسيا أو داعية يفتي بعلم أو بدونه.

من الظواهر التي وسمت المجتمع التونسي لعقود ما بعد الاستقلال، المشهد الفرجوي لخطب الرئيس الحبيب بورقيبة باللغة المحكية التونسية التي ربما لم يكن ليزاحمه فيها سوى عبد العزيز العروي في أسماره وحكاياته. وليس هذا الولع "بالراوي" السياسي إلا تواصل للولع القديم "لخفيف النفس من الرجال وأفصحهم" شعراء كانوا او حكواتية أو جداتنا وأجدادنا.

مما ميز الباجي قائد السبسي منذ توليه رئاسة الحكومة المؤقتة في 2011 هو ميله لترصيع مداخلاته بما يسميه أهل الحاضرة وغيرهم "بتقعيد الكلام" أي الاتكاء في سياق حديثه على بعض الأمثال والعبارات التي تحيل على صور من الخيال الشعبي وإن كان أقرب لجيله منه لجيل الشباب الحاضر. وهذا الأسلوب مثلما  يرى فيه "أنصاره" جانب مُلحة ومثيرا للإبتسامة أو الدعابة وربما السخرية، يرى فيه "خصومه" ومنتقدوه "هراء شيوخ".  مهما يكن من أمر، ولعل المشهد الافتراضي الفايسبوكي أكبر دليل، يحتل "التنبير" في ما يتبادله ويتقاسمه رواد الموقع الاجتماعي المنزلة الكبرى، فجائزة "أكبر نبَّار" كانت من نصيب أشرسهم وألذعهم سخرية وتهكم بيق تراب بوي صاحب مدونة إكسترافاقانزا.

في خطابه أمس يوم 2 مارس 2013 بقصر هلال، أماث الباجي اللثام عن جانب آخر من استعماله لتقعيد الكلام باستشهاده بأبيات للعرف الشاعر الكبير أحمد بن موسى شاعر بلاط أحمد باي الأول، اقتطفها من محل شاهد "نوصيك ها يا بن العم" في رده على حركة النهضة. وهنا يربط قايد السبسي الخطاب السياسي بتقاليد السجالات الشعبية بين الشعراء المعروفة بالأحرش، وفي هذا تصعيد نوعي في الجدل مه الحركة الاسلامية، هل سيستطيع "خطباؤها" الرد مع العلم أن أغلبهم سكرم بكرم لا يفقهون كوعو من بوعو في هذا الملعب ما عدا عبد الفتاح مورو غير أني لست واثقا من تبحره ولو بدرجة قليلة في الشعر الملحون.

محل شاهد

(على خاطر رضيت بالهم واهم ما رضاش بيَّا)

نوصيك ها يا بن العم***اذا قبلت مني الوصية
تندم وما يفيدك ندم***وتكبار بيك القضية
باريك من الصلها ذم***ترميك في مهمهية
تزوجتها عرة خدم***وخليت حرة صبية
ربيتها بخير ونعم***وحطيتها في الثريا
كبر راسها ودارت خشم***وولات تحمق عليا
نستاهل الكي بعظم***بكراع شاة الضحية
ونستاهل نموت بالسم***ونندق بالشاكرية
على خاطر رضيت بالهم ***والهم ما رضاش بيَّا 

وينها؟ (الهادي ڤله)

وينها...؟

المتنوّرة بالفجر ساطع على جبينها

ريم الديار ومروّضتنا بعينها

ويا صايـبـين الماس وبالفزع رادّينها

رانا كما خيالي الحروب منتظرينها

بلادها الغنج والدلال

زينها ممدود حلال

سرّها ساكن في البال

ريحة راحتها موّال

لفتتها صعبة المنال

وأصل الحشمة دينها

***

وينها...؟

المتنوّرة بالفجر ساطع على جبينها

ريم الديار ومروّضتنا بعينها

(ويا صايـبـين الماس وبالفزع رادّينها

رانا كما خيالي الحروب منتظرينها)

***

لا تبخترت كعبتها

ولا لحقتنا رنّـتها

ليل مع نهار مستنّين طلّتها

حتى النجوم... والفلك...

***

 

من غيبتها هايمة...

الشمس والأزهار...

تحتار...

وتعدي دهرها قايمة...

ومهما عزت خطوتها...

ومهما زادت وحشتها

والاّ غابت صورتها...

