عندي اصحاب كي الناس الكل،

عندي اصحاب كي الناس الكل،
صحاب قعدة و اصحاب خدمة،
اصحاب حومة و اصحاب مصيد،
اصحاب عشرة و اصحاب اللي ياخذو بقعة الخو،
اللي يفكو من الغلبة واللي عندكش عندي،
اللي من غادي لغادي واللي من العام للعام،
واللي من العيد للعيد و اللي من دفن لفرق،
واللي من خلاعةلخلاعة و اللي من البوف سور لو توا للبلاتزا،
واللي من افتتاح قرطاج للختتام الج س س،
واللي من فرنيساج لفرنيساج و اللي من رموقة لرموقة،

عندي اصحاب كي الناس الكل

اصحاب فايسبوك
اللي يحبوك من غير مايعرفوك
وفيهم اللي بالخير يودُّوك
وفيهم اللي من النقب عليك يطلو
وعلى مع اشكون ترقد عليك الباب يحاـُّو
وفيهم اللي من حيطك يهزُّو الباهي والخايب لا يعياو ولا يكلـُّو
وفيهم النسناس والوسواس واللي ما يحشمش من كلام الناس
وفيهم اللي ينورلك نهارك
و يرد بالو على باب دارك
ويوصي عليك جارك
ويمسح الدمعة من على خدِّك
وكي يشوفك طايح يشيلك من يدك
وفيهم اللي الكتاب يهديلك
واللي يعرف ذوقك وببرشة فيانة يتفكرك وينويلك
وفيهم اللي لا طاح لادزوه يسمع الناس على حيطك الكلام

عندي اصحاب كي الناس الكل.

اللي ما نبيع فيهم وما نشري
واللي في قضيته يجيني بكري
واللي بعضمته يقاقي يجري
واللي كي يتفكرني من نص الليل يبات يسري
واللي ما نخطر على باله كان كي يسمع بي ماشي للعكري،
واللي يقولي مانسيتكش يما البورطابل تسرق،
والنومرو متاعي من ذهنه زلق،
والكمبيوتر بالمايلمتاعي تبلنتا حتى لبن تفلق.

عندي اصحاب كي الناس الكل،

 
نملى بيهم يدي،
ووقت ما ينشدوني تعرف، نقول هذاكة ندي،
واللي بيهم نوللي جدي،
وكيف واحد يقوللي تعرفش حد في الـ.......
قبل ما يكمل نقلو عندي.
***