jeudi 31 octobre 2013

ما عجبكم لا بوسعدية ولا تسرافيلت ما ملالكم عينيكم كان هالـُّوين....






المجتمعات متأخرة والا متقدمة – وهذا ما عنده حتى معنى في موضوعنا- كلها في حاجة لتعديل والتحكم في مخاوفها البدائبة والقديمة هاك المخاوف اللي تكونت مع ولادة المجتمعات تكونها والي تحمل في طياتها ميثولوجياتها وخرافاتها وأغوالها واهوالها. كيف تقول غناية مسرحية القاسم عزا زهاك العام:
حكاية ناس بكري
الغنيا والكبار
كي يحبو يربيوا اصغارهم
و يحللوا عينين كبارهم
وينبّهوا النَّاس من الأخطار يخرفولهم عالغولة....
التحكم والتعديل (Exorcisme) ياخذ عدة اشكال من السحر والطلاسم للعزيمة واستحضار الارواح للحجابات والتمايم والودع والفاسوخ والحضاري والشطحات وغيرها. كل مجتمع يجبد كذلك من عروقه ومن هاك الشخصيات اللي تم التوافق عليها باش تكون هي سلطة التعديل والتحكيم (Exorciste) في الطقوس  والرموز والمناسبات اللي يتم فيه لمَّان المجموعة وادا كان ثمة دبيحة والا قربان والا اضحية والا فدية والا وعدة والا غيره من الهدايا اللي يامَّا يتفاسموها الناس ما بيناتهم والا يهديوها للكاهن والا الرهبان والا الولي والا الزاوية والا لآلهة معينة.
من طقوس ورموز التحكم والتعديل في مخاوفنا في بلادنا زوز عناصر رمزية يتلاقاوا في صيفة الغيرية الأقلية (L'altérité minoritaire) هالعناصر هوما من شيرة البوسعدية وتسرافيلت ( ممكن ثمة رموز وعناصر أخرى في جهات متعددة من البلاد ولكم ما تعرضت لهاش). البوسعدية في الأصل تابع للأقلية الزنجية أمَّا ما عنده حتى علاقة بطقوس الغناء متاع السطمبالي المرتبط بروحانيات المنحدرين من الأصول الافريقية الغير مسلمة في الأصل واللي اختلطت بروحانيات الصوفية الشعبية الاسلامية في تونس. البوسعدية رقصة شارع وساحات في المدن والا في الأرياف والراقص اللي يكون في العادة زنجي يبدى متنكر ووجهه مخبي بقناع يخوف (ماسك) من الجلد ولبسته متكونة بن جلود حيوانات كيف الذيب والضبع والسفش والقط وغيرها من الحيوانات البرية، وعلى رآسه طربوشة متكونة من خليط من الحاجات وتكمل بربطة من الريش كيف ريش النعام والجوارح والا ريش سردوك. البوسعدية يكونوا زوز واحد بضرب على طبلة والآخر يلعب بالشقاشق ويكونوا يغنيوا ساعات غناء مسرح وساعات عجمي مغلق. المهم في هالحكاية هو أن البوسعدية كانوا يخوفو بيه الصغار ويربطوا شخصيته بحاجات مرعبة فريبة من حكايات سلال القلوب وما شابهها.
عند الأقليات الأمازيغية ( وهوني كيف نقول أقلية نقصد بيه الأقلية اللي عندها وعي بروحها اللي هي أمازيغية واحنا نعرفوا اللي الأمازيغ في الحقيقة يكونوا أكثر من 80 في الميا من اهل جزيرة المغرب) نلقاو شخصية تشابه بعض الشيء لبوسعدية يسميوها تسرافيلت اللي من أهم وظايفها إثارة الخوف عند الصغار وكانت زادة تثير الخوف حتى عند الحياوانات. الشخصة هاذي زادة مرتكزة على استعمال لبسة تنكر واكسيسوارات من جلود حياوانات وغيرها تشكل برشة غرابة في خيال الصغار.
محل الشاهد مسألة التحكم وتعديل الخوف نلقوه مشترك في أغراضه وفي عناصره وفي أكسيسواراته تقريبا في كل المجتمعات... إمَّالة فاش قام علينا نقوموا نجريوا نقلدو في غيرنا ونتسلفوا من عندهم في خُـوِّيفتهم بعد ما سلمنا في خُوِّيفتنا......
حركة المحاكاة والتقليد اللي متمكنة بالمجتمعات المتأخرة، وبالتحديد المجتمعات متاع العرب اللي بعدوا على "بدائيتهم" واللي يظهرلهم اللي هوما قربوا من "الحداثة"، على خاطرتكونت فيهم طبقة وسطى قارية ومتعلمة وموش بالضرورة متثقفة، خاصيتها إنكار الذّات لأن الذَّات ما ترضيش وبالعكس الذَات تنقص من قيمة الآنا الجديدة اللي ماخذة عناصرها من الآخر اللي غلبنا في السابق. وبن خلدون موش قال ولع المغلوب بالغالب.
برَّه يعطيكم غلبة على ما علـَّبتوا علينا لا عحبكم بوسعدية ولا تسرافيلت وما تعرفوا كان حيني وطارت عيني نحب كان الهالوِّيني.