زعما الكلام يشينها؟

***

وينها...؟

المتنوّرة بالفجر ساطع على جبينها

ريم الديار مروّضتنا بعينها

(ويا صايـبـين الماس وبالفزع رادّينها

رانا كما خيالي الحروب منتظرينها)

***

يا ربي يا مجيب

سمّعها أنة الحبيب

يا رؤوف ويا عاطي

ندعي لك ... نشكي لك

والراس واطي

ارفع آهاتي

واجمع زفراتي

لملم فنوني

ودموع عيوني

وصلهم ليديها

باللطف.. يا لطف..

أنا مستنيها

واجب ما بيني وبينها

***

وينها...؟

المتنوّرة بالفجر ساطع على جبينها

ريم الديار مروّضتنا بعينها

(ويا صايـبـين الماس وبالفزع رادّينها

رانا كما خيالي الحروب منتظرينها)

شاهي خيالها

متوحش كمالها

متشوق لبريقها

ومجهّز الركب والزمان

والصبر والجاش والحنان

والصدى رنّان

في القلب والبال...

زعما الڤمرة وينها؟

***

وينها...؟

المتنوّرة بالفجر ساطع على جبينها

ريم الديار مروّضتنا بعينها

(ويا صايـبـين الماس وبالفزع رادّينها

رانا كما خيالي الحروب منتظرينها)

محمد الدغباجي: 1885-1924 جو خمسة يقصّوا في الجرة وملك الموت يراجي

من الخاصيات الفذة للشعر الشعبي أنه يوثق الأحداث اللي تمس الناس في الصميم، و الشاعر يتوصل بشاعريته أنه يعطي لهالأحداث البعد اللي يتجاوز الحدثية و يدخل بيه التاريخ ةو يبقى بفضل هالبلاغة و الخيال الشعري راسخ في الذاكرة أجيال واجيال.

شعر المعارك أو كيف ما هو دارج عند الشعراء شعر الخطاري(ج خطرة) أو الملاطم (ج ملطم) و معناها المواجهة من الأغراض اللي خذات مكانة في فترة المقاومة للاحتلال الفرانساوي و تواصل مع الحركة الوطنية باستمرار حتى أوائل الخمسينات.

الملاحم اللي ارتبطت بمحمد الدغباجي في المعارك اللي خاضها مع الفرنسيس عديدة، غير أن تبقى القصيدة اللي توصف ملطم مخزن مطماطة من أرقى ما تقال الشيء اللي خلاها تبقى على الألسن و في الذاكرة الجماعية. من سوء الحظ أنه شاعرها اندثر ذكره في القصيدة و ربما كيف العديد من القصائد المناهضة للمستعمر تستر اصحابها تحت غطاء التنكر خوفا من 404 متاع هاك الوقت اللي ما يكتفيش بالجلم وانتقامه غاشم.

جو خمسة يقصوا في الجرة*** وملك الموت يراجي

و لحقوا مولى العركة المرة*** المشهور الدغباجي

***

فزعوا خمسة بربايعهم*** تايجيبوا الفلاَّقَة

مخزن مطماطة ينجِّيهم*** لثرنهم بنداقة

الكيلاني يتحلَّف فيهم*** بحلالة و طلاقه

الدَّالة الفلاَّقة نمحيهم*** في واسع رقراقة

ضربوا الخمسة وحبوا إيديهم*** زفُّوا زفْ تلاقى

كذب الوسعة يقصر بيهم*** زي هدير الناقة

تاو ان يتلاقوا يقضيهم*** بوسربة شلهاقة

زي الذيب يمزِّل فيهم*** ويلالي ويهاجي

كان التل يخبَّر بيهم*** وجواب البسطاجي.

