mercredi 24 avril 2013

نواصي وعتب والبعض من الذرِّية



موش منّك يا البيَّة موش منّك
موش منّك،
نواصي وعتب والبعض من
الذرِّية

***
موش منك يالهذبة
موش منّك
نواصي وعتب
والبعض من أولاد الغلبة
الي باعو ضمايرهم والقلب
لاولاد القـ....بة
موش منك يالهذبة
موش منك
يزي على عيونك والدمعة
نواصي وعتب
والبعض من أولاد الكلبة
***
موش منك يالشهلة
موش منّك
نواصي وعتب
والبعض من اولاد الهملة
خُلْطة هزتهم وجرَبْ
في إيدين الطمعة واللقمة السهلة
موش منّك يالشهلة
يزي من الشهقة والغصَّة
نواصي وعتب
والبعض من اولاد هاك العملة
***
موش منك يا خضراء
موش منك
نواصي وعتب
والبعض من اولاد القهراء
لآنتِ بعثتيهم لكن هزّتهم نعرة
يجرى اللي يجرى
موش منك يا خضراء
يزي من الحسرة والعبرة
نواصي وعتب

والبعض من الخِلفة المُرَّة

lundi 22 avril 2013

حواسة في الفايس بوك بين العروش و الجهات


من أرشيف خيل وليل بدون تحيين


في القديم تخطيط الحاضرة يرضخ لعادات معمول بيها و قوانين تخللي الناس حسب أصولهم و الجهات اللي جايين منها يتتلموا مع بعضهم ربَطـَّات )أرباض) و حوم. اللي جايين من فريقا يلمهم ربط باب سويقة و ما جاوره من الالبيقة و الحفير وباب الخضراء وباب الأقواس وباب سعدون،واللي جايين من قبلة و الساحل و الدخلة يلمهم ربط باب الجزيرة و ما تابعه لباب منارة و المركاض و المر والحجامين والمر وسيدي منصور. برغم اللي نلقاو بغض الاستثناءات كيف الرحيبة و القعادين و ترنجة اللي هومة محسوبين على ربط باب سويقة و لكن فيه وطنوا القوابسية و الحوامية و المطاوة.

ما عليناش، الموضوع أنه الناس تحاول تعاود تبني شبكة الولفة والعصبية البدائية المفقودة بسبب هجرتهم من قراهم و دشرهم في الفضاء متاع الحاضرة ( و الموضوع تحدثت عليه بأكثر جدية هنا) و حتى من بعد كيف توسعت المدينة للأحياء الطوب و الميلوسي من السيدة للملاسين و الجبل الأحمر و الطيارات و برج علي رايس و الكبارية في الثلث الثاني من القرن الفايت، قعد تقريبا هاك الاتجاه سايد بين الناس لين وليت تلقى حوم في هالأحياء الجديدة تلم ناس من جهة وحدة و الا عرش واحد و الا دشرة وحدة....

الحدَاثة اللي ترى كيفاش و أحياء التهيئة العمرانية المنظمة متاع السنيت والمنازه و المروجات مشكات الكوارط تمشكية اللي ما عادش اتقابل هاك الحاجة اللي كانت في السابق، و زيد القفزة الاجتماعية و اختلاط الأنساب خلى هاك العصبيات القديمة ما عادش نافذة المفعول، في وقت اللي الهجرة الغصُّوبي اللي تصبت في التضامن و البودربة و النقرة وغيرها قعدت فيها العصبيات القديمة ما زالت ماشية.

الناس تخلطت و معادش حوم كي بكري بالخصوص في البني العمودي متاع البلاصات، والصغار ما عادش تلعب في البطاحي و الزناقي كان فيما ندر، و كبرت أجيال على هالوتيرة وصارت الصحبة تتطلب على شبكة العنكبوت في المواقع الاجتماعية، فيها الصحبة اللي حقانية و متاع معرفة سابقة، يما أغلبها معارف افتراضية من نوع صاحب الصاحب و معرفة المعرفة ومحل الشاهد اللي الالقاب و الانساب قعدت و قعد معاها أسامي العروش و الصنايع و البلدان، الشيء اللي خلاّني نعمل حواسة بين العروش و الدشر ما بين أصحابي في الفايس بوك.

عندي يا سيدي بن سيدي لحد الساعة –وكل ساعة و علمها- 502 من الاصحاب بين عرب و عجم و ترك و طرنج كيف نطرج منهم غير التوانسة يبقاو: 457 فيهم 53 نكرات بأسماء مستعارة تبقاو 404 فيهم و نبداو بالعروش:

الهمامة:13، ورغمة،: 7، المرازيق: 5، ولاد عيار: 4، مزوغة، رياح، ماجر، وسلات:2 لكل فرقة، فطناصة، ورتان، نفَّات، ولاد منَّاع، ولاد عون، الحنانشة، المثاليث، السماعلة، المطماطية، الغدامسية، السنوسبة: واحد واحد، إيجيو في الجملة: 48.

انجيو للبلدان والجيهات: تونس:.3، الساحل:36. صفاقس: 29. جربة: 17. قابس، ةبنزرت 9 لكل بلاد. القيروان: .، الوطن القبلي: 7. جندوبة و الجريد: 4. القصرين، بوسالم، باجة، زغوان: 3 لكل وحدة. ماطر، تكرونة، تالة، المهدية، سبيطلة:2 . المجاز، الكاف، قعفور: 1. مجموعهم يجيو 206.

