تايلولت*** او هادوكه هوما اليهود!

كيف القناوية، الكبَّار الموسم متاعه يبدى في هالايام. توة نهارين والا ثلاثة نحكي انا والحاجة اختي من الجملة على هالموضوع وهي مزروبة تحب تروح لتونس من بين الحاجات اللي شاغلتها انها يلزمها تشري عولتها من الكبَّار باش تملحه. وحديثنا مع بعضنا ذو شجون لازم ياخذ ثنايا استحضار العزاز وما كانو يعملوه.
خويا الطاهر -سلام ورحمه لروحه- يسكن في رادس الغابة، كان مغروم بالعصافر والمصيد والتجوال في الغابة اللي محاذية لعمارات متاع منطقته، اكتشف اللي الغابة منتشرة فيها جدور الكبار بكثرة فكان يسرح ايام راحته هو والوالدة سلام لروحها يجمعو الكبّار كعب وورق والقندوز متاعه. والقندوز متاع الكبار يشبه في حجمه الخيار الصغير اللي يخللوه (cornichons). كيف الكعب ورق الكبار يتملح ومن اختصاصات الوالدة انها اطيبلنا الملثوث وترمي في المرقه متاع السقى وريقات الكبار المملح وساعات في بداية الصيف يبدى الملثوث بالفيلوغ اللي حكيت عليه في السابق. بالطبيعة كيف نثيرو هالحكابات نبدى مشحونة ببرشة شجن وذكريات عذبة برغم اللي عيشتنا وقتها صعيبة وزهيدة واكلاتنا بسيطة ومتواضعة اما مع مرور الاعوام واندثار هاك الاكلات نحسو بحنين ليها ونسترجعو مذاقها مهما كان ربما قليل لذة. في حياة الوالدة عولة الكبار من ما تجمعو وهي تستمتع بجولاتها وحدها والا مع اولاد خويا تروح على نفسها وتحس انها تصلح لحاجة تنفع من حولها وتروح بعد كل جولة بصر ة والا مقدار حكة طماطم من حبات الكبار واوراقها وهي اللي تتكلف بتمليحهم بعد ما تنقعهم في الماء نهار والا نهارين يمص مرارتهم ومن بعد تملحهم بالملح الاحرش هي اللي تعرف وقت طيابهم كبف يتبدل لونهم من الخضورية المشعشعة للون داكن .
اما القندوز فكانت تشيحه كيف ما يشيحو القناوية وتخبيه للي يحتاجه دواء. وما تستحقو تهرسو لين يوللي غبرة ناعمة تحطله ما لازمه من العسل الصافي ويتعجن لين يصير كيف المعجون تحطه في داقرة صغيرة والا ماعون بلار يتسكر يتم استهلاك مغيرفات منه للي يتحير عليه العذر.
الكبار نبتة جالية تحب الاراضي المحجرة تنبت بين مفاصل الصخر وحتى في قفون الديار العربي تنبت من زق الطيور اللي تستهلك حباتها.
دواير تونس من سيدي بلحسن وبرج علي رايس والكبارية والجيارة والوردية وجهات سيدي فتحالله المحجرة ومقاطع سيمان الخروبة كانت يكثر فيها الكبار قبل ما تزحف عليها شركة البباصات المسيحيين المعروفة بمين اوزين Mine **Usine اللي مقرها في ساحة برشلونة واللي بعد ما تأممت ولات السوتيماكو. مين اوزين استحوذت بالتثمير الرأسمالي على هاك الهضاب والمرتفعات اللي كانت كوش للجير العربي والبعض منها للجبس باش حولتها لمقاطع ومنها عملو معامل للزليز وشيء لقصان الرخام متاع تالة ومقطع لسيمان الخروبة في الثلاثينات من القرن الفايت ومعمل للبخارة وغيرها... الشيء اللي نتج على تحويزهم قل جمعان الكلار منهم وتحول والا زاد كثر في الخط الغربي كيف في مىتفعات جباس فوق سبالة بن عمار وسيدي ثابت. وعلى ذكر سيدي ثابت تو نهارين صديقنا رؤوف بن يحيى هبط ستاتو على بداية مويم الكبار في سيدي ثابت
