شكون آنا...

(ترجمة حرة عن جازية سعيدان)

شكون آنا... من غير سِبَّة ولا خانة

تصير، سابق معرفة؟ سيقورو أكيد ....

صدفة حلوة  كانت ملقانا في ثنية والا على غير ثنية ؟

ممكن حكاية غريبة وما طلع عليها الصباح؟

نلوّج على بصيص نور...

تشيرلي، نسيّب روحي ليك

باش نخبيك، نتقِّي شقايا

وين الملجى؟ حكاية !

إسمي اللي تحبُّه... في المجهول مدفون،

هكـَّه ما تعرفني شكون

أش قولك كان نعكسوا الادوار

تعاودش المشهد من قريب جهار؟

تبدانيش بهمسة من غير كثر عبار

إيجا واحكيلي، وانسى العقل والحكمة

صحيح، حديثي موشي ليك، أمَّا  باعثُه لافَّـادك

والخوف سكن رهبتي ووجايا

أمَّا الروح عاشقتك بلا نهاية

Ubiquité.

مشكلتنا والا نكبتنا والا عبقريتنا والا منتهى انفصامنا والا تضبيعتنا... الناس الكل مسلمين والا كفرة والا ملاحدة والا ماصونيين والا متأسلمين والا معتدلين والا نعرفو نغطصوا حوتة لا والا سوري وساقينا بالريش والا عربي باللية والا بلدي ولو زيت دُردي والا تركي وعلى راسُه ريشة والا اندلسي ويخدم ناغرزان، والا جد بوه الاولاني مملوك من جنوة وتباع في البركة ووللى إميرلاي في سراية حمد باي، والا من سلالة دريد ورياح والا من اولاد الزازية، والا مماتٌه الكاهنة وعمُّه جوقرته والا أمازيغي بو على الجد، والا يهودي من أمُّه وخبَّاو عليه وقالو اللي هو من القوييم باش يزاحمش اخوالُه في الورثة...

مشكلتنا وعبقريتنا كيفاش نبداو في نفس الوقت في 25 ديسمير و في غرة شوَّال وفي 12 ربيع الأول، وفي 14 فيفري، وفي 10محرّم، وفي غرة افريل، وفي فاتح رمضان، وفي 10 ذو الحجة و و و الحاصل كيفاش نبداو غادي وهنا والبارح واليوم وغدوة وفي العير وفي النفير ودار الشراب ودار القـ***اب وفي المزدلفة وفي بيغال ولاص فيغاس في نفس الوقت....

سرابات تهاويد العمر

عدِّيت من العمر دهر
جُلت بين الثنايا
وبين الأوعار المنيعة
وبين السهول والشعاب والبساط الوسيعة
وبين تلافيف الأفكار
ومااندس في الذاكرة وقت كنَّا صغار
وبين المراسي
والشواطي
ومتڤيات القرى والدشر
عاليات الحڤف والجبال
وغارڤات الخنڤ 

ومهاميد توحش الڤلب وڤفار
نبحث على وطن في غارق الوجدان 

نبحث على ضميدة لجرح في الحشاء ما بان
نبحث على خرافة سكنت الذّات 

من وقت ما كنَّا صبيان
ضاع العمر يجري وسط متاهة
وراحت الايام سارحة وراء ترنيمة
ومهوى جبالي بين الارياح يجاوب صداه
 وسرابات من تهاويد العمر والصغر الغالي

خَبِّيلي بوسة يا بلادي

خبيلي بوسة يا بلادي
يجيء وقت وين يحلى البوس
خبيلي من سحرك ذكرى
تذكـّرني في حلمة هربت
نلقاها من بعد سنين
في اولادي والا في احفادي
كي حبة زريعة ثمينة
كي خجلة عشق مخبية
كي وصية جدة على فراش الموت
كي كلمة بين شهقة ودمعة
كي لمسة ورعشة كي همسة
كي خرافة ولد السلطان
كي عروبي تهاويد الليل
كي عيون بالكحل شفرها
كي ريحة كسرة من فريقا
خبِّيلي بوسة يا بلادي
وصية ليك بعد منامي
امانة اعطيها لاولادي.

Revendiquons une subalternité productive!

Il se confirme jour après jour, génération après générations, que les acquis mimétiques techniques, scientifiques, cognitifs, et culturels que nos élites et une partie de nos sociétés s'"approprient" momentanément de la modernité occidentale, ne sont opérants dans les processus de développement et de modernisation que marginalement; juste ce qu'il faut pour maintenir "la poule aux œufs d'or" -que sont devenus nos pays- continue à survivre, bien entendu sans le moindre espoir d'accéder ni à la démocratie, ni à un développement alternatif et autonome du mode de production capitaliste.
Ce n'est pas la fausse alternative -laïque VS islamiste- non plus, qui va nous faire sortir du merdier...
Donc vos gueules les corbeaux!!!