أمَّا بناي عمي الدويرات:23 فيهم الفراب ياسر كيف بناتي و أولاد أخوتي و أولاد عمي القراب و فيهم اللي تربطنا قرابة العرش الكبير متاع الدويرات.

الحسبة الكل تطلع: 277 كيف نطرحوهم من ال 404 يبفاو 127 اللي ألقابهم وما تنجمش توجه بشكل ثابت و صحيح لبلدانهم و الا عروشهم.

برشة من الأصدقاء يحملوا لقب سعيدان ماهمش بالضرورة من الأقارب و الا من الدويرات. الأنه اللقب هذا منتشر في قصر هلال و الفحص، والقيروان، و غمراسن.

هالتدوينة ما عندها حتى مغزى و الا نعرة متاع جهويات و تفرقة بين عرب و أمازيغ كتبتها بلهجتنا في قالب تفدليكة و نزولا عند رغبة البعض من الأصحاب و الأقارب ما يلزمش تتحسوا منها، هاو عطيطكم الصياغة بالدارجة التونسية

samedi 13 avril 2013

دروشة: الحمَّاص روح وسكر كل باب



سر الحديث يا سامع ليه اسباب
وحلو الكلام معروف لأماليه
ثم اللي ملافظـُه أحلى من كبَّاب
وثمة اللي الشوك في لغاويه
أصل السبب جبناه بالتجراب
على اللي السّم يقطر من سنِّيه
عطاه الرب والعرش حل الباب
نكر الخير على اللي فرحو بيه
يهدد ويتوعد كاينـُّه فدار قحاب
نصب المشانق جاء يهدد بيه
زاد المقاصل  زعمة قرى الكتاب
وتاريخ الفرنج حافظـُّه راوِيه
صارلنا من جديد من جملة الكلاب
ينبح لاجل سيَادُه المقطرن والسفيه
كشاكشـُه رغاوي  لين شاحلـُه اللعاب
يهدد في اليطاول واللي ضحك عليه
***
فاتتكم يا سادة ليلة الدخول
لا عندكم علينا لا حكم لا جواب
حكم الباطل راح لا بقالـَه قول
والحمَّاص روَّح وسكـّر كل باب.

jeudi 11 avril 2013

Violations of freedom of musical expression in 2012





Freemuse annual statistics:


Freemuse has compiled statistics presenting a glimpse of the situation for musicians worldwide in 2012.
A total number of 173 cases of attacks on musicians and violations of their rights have been registered. The cases include 6 artists being killed, 14 imprisoned, 2 abducted, 12 attacked, 5 threatened, 16 prosecuted and 84 detained, as well as 34 cases of censorship.

Please note that the documentation is representative of cases registered by Freemuse. The cases found the basis for the statistical compilation and include cases in more than 30 countries. The statistics were compiled in February 2013.

This is a geographical presentation of musicians who were killed, attacked, abducted, threatened, detained, persecuted, imprisoned and threatened or subjected to censorship. Click on the image to open PDF. (Right-click to download).

Right-click to download PDF file
The following principles of statistical registration have been used:

If a musician is threatened and attacked while abducted the case is only listed as “abducted” in the statistics. If a musician is detained, prosecuted and then consequently imprisoned for the same incident of the violation is only listed as “imprisoned”. Artists who were imprisoned before 2012, but who are still in prison are only included in the statistics if their case was reviewed by Freemuse in 2012.

“Attacked” refers to an artist being physically attacked.

“Censorship” mostly includes songs or artists censored on radio stations or artists denied permission to hold concerts, but also incidents such as destructions of music shops. (The destruction of several music shops at the same time is only counting as one incident.) People being attacked or killed because they were listening to a certain kind of music are also regarded as a “censorship” incident.

The statistics do e.g. not include the serious situation for thousands of musicians in northern Mali, who are prevented from performing their music due to bans by Islamic fundamentalist rebels.

mercredi 10 avril 2013

وآش اللي حرڨ شعيرك نعاسك ارتحلك من شڤاء تدبيرك


يا بلاد تلڤي الهناء في شخيرك
وآش اللي حرڨ شعيرك
نعاسك ارتحلك من شڤاء تدبيرك
***
تلڤي الهناء في الرڤدة
واش لزّنا نجرو ونفارعو في الصَّعدَة
نعاسك ارتحلك من الشقاء والكده
لاتخممي في مصيرك
ولاتفكري في الجاي واللي بعده
اللي عاش عاش واللي مات لاش يضيرك  
***
تلڤي الهناء وتتَّكي
لا تفرحي ولا تحزني ولا تشكي
نعاسك ارتحلك من الشڤاء لا تصكِّي
لاش تسألي على خميرك
لا تخبزي ولا تعصّدي ولا ترُكِّي
لا كبير  عليه تنشدي ولا على صغيرك
***
تلڤي الهناء  يا جارة
لا تڤلڤي على ليتام لا محتارة
 نعاسك ارتحلك من الغزُّول يا بهبارة
لا تسألي على غيرك
ليام زي الحبل عالجرَّارة
كما نسيتها تنساك يوم رحيلك.
***
يا بلاد تلڤى الهناء في نومك
أش لزّنا نحمل ثڤل همومك
آش لزّنا نعشڨ ونفني العمر فحب عيونك
أش لزّنا ندخل اسواڨ مبيعك
وسوڨ النخاسة صارو اسيادها تڤَوٍّدك وتهونك
 اللي أمس كانو أقَل من  عبيد عبيدك.