https://m.facebook.com/story.php?story_fbid=10214846093533445&id=1459795437
في بلدان اخرى الكبار اصبح تبتة تتزرع ويتجمع منتوجها بطريقة عصرية، في تونس قعدت نبتة تلقئية يسرحواها الجماعة كل حد يقمر البقايع اللي باش يستغلهم . في بدايات القرن الفايت كان من انشطة اهلنا من الدويرات جمعان الكبّار وكان بعض اخر يخدمو في السواني وقت البحيرة والا الكرموس والا العسة والا فيهم اللي يخضرو يحب يقول يشريو صابة على رؤوس اشجارها. مالجملة من النوادر اللي حكاوهالنا الكلار ان واحد دويري جاء من البلاد نزل عند بناي عمو عزاب كاريين وكالة كيف ما نقولو في سوق القرانة يسمع فيهم بحكيو على الكبّار فهم اللي هوما يجمعو قاللهم يحب يمشي معاهم تنقرصو لا محالة اما قالولو ما يسالش يمشي يشري شكارة وفي الفجر يقيموه يسرح معاهم. كان العمل هكاكة اما قامو عقاب الليل الدنيا ما زالت ظلام وما قيموهش وسرحو ناشطين في مشيتهم. تقلب في فرشو حس البيت فارغة قام مرعوب لبس حوايجه هز الشكارة وما قعدله من حديثهم البارح كان وجهة باب سعدون شد الثنية من باب قرطاجنة لباب سويقة والءاهب ينشد لين خاط لباب سعدون عرضو سوناي على جردينة مهبط الخضرة لفندق الغلة:
- صباح الخير يا خالي
- صباح الخير، وين تربح
- ماشي كان سهل ربي للكبار؛ بالله عردوكش جماعة هازين شكاير على دهوراتهم؟*
- عرضوني جماعة يتكمرو كاينهم يهود
- هادوكه هوما اليهود!*
ومن ما رواه الوالد الحاج السلام والرحمة لروحه، ان جماعة اخرين يلقطو في الكبار وفي العادة يقسمو محصولهم بالتساوي، مرة معاهم واحد بوجادي اول نهار يسرح معاهم، تقاراو في مالينهم انهم ما يدخلوهش معاهم وما يقسموش معاه. واحد منهم قاللهم لا وعيب وما يجيش قالوله خوذ بايك معانا وامشي اقسم معاه. كان العمل هكاكة. مشى لهاك البوجادي ياخي البوجادي سأل قريبه:
- ماته آكمَّان؟ ( آش قالولك)
- أمَّانيد ليش سانزون إيدي ( ماناش قاسمين معه)
-إيه شك دماته سنييد ( وانت آش باش تعمل)
- ساداغا الحصتيو اتنزون نش دشكدين ( ناخذ بايي ونقسمو معاك)
-إيزيغ شك إيلان دبرتد( مالة انت اللي دبرتها)
وجبدله من تحت بلوزته صرة مهدرشة وحلها طلعت مليانة فلوس ذهب وقاله لقيتها نحت جدر الكبارة نترته ياخي بانت الثرة في شقاف قلة. حط الثرة والكبار في الشكارة ومن غدوة كرو كريطة وصلتهم لبلاد الدويرات وهنو على ارواحهم يقرضو في هاك الفلوس كل مرة يهبطو قطيعة ليعقوب الصايغي في قابس والا الهير في جربة.
---!ا-------
* الدويرات ما ينطقوش الحروف الما بين الاسنان ( ث ظ ض ذ)
** شركة مين اوزين اغلبية راس مالها من مساهمة ابرشية تونس ما نعرفش قبل والا بعد فصل الدولة عن الكنيسة. اما في العالتين قانون الفصل عمىه ما تم تطبيقه في المستعمرات المقيم العام وحتى رئيس الجمهورية كان يحضر معاهم كاردينال والا ابراشي.