عيش بالمنى يا كمُّون.

طول حياتهم، والحكاية عندها أجيال وأجيال، والتوانسة وين ما يمسّحوا عليهم في اتجاه وبر ظهوراتهم، يبداو يستحلاو ويكرُّوا كيف القطاطس: 

• في التوانسة ذكيين، 

• في أنهم أكثر العرب تفتح،

• في أن نساهم متقدمات ومتعلمات ومتثقفات، 
• في أنهم أولاد قـ****اب ياسر على التزيرية والليبية والمغاربة، 
• في أنهم عندهم أكبر ميزانيات العرب والأفارقة للتعليم،  
• في أنهم متربيين ياسر في بلاد الهجرة عند الروم والعرب والعجم والهندوس... 

الحاصل تهيؤات على مر السنين ولات قناعات لدرجة أنهم جد عليهم اللي هوما عملو حاجة إسمها ثورة .وجد عليهم اللي هوما ينجمو يشدو الصف قدام الكوش، وجد عليهم اللي بنجمو يعيشو من غير بوليسية وأمن وشرطة مرور ونجدة في الآيامات اللي بعد 14 جانفي...

وتجيك الأيام وتكشفلك اللي الحكاية بكلها مؤامرة كبيرة تستهدف الحط من غباء هذا الشعب الطيب الفحل.

ريحة السخاب (2)

"الرجال تتلاقى والجبال ما تتلاقاش" قعد من المثل هذا كان معناه السلبي بين الناس واتنسى الجانب المزيان اللي فيه واللي يعطي بالمجد معنى كبير للصحبة اللي تلم الرجال بقطع النظر على أصلهم وفصلهم وثروتهم وجاههم وسلطتتهم.

أهل النوايا الطيبة في مثلث سوق السرَّاجين وباب منارة سوق العصر يضربو الآمثال بصحبة سي عبد الواحد وسي حفَّة وسي امحَمّد وسي مصطفى، ويبداو يتندرو بعقداتهم وتفدليكهم وضمارهم والربطيات اللي يعملوها لبعضهم وضحكاتهم اللي تتسمع من قهوة بن عزالدين والا من قهوة التواتية قدام تربة بوخريصان. وامالي انوايا المقعمزة ما يخلِّيو ما ينبرو على أش جاب البلدية للجريدية وللدويرية وآش جاب المتغلمين للأميين وآهل المعرفة والصنايع للقهواجية والحمَّالة وهات وهات من هاللاوي متاع الغيرة والشلال من حلاوة قعداتهم ورتبة خديثهم اللي يجتمع فيه الشعر وفوندوات المالوف والغناء الزندالي والشوارعي ومحلات الشواهد وسير العنترية وذات الهمة والظاهر بيبرس والزازية الهلالية واحمد بن موسى وتونين المالطي...

الصحبة بين الرجال ما تتحكمش فيها الحاجات الملموسة والمادية واللي تتوزن بوسخ دار الدنيا.. نفوس تميل لبعضها البعض لدرجة اللي تنسي الخو في خوه والصغير في بوه والغريب في أهله واماليه..

سي عبد الواحد الغانمي مكهب على الخمسة وسبعين عام من عمره: أمَّا ما زال شادد روحُه نظر ماضي وسمع مرهف وفكر متوقظ وقلب طري كيف فريك اللوز، ولسانُه أخضر بالطبيعة موش قدام ولده سي محمود، كل حاجة في بلاصتها. سي عبدالواحد سليل عائلة اندلسية قعدت محافظة على أنسابها من الجدود الأولين في حياتهم في الاندلس، في شاطبة حتى كيف هاجرو في  دواير 1620 بعد ما صدر قرار الطرد في حقهم عام 1609، قعدت الأنساب والماخذات بين بعضهم من أشد الحاجات اللي تجمعهم وتلمهم وتربط الصلات بيناتهم . دار الغانمي جمعو خبرة جدودهم في الفلاحة والعود والكردون من شيرة، وزادولها صنعة الورَّاق الشاطبي وفن الخَط. صنعة الورق دخلوها من باب التجارة كيفها كيف حرير الدودة اللي جابوها عائلات أخرى أندلسية من طرق التجارة مع برور الهند والصين جاوا وسوماترة.

كيف دخلو جدودهم الأولين في اول القرن سبعطاش، الشيرة والمشورة عند النساء الحراير حمَّالات سبايك الذهب والفضة و الصياغات الزمنية ومفاتح الديار، والراي لحلقة الرجال.

بعد ما استقر حالهم عند البعض من اللي سبقوهم من أهالي اشبيلية وشاطبة دلوهم البعض على زوز والا ثلاث سواني على مجردة موش بعيد على طبربة، شافو وقلبو ونشدو واسترشدو وعزمو وبعد ما استشارو الحراير، شراو وكتبو  وكانت عفستهم الأولى في تراب المحروسة ترشيش.