بين الشاعر أحمد البرغوثي ووالده حَمَد بن سالم البرغوثي


محاورة بين الشاعر أحمد البرغوثي ووالده حمد بن سالم البرغوثي الذي يشكو تصاريف الزمن الرديء، على إثر  مروره بمرحلة عصيبة من حياته
يقول حمَد بن سالم البرغوثي لابنه:

عدِّيت عمري بزهو الخلاعة
جوني بطاعة
ولا شربت عمري ف ارض النجاعة
***
عدِّيت عمري
فايام بكري بميزان فكري
ومن غص شارق يجيني لوكري
نشرك ونرقع بحرير عكري
واته الرقاعة
وليوم  عدنا غزايل بضاعة
***
ليوم عدنا غزايل وعيفة
خليقة شفيفة
وكل حد صايل علينا بسيفَه
منين كان وقتي طبله نزيفه
يرعب صداعة
تحلق وتفرق عليا الجماعة
***
عدِّيت عمري منين كنت غالي
شادت افعالي
عيشة نقاتي قمح الدوالي
واليوم هاني ملوح لتالي
نفوني الجماعة
صلاة النبي ردُّوها نزاعة
عدِّيت عمري منين كنت غالي
شادت افعالي
عيشة نقاتي قمح الدوالي
واليوم سيدك ملوح لتالي
نفوه الجماعة
صلاة النبي ردُّوها نزاعة
***
عديت عمري مع كل قايد
لي شوايد
نصلّح و نرقّع في كل بايد
اليوم عدنا صرب الصرايد
في ملح قاعة
يا عقاب عمري وين المناعة
***
قدَّام أهل الجمايل يجوني
شادوا فنوني
مطاليب ندفع عليهم عيوني
واليوم هاني لابس ثموني
طلبت الشفاعه
غلينا رخصنا على دور ساعة
-----
يجيبه ابنه أحمد البرغوثي
يا سيد اصبر على داك دسَّه
بالك تمسّه
وأياك مضرب محير تمسَّه
بالك يشنشف غديرك وتنسى
نهار العجايب
يوم المكاره علينا حزايب
***
ياسيد اصبر على ضيم حالك
نوصِّيك بالك
هادي ......
يغفر سوالك
ولا عشت لازم تروّح رجالك
توفى الشغايب
وتنسى  وجايع سنين الجدايب
***
يا سيد اصبر وطاوق الشدة
راهي تتعدَّى
ليام تنقال رده برده
أحسن بنادم لا كان عندَه
يدير الصوايب
وحتَّى المكاره توللي حبايب
***
يا سيد اصبر وعدِّي الغباين
المبتور كاين
عمرك تعدَّى مع الغير هاين
اليوم لسمك وسع الخباين
يدل الذهايب
تبدى تصاريف وقت الغرايب
***
يا سيد هالوقت ماهوش باهي
ناسه دواهي
وما عدت توجد عل العين ماهي
نوصيك كانك اتدوّر وشاهي
تخطى المصايب
بأفلاك بين الحفي و الرطايب

vendredi 11 octobre 2013

حجة مباركة...



في نهاية الأمر، الحج كيف غيره من الشهاوي والرغبات ما تاكل كان ما يكتبلك وانت وقلبك ونيتك كان جاي تلعب في ورقة دونية مع ربي ممكن ياسر تتكعبرلك وكانك بحقيقتك وينيتك الصافية يرزقك ربي منين ما كنتش حاسب حساب... في المعتقد الشعبي العلاقة مع المولى كيفها كيف العلاقة مع العبد النية الصافية والحقيقة يلزمها تكون ثابتة وما عليهاش غبار...
الحديث اتجبد على حكاية الحجاج اللي اتربق عليهم المنداف وحصلوا في الترافيك متاع الباسبورات من كلمة لكلمة وصلنا لحكاية ما تاكل كان ما يكتبلك واللي نيتو ناهيش صافية تتكعبرله، لين وصلنا لحجو مباركة...
مباركة مرى زوالية وناقصة سمع – ربما ربي نعم عليها بالطرش باش ترتاح من برشة كلام موذي- تتعارك مع الدنيا وتخدم في الديار صوابن و ماعون وعولة وكساكس ومحمص وحركة عروسات وفروقات وطهورات الحاصل صبلـَّة من الصباح للليل. جابتها الاقدار والمحاين تخدم في دار اختي من جملة الديار اللي تخدم فيها، سناوات وهي تجبد من شونها وتمد لاختي هاك الضمة بودينار وتقوللها خبيهملي كان طعمني ربي نحج بيهم.
مباركة راس هم، عرست عرفي من واحد كان يخدم في كبانية بن قالمة، سوكارجي ذوقها في حياتها أنواع المرار اللي عوضلها بيه نعمة الطرش اللي منعها من عم لسانه المرزي... سي "راجلها" – كان صح التعبير- نهار اتضرب عي حادث مرور تقصف في عمره أمَّا بما أنها لا صداق ولا دفتر عائلي ما عندها ما صورت، كان كمشة مجهولة مدوهالها اماليه زادتهم لهاك الصويردات اللي تخبي فيهم عند أختي.
أية جات لاختي وتفقدو هاك التفتوفة لقاوها توصلها باش تنجم تحج، قالتلها هات يا مباركة عندكش ورقة والا بطاقة تعريف والا مضمون باش نطلعو الباسبور؟ قالتلها ما عنده شيء!!! طلعت مباركة عبارة على شخص ما عندوش وجود بين الناس... آش تكون يا مباركة؟ قالت من اولاد عيار كتبولها مطلب لرئيس بلدية مكثر فيها اسم بوها واسم امها يلوجو يلقاوش أثر ليها في دفاتر الحالة المدنية، ما عطى حتى نتيجة.
مشاوا للجماعة متاع "راجلها" يسألوا كيفاش سبتها، قالولهم اللي الحكاية ترجع لأول الخمسينات كانوا هاك الجماعة يرجعوا من عكـَّارة نزحوا مع جملة من نزحوا وقت معارك احتلال تونس في آخر القرن 19، يقيموا ويحطوا لين استقرت بيهم الدنيا في مناقع الشرقية توة نصبو خيمة وبناوا قرابة وقعدوا يفلحوا في معمرة ويربيوا في هويشات. الحاصل واحذ منهم نهار سارح بالسعي لقاها (وهي صغيرة) في وسط  الغنم تاكل في الحشيش، سخفه حالها روح بيها وقالت لهم اللي لماليها من أولاد عيار حطوها تخدم في بعض الديار في أريانة، أمالي الدار عاملوها معاملة مشومة هربت وخرجت هاية على وجه الارض ومن الجوع بدات تاكل في الحشيش  إحسب راهي تفكرت التالمة والقيز وقرن الجدي وغيرهم من الحشايش اللي كانوا الصغار ياكلوهم وهوما سارحين مع السعي...  وقعدت معاهم بره بره قالوا لولدهم علاش ما تاخوش مباركة؟ وهكاكة  مدُّوا يديهم وقراوا عليهم الفاتحة وولات مرته...
مشاولاولاد عيار للمعتمدية متاع مكثر وبزوز شهود وجري وبالحباب والكباب الحاصل خرجولها مضمون.
هاو من جملة الديارؤ اللي تخدم عندهم واحد يخدم في الداخلية، عطف عليها وجرالها باش خرجت في القرعة متاع اللي باش يحجوا وجرالها على الباسبور وخيطتلها أختي درابو تونس على حوايجها على ما ياتي تريحش في هاك اليم متاع العباد. وشيعوها للمطار ووصَّاوا عليها اللي باش تركب معاهم وقصدت ربي وحجّت وفي الحج تعرفت على راجل قعد لاهي بيها طول مدة الحج والمناسك متاعه وروخوا مع بعضهم ودبرت الحجّة والراجل اللي كان هجَّال وعرس بيها بعد مدة وعاود حج معاها مرة أخرى على طريق البر من تركيا وحوست في هاك البلدان ورجعت وعاشت معاه اللي عاشت حتى لين توفى وقعدت في الدارلاهيبن بيها بناته...
وما تاكل كان ما كتبلك.