*** تايلولت= الكبَّار بالامازيغية

نهج الحُكـَّام

31

المكي باش يطير مالفرحة، اما وقيلة بوه اكثر منه، لين زعمة كاس التاي مشى ما بين صوابعه من الربثة اللي جاته. شفطه في جغمة . برنامج الصحبي تفرعس، سلم على البياع بالأحضان وسمع منه مخ الهدرة متاع مدير مدرسة المكي، ورجع لعمر وقعد يتخالى معاه، كانك من المكي وينه طار رجليه اعلى من راسه لحوشهم.

الصحبي عبَّى القضيات في شكارة ورماها فوق ظهره وقال لعمر:

- غدوة الفطور ها عمر كلم الجماعة يجيو بكري.

وشد الثنية ومع هذا ما هزش عينيه من الوطى يتمقل تبانلوش جرة حوافر خيل والا روث مشتّع..

***

رجعات المكي بعد مدة قرايته الطويلة في تونس خلقت في نفسه المشتاقة جوع ونهم كبير للدشرة ولاماليها ولاهله واخوته وبالطبيعة لبوه وامه، أما حتى للسعي والكلاب والبقر والفضاء المستاسع وللواد والكدية وجبل المقارح وطوابي الهندي وللكرم وشجرات اللوز وخشة الدجاج وحجل بيشكو كاينه انفاسه تضياق من حومة راس الدرب وبنيها وزناقيها ونظره محصور مقصوف من الحيوط وسمعه مهرج من حس الكرارط والكراهب الماشية جاية في نهج عبد الوهاب وهرجة الكوارجية في بطحة المركاض ورحبة الغنم... 

في القرية حواسه تفيق، النظر يسرح للبعيد والسمع يرهاف للاطيار وللريح في الأشجار وصوت اليمام والمنيار وغنة داداه كيف تبدى زاهية بين سدايتها والا بين هويشاتها... كاينه بدى يحس اللي باش يضيع عليه هالعالم بما فيه واللي حل عينيه فيه وتعوّد بيه، كاينه خايف لا البعض من صغره الهادي المطمان باش يهرب عليه من غير رجوع... 

بدى حاسس بروحه اللي قاعد يكبر وان عالم آخر باش يفكه من هالجنة اللي حاسس بيها تضيع منه كيف حفنه رمال الواد الهارب بين صوابعه... كاينه بين نارين وحدة تحرق والاخرى سخونة...

***

منية قامت مفجوعة على صوت وقاد جامع الجديد يلعلع بصوت يرعب رقود الجبانة:

الصلاة حضرت  الصلاة يرحمنا ويرحمكم الله 
عاودها مرتبن والا ثلاثة وردفها ب"الصلاة خير من النوم الصلاة خير من النوم "، وشخرات قدور المتقطعة فكروها بليالي ما صدقت لربي محاتهم من ذاكرتها... اما في ومية استرجعت ما صار اول الليل واستحلات بدن قدور الدافيء وبعثت الوقاد يرهز وفي قلبها قالتله حتى النوم وحاجة اخرى ما عندك فيهم ما تقول. واقتناعا بالمثل اللي يقول" اللي شنعت تكمل ليلتها"، رخات روحها وحضنت قدور ورشقت بزازلها المبندين بشهوة جارفة في ظهره وفخذها اليمين دكّتُه بين افخاذه وقعدت خانسة تستنى في استفاقة شهوة قدور المكبوتة وعاملة روحها مولى الدَّار موش هوني، بدنها يتوهج رغبة وكاتمة انفاسها بجلد وشيطنة وبركبتها تحاول توصل لمبتغاها تحسش الروح راجعة في غرمول قدور، حست بكرارزه لعّبت عليهم ركبتها لين كيف اللي ضربها الضو وقت حست القُرناب يتحايى، وبشفايفها مسحت على رقبته بحنان ورقة ورمات يدها اليمين على صدره وعدات ريوس صوابعها على حلمة بزولته، حست في بدنه رعشة، وتكسلت الفلقة متاعه بين ساقيه وتغيرت نبرات انفاسه وتسارعت دقات قلبه في عروق المذبح وبلسانها تذوقت شحمة وذنه وزادت بالناب قدمتها جاء باش يتحرك تمكنت من بدنه وبهمسة سخونة قالتله: 
- بسعاد قدور بسعاد،

