jeudi 19 janvier 2017

نا داي مالبراد وفناجيله







حديث يجبد بعضه حول هدية التاي والسكر والفحم لين وصلنا علر معتدلات موازين البيع والشراء في التاي واليكر.
التاي عنده زوز ثنايا ثنية شرقية وهي مصر بنغازي طرابلس جربة وطريق غربية عبر طانجة فاس مكناس الدار البيضاء مراكش. وعلاش الزوز ثنايا هاذم؟ على خاطر المصدر اﻷساسي هو تﻷنقليز من شيرة جبل طارق ومن شيرة اخرى قناة السويس. وهذا يرجعنا لخط الكبانية الالبريطانبة للهند الشرقية اللي كانت مسبطرة على التاي من زريعته لتجارته لطيابه.
التاي خاللنا من الشرق كيف رجعوا المهاجرين من القبائل التونسية اللي ثارت في وجه فرانسا عام1881/1887 من طرابلس وزاد تقوى وقت ما هاجروا الطرابلسية على إثر ثورة الاحتلال الطلياني وثورة خليفة بن عسكر وسليمان الباروني. وخلطلنا من الغرب على طريق المغاربة اللي جابتهم كبانية صفاقس قفصة باش يخدمو في مينة المتلوي ودوايرها وكانوا عندهم حومتهم كيف ما كانوا للطرابلسية والسوافة والقبائلية حومهم. وبسرعة وللت حشيشة التاي من أهم السلع متاع الكناترية كيفها كيف حشيشة الدخان وحشيشة التكروري، وبكلها حشائش كيف وتعمير راس. وقال المثل: "راس بلا كيف يستاهل السيف"
بسرعة كبيرة وللى التاي والسكر ومعاهم البهارات والافحات كيف القرفة وعود القرنفل ( اللي كانوا من الواردات متاع بلدان آسيا) من أهم قلمات التجارة والتوريد عند اليهود من شيرة وعند الجرابة من شيرة اخرى. كانت الحشيشة تجينا صبة في صنادق كونتربلاكي متاع ميترو مكعب تقريبا، حشيشة صبة خظراء وحمراء كمية أقل تجينا معلبة تحت علامة ليبتون Lipton  تعرف بتسمية تاي انقليز. السكر يجينا من البرازيل وكوبا على طريق العمالقة الفرنسيس السافرير Saint Frères في شكاير بيض قماش وثمة نوعية تجينا مهارس في شكل قوالب مخروطية (coniques) مغلفين في كاغط أزرق حباري ومربوطين بالخيط ومكشتيين بتيكة حمراء. التاي ما يحلى كان باليكر مهارس اللي يتكسر بمطرقة صغيرة نحاس...
----- 
الحداثة موش كيف يتحلولكم كارفور وجيان ويشريوكم في اللي يحبو هوما موش اللي تحتاجولوا انتم، الحداثة كي تعرف منين جيت واش قاعد ترهز في هاادنيا هاذي اليوم.