***

فزعوا حمسة فوق حصُنَّة*** من مخزن مطماطة

وقالوا هاهي الجرة منا*** وجَوا في اوّل شوَّاطة

الدَّغباجي قاعد يستنّى*** طاح لهم وتواطى

فيده ستوتي يلدغ سِمَّه*** دار فيهم شاماطة

صُبْعَه والقرَّاص يلمَّه*** يعجل ما يتناطى

واللي ينُوشَه يا ويل أمَّه*** فاح قتار اشياطه

يجي مرمي مصبوغ بدمَّه*** سِمْ منحَّس لاطه

مسَرْجِي بيت النار بضمَّه*** وشُغْل الحربي ساجي

ومولاها كبير آصل وهمة*** وعنده الكيف مقاجي

***

نهار الخمسة لحقوا خمسة*** و للهم حامي ربِّي

صباح إلْ ما زرقتشي شمسه*** اللي يقتُل ما يدِّي

يا لاحق مكناتك همشة*** ظنِّي فيك مغدِّي

اللي يصبح منكُمْ ما يمْسَى*** الدغباجي متنبي

سرجاها بستوتي نَمْشَه*** لقداهم متفاجي

معاها يتكلم بالرَّمْشَة*** ويحكم بالكِفاجي

***

جو خمسة يقصُّوا في الجرة*** و ملك الموت معاهم

راميهم شيطان بشرَّه*** على تبزيع دماهم

قِرْحوا يحسابوها غِرَّه*** يتبشروا  بملقاهم

وقت ان شبح العين تعرَّى*** تَكـُّوا الخيل قداهم

والدغباجي فيده حُرَّة*** يسربيلهم في عشاهم

سرجاها وخرجت عل برَّة*** في المِلهاد اخذاهم

دوَّفْهم كيسان المُرة*** موش من القهواجي

الخمسة درجحهُمْ في مرة*** لا من روَّح ناجي.

جو خمسة يقصوا في الجرة*** وملك الموت يراجي

و لحقوا مولى العركة المرة*** المشهور الدغباجي

من الأرشيف. ضجر: وين يجي، خارج الدنيا

الدنيا هاذي سبيطار، كل مريض فيها مسكون برغبة تبديل سريره. واحد يحب يتوجع قدّام السخان، و لاخر ماشي في باله اللي ينجم يبرى قدّام الشباك.
يظهر لي اللي نبدا ديمة أحسن في البقعة اللي ما نيش موجود فيها، و هالمسألة متاع التنقيل، ما نفكش من المناقشة فيها مع روحي.

أحكيلي يا روحي، يا عقاب روح باردة مثلجة، آش رايك كان تسكن في لشبونة؟ ممكن ياسر تبدا دافية و تتنعوش فيها كي الزرزومية. هالبلاد جات على شافة الماء؛ و يقولو اللي هي مبنية بالرخام و أهلها من حقدهم للخضار، قلعو الشجر. هاو منظر على ذوقك، بكله ضوء و معدن، و السايل باش يعكسهم كي المرايا!
روحي ما تجاوبنيش.

بما أنك تحب الراحة، مع فرجة الحركة، تحبش تسكن في هولاندة، هالارض المباركة؟ بالكشي تتفرهد في هالبر اللي كنت ديمة تعشق تصاوره في المتاحف.
آش قولك في روتردام، ماك تحب غابات صواري الشقوفات المرسية عند سيسان الديار.
روحي تقعد بكـّوشة

ربما تتبسملك بتافيا أكثر، و نلقاو فيها نكهة أوروبا متزوجة بالجمال الاستوائي؟
حتى كلمة. زعمة روحي ماتت؟

للدرجة هاذي جمدت و ماعاد يعجبك كان العذاب اللي انت فيه؟
إذا كان هكـّا ، خلـِّي نهربو للبلدان اللي هي و الموت كيف كيف.
–راني نشد في كلمتي، مسكينة يا روحي!
نلمو دبشنا و نقصدو طورنيو. و الا حتى أبعد، لطرف البالطيك؛ زيد أبعد أكثر من الحياة، كان ممكن؛ نستقرو في القطب.
غادي الشمس ما تكهب عل الارض كان مايلة، و زيد تبديل الوقت ثقيل بين الضوء و الليل، ينحي لذة التنويع و يزيد في الكبي، هذاكة نصف العدم… غادي، أنجموا ناخذو حمّامات دحمس طويلة، و باش نتفرهدو، تبعثلنا فجريات السمية ساعة ساعة، حمالي ورودها، كاينها مرايا من نيران شماريخ جهنم.

عند لاخر اترشقت روحي و بكل رصانة صاحت: ” وين يجي! وين يجي! باسطة لبرة من ها لدنيا.

ترجمة عن شارل بودلير

Nous n'abandonnerons pas!

Chokri Belaid

Assassiné depuis le 06/02/2013

Qui l'a tué?

qui a tué C. Belaid.من قتل شكري بالعيد

من قتله

Qui l'a tué

كه او را كشته

Who killed him

谁杀了他

Кто убил его