طاوعها بالسكات وهي طلعت فوقه وقلبته على ظهره برقة ورخات بدنها الضاميء على بدنه اللي يفور كيف الارض البور في اوسُّو والتهمت فمُّه وشفايفه تمص وتقدم بزالها كيف الكور بيناتهم وتحس في حديده يترمى يغفّق يمين ويسار على فخاذها وفي حركته مرات بجي كف وغرزة مع نونتها المعنصلة كيف سنة الثوم، تسارعت انفاسهم و كبر شهيقهم قوست بدنها كيف النشاب وبيدها جبدت نبله و حطته في النيشان والنبي مولاك ولا تخيب قاصدك وبيدها لقات فلسة الفايوزة شعلتها ضوات بدوناتهم نار تسرج وخيالهم مالي الحيط، باين فيه ضل ترمتها المتشنجة طلوع وهبوط فرداتها مفتحة كايني زهرة غريبة من بلاد الواقواق، حست صيحة طالعة من افادها قدمت على شفتها وضمتها على شفته تقنطر بدنها بما في عضلاتها من قوة لذة تزامنت مع الاصوات المرتفعة من الابعاد ومن القريب تكمل في الآذان: " حي على الصلاح حي على الفلاح".

هل توصلنا حقا لبناء ما يسمّى "ثقافة"؟

أعتبر أن مفهوم الثقافة وقع تداوله بصورة مُحاكاة عمَّا هو متداول في الغرب عموما وخاصة في المصطلح الفرنسي، إذ لم تكن هذه العبارة متداولة عربيا بصورة عامة وتحديدا في بلادنا في النصف الأول من القرن العشرين، إذ كان مصطلح "الحياة الفكرية والأدبية" هو المستعمل للدلالة على حركية الإنتاج المكتوب من أدب وشعر وقصة ورواية وغيرها في بداية الأمر ثم تلاها مصطلح "الحياة الفنية" مع ظهور دور العرض على النمط الغربي لمشاهد الفرجة الموسيقية والمسرحية في مرحلة أولى ، ثم فنون الرسم على المحامل والرقص والسينما وانتشارها. ولم يتم تداول مصطلح "الثقافة" بما يحمله المفهوم من معاني وأبعاد معاصرة إلا بداية من منتصف القرن العشرين وتحديدا مع استقلال البلدان العربية، بعد أن كانت تعني طيفا واسعا من المعاني ترتكز أساسا على "الحذق" و"التهذيب" و"التربية" و"التعليم". فالمصطلح المعاصر والشائع في الحضارات الغربية هو نتاج لتراكمات في مجتمع ما تعبّر عنه بعديد الظواهر ويجد فيها جماعيا وأفرادا من عناصر الهوية ما يتميز به وما يميزه عن غيره وما يشعره بالانتماء والتعريف عن ذاته كاكتمال لمكون "الدولة الوطن" حتى وإن كان فيه من العناصر ما هو مشترك نسبيا مع شعوب مجاورة.

غداة الاستقلال في تونس، لم يكن هناك من العناصر الكافية والمتطورة ما يمكن اعتباره "ثقافة"، فضلا عما سبق الاستقلال من مرحلة تعسفية طالت الحريات الأساسية بالرقابة على الصحف والمنشورات. كل ما في الأمر هو شتات من الأنشطة الموروثة عن المرحلة الاستعمارية كمدرسة تونس للرسم، والإذاعة والمعهد الرشيدي وبعض الفرق الموسيقية والنحاسية والمسرحية والنوادي الأدبية والجمعيات كالخلدونية وقدماء الصادقية وبعض الرابطات الطلابية . كل هذا لم يكن له من الوزن ما يمكنه من بناء نسيج عناصر الثقافة. الثقافة  كما نُلاحظها في البلدان الحديثة، يُستنتج أنها نسيج متعدد المكونات، مترابطة فيما بينها بأبعاد نوعية في أغراضها، وأزمنتهت، وفضائاتها اي انه بإمكانها اختزال الأزمنة وتقريب الأماكن ومزج الأنواع تتخاطب في ما بينها عبر قنوات عدة.

في السنوات الاولى من الاستقلال، وبعيد فترة قصيرة من الاستبشار بالحرية، سرعان ما زُجّت البلاد في صراع "اخوي" وضعت شقا من التونسيين وجها لوجه مع شق آخر استيقظ على إثرها عفاريت الفتن القديمة "يوسف وشدّاد" وحسينية وباشية... كانت هذه الفترة اقرب منها لتفتيق مواهب النعرات الانتهازية منها لشحذ همم أصحاب العزائم الصادقة من كتاب وشعراء ومبدعين. كانت اقرب منها لحرب مواقع للاستيلاء والسيطرة على مواقع النفوذ في ما كان يبدو مراكز "إشعاع ثقافي"(الاذاعة، مصلحة الفنون الجميلة، الموسيقى، المسرح) هذه المراكز التي ستصبح مجالات نفوذ تتحكم فيها ومن خلالها الدولة لتتحول الى مجالات توظيف سياسي. وفضلا على عدم تحركها وتفاعلها في ما بينها كنسيج متكامل ومتداخل متفاعل، ضلت هذه المكونات في قطيعة تامة مع المجتمع مواصلة القطيعة القديمة التي ميزت وطبعت العلاقة بين الخاصة والعامة لا في بلادنا فحسب ولكن في اغلب البلدان العربية، عاشت فيها المجتمعات والنخب بمختلف توجهاتها ظهرا لظهر وفي تجاهل تام، يسود علاقتها في ما بينها العنف الصامت أو الصاخب في شكل حملات عقابية بدعوى تأديب "المفسدين في الأرض والسوقة والرعاع". وكما كان الخلاف البورقيبي اليوسفي أيضا، تعلة لتغييب المجتمع عن مواقع القرار واعتباره قاصرا، سيتواصل هذا النهج على اثر المحاولة الانقلابية سنة 1962 بالحد من حرية الصحافة والتنظيم السياسي بمنع الحزب الشيوعي التونسي. ولعل خاصية عشرية الستينات كانت التضييق التام على كل ما هو مختلف وغير " منسجم" ومنضبط مع توجهات الحزب الواحد والفكر الواحد والرأي الواحد. في هذا الرحم الغير متوازن، وفي العلاقة معه، ستنشأ اغلب مكونات ما سينعت بثقافة السبعينات، والتي نعتها بالعرجاء لعدم توافقها فيما بين مكوناتها، وتواصل قطيعتها مع المجتمع، وتجاهلها التام لمكوناته التراثية المختلفة والمتنوعة، وعدم استشرافها لما يهز العالم من متغيرات هائلة. فكانت في اغلبها تتحرك في تجاهل لما يحدث حولها وقبلها وبجانبها تستمد كيانها وشرعيتها من الدولة وتاتمر بأوامرها او تحيا بما تمن بها عليها لمواصلة بقائها في حالة "حياة سريرية"

نهج الحُكـَّام (30)

ما هوش ناوي على الدوة، وهي ثمّه حكاية تتحكى؟ خيل وفرسان وغيم يرڨى للسماء... على شكون باش يجد هالحديث زعمة. ماهوش ناوي على الدوة وطاح راح. 

من بعيد نڨرته ريحة الحشيشة الانڨليز اللي يشوي فيها الحوانتي على الملال؛ حشيشة حمراء رڨيڨة كلما زادت نارها كلما زاد طلع خنارها؛ ثمة الِّي بالبونتو يهز على راس المغرفة شفطة يرميها على النار باش " اسمع ياللي تسمع راهي حشية انڨليز طابعها صيد ومزروعة في سيلان!

باللازمه لوكان تبدى مزروعة في كيَّان ماشيلها ماشيلها. هاذية اللي باش يعدل بيها راسه. نسى ما كان يجول بخاطره، ما ثم حد قدام الحانوت، 

- صباح الخير آه عمر

- صباح الخير آه الصحبي، زوز؛ تربح وين زينه على لفجار؟

- مخطر ان شاء الله خير، ماشي نروح بالتفل المكي.

عينين الحواتني ضوات وتبسمت؛ زعمة كان غايضه كاس التاي اللي باش يعطيهولو، توة كيف اللي رضى علي، ما دام باش يروح بنوارة الدشرة .

-هاو الاخبار السمحة. زوز اشرب كويس تاي وربي يسهل في المخطر.

البراد حده حد عمارة ثلث وميا وما يتحملش الزحمة. دخل الصحبي لقى كرسي الحديد المربع اترخى عليه.

شاتي يفضفض وما عينه في كثر نشدة. جبد عقاب الباكو الأرتي جبد السيڨارو مرسو معسو تحّى منه حطبة والا اثنين وقعد يستنى في شفطة التاي باش يشعله. عينيه شابَّه في السهل اللوُّطي.

-         إلاَّ ڨولِّي ها عمر...