lundi 7 octobre 2013

بعد مولى السالف مرصوع : أحمد البرغوثي


ميزان بورجيلة مردوف

بعد مولى السالف مرصوع ** عليه ذابوا لانجال دموع

****

عل زول حبيبي يا شيبي يا كبر نحيبي وأريافي 
مكبر تعذيبي و تعطيبي يا قلة طبي واسعافي

ساموري خافي ما خافي جا بين ادفافي واكتافي
من وحشه هافي بري على برّا مقطوع

بعيد مولى السالف مرصوع

****

من وحش الغالي تذبالي ذوبان انجالي بالعبره
 كيفاش جرالي ها رجالي ناي حاسب روحي باش نبرا

نيراني كبره ما تبرى بو مضحك نبره ذا خبرا لا واجد صبره
لا عايل صبره لا صايب تالاه رجوع

بعد مولى السالف مرصوع

****

لا صايب طلّه نوصلّه مبروم الخلّه و نشوفه 
تو عام بكلّه نتقلّى دموعي منهمله مذروفه

و كبدي ملهوفه مجروفه على خاوي جوفه متحوفه
 جتني محدوفه مسي قد المقزون اسبوع

بعد مولى السالف مرصوع

****

سير الهيدوجه المغنوجه جمعة مسروجه قدّالي
 ضحضاح فجوجا منسوجه منه العمهوجه من غادي

جت في لبعادي و حمادي غيمه غرّادي 
في انكادي وصف العرّادي انبات نحلم بيها مليوع

بعد مولى السالف مرصوع

****

وصف المطروده المفروده ولفي الخندوده الجعّاره 
كبدي مصهوده مثروده دموعي ممدوده قطّاره

ناري كبّاره سعّاره من زول دياره و اجفاره
 تكيد الصبّاره المختاره من زوز نجوع

بعد مولى السالف مرصوع

****

خيل الرّيفيّة الشريّة بستاش الميّه رضّاعي 
 جوبات خليّه مقسيّه على غير ثنيّه لكراعي

مدّيت ارباعي فزّاعي يقفز ما واعي زعزاعي 
مربّي بأطباعي ناويته للزّين صروع

بعد مولى السالف مرصوع

****

لا وجّع حيلي يقسيني على جبد اعويني و اعوينه 
فيسع يدّيني يا بيني على ريّة عيني في جهيده

ترجا في مجينا حبيبتنا مالوحش حزينة مسكينه 
ها الدّعوة فينا ناي وولفي مشومنا نوع

بعد مولى السالف مرصوع

****

مشومه كتبتنا وعشرتنا فرقة عشرتنا في ساعه 
بعد ال ودّتنا و اعطتنا هاهي خلّتنا في القاعه

دنيا خلّاعه بلّاعه تذرّي وزّاعه قطّاعه 
 مهره برتاعه فارسها ديمة مليوع
بعد مولى السالف مرصوع

****

ديمة صاحبها لراكبها يعاني في تعبها و بلاها 
 يغرّق مركبها مصعبها مغلوث طربها ببكاها

رانا عشرناها ريناها من بعد غلاها و هناها 
ها مصعب داها نا منها قلبي مليوع

بعد مولى السالف مرصوع

****

ناي منها هافي يا اخواني مدروك انعاني في اوحاشي 
 برد و خلّاني حيْراني شعلت نيراني في جاشي

يا كثر ادهاشي و اهماشي م الحب اهماشي و انعاشي 
 جا بين ارياشي في وسط كنيني مزروع

بعد مولى السالف مرصوع

****

ما بين الرّيشة و الرّيشة حب الدرويشه صاهدني
عاملّي طيشه ودهيشه و أمور وحيشة زايدني

داها مرمدني نكّدني و الوحش جبدني رقدني 
 لا من ساعدني نكتبله روحي مبيوع

بعد مولى السالف مرصوع

****

نكتبله هو بلا مدوّه صاحب لمروّة الحقّاني 
تولّيله اخوّة من توّا و الحب اتقوّى دخلاني

داعي شقّاني و افناني أديب زماني بامحاني
نرتب في اوزاني البرغوثي قولي مطبوع

بعد مولى السالف مرصوع