وسكت يستنى في هزّت راس الحوانتي يفهم خزرت عينيه آش مدرڨه عليه. عمر قعد غاطس في تعديل البرَّاد قاتل الغرزة ما هوش جايب خبر.

-         إلاَّ من بكري ڨلتلي واشي أ الصحبي؟

-         واش اللي ڨلت ليك أ عمر؟ نسأل على هالبرّاد...

-         يَرررّه حتى انت باش تلعبها علَيْ نَا؟

-         يا راه حتى شيء، البارح الكلاب تتنابح في نبيح كبير، قلت بالكش ثمش منهو صادر والآ وارد ألله واعلم منين ولوين. والنبيح ماهوش على حثرة تراسة، وما تنجم تكون كان على راكبين زوايل والعلم هند الله...

الصحبي يحكي وعمر يمڨّـل في وجهه ويتمعّن في المحكاية، لين شوية برك لا تسى البراد اللي فاحت ريحته و عقد سكره ولا تخيب قاصده والآ طالبه.

-         عندك البراد ها عمر

-         والله ڨلت الحق، زعمه باصيتنا في طرفت الحشيشة في جرة حكاية الكلاب النابحة والنجوع الراحلة.

واطى البرّاد حط الزوز كيسان قدّامه كيللهم حكارهم ومدله الكاس وتبسم من عينيه وهو فاهمه علاش يمشي وعلاش يجي.

-         شعّل هاك القارو واجبد شفطة وما تشغلش راسك بالمكي. المكي وين يحب يعيش يتعلى على اللي دايرين بيه الكل. لا تم نجوع نعدت ولا فرسان ركضت.

-         ملة حشيشه شعرة وملى هي يا عمر. كان جت تحت ايدك منها خلِّيلي ولا حتى نصف رطل لنجاح المكي.

-         لآ هاذيكة عليَّ نا وما يشاركني فيها حد أنت عليك على العلوش والأراخ.

غاطسين في كاسهم ل علم ليهم لا دراية لين ضربت زمارة البوجو 203  متاع البياع تلفتو لين نڨز الشنتي المكي من الباب ...

نهج الحُكـَّام (29)

عامين غيرو من حياة المكي ظاهرُه البراني وخلَّاو حبات رغبة إكتشاف الدنيا اللي ابعد من خط الافق اللي يشوفوه عينيه من علوة دشرتهم في الدايرة المحيطه بيه. عامين كانو كي المنامة بالنسبة ليه اما كانو رزان على بوه وامه واخوته النساء والرجال.

المكي هو آخر العنقود قريد العش يدخل روحه في كل شيء في الدار في السواني في السعي في حساب العطار... وزاد كمل قرى وربح عامين... وين يمشي بوه للحانوت، يتمكنو بيه وقتاش باش يروح المكي؟ ياخي باش يقعد غادي؟ وبوه ساكت ويرد بتبسيمة ما يعرف معناها كان هو والمكي. 

ليلة في اخر ايامات الربيع، قمرة  ليلة نص متاع ايامات مَيُّو، الحال بدى يدفى، نهارتها شره على وكلة يحبها المكي، الشعير جا صايب والعام راوي بخضاره ونواره. والنهار اللي قبله تشارك هو والحوانتي في علوش ما غلقش عامه، جروه على الطول كل حد خذا شطر الحوانتي خذا الراس والكرعين والجلد وهو خذا الدوارة. روح بيهم وطلب على البوتشيش. ياخي المرى قريب تغششت قالتله نعملو البوتشيش والمكي موش هنا؟ بالحباب والكباب باش رامت اما زمزمته بيمين لا تذوق منه! كلم وحده من بنانه مشات حلبت البقرة باش تروبه لللبن لغدوة.

الحاصل بوتشيش من شعير العام وخضرة العام وعلوش العام  ما ناقص كان المكي... جاء حاجة نهاية عطاها للقصعة لين كسحت. وثقللها باللبن والزبدة. في اول الليل حس روحه متقلق شرب كأس تاي وزعمة باش يتكى، حاول حاول النافع الله يا حلبة! ما فاقش بروحه كيفاش غفى، ما يتفكرش قداش نعس عاهده بروحه عينبه تلصلص... وها الخيالات اللي هست على خاطره، قام فكره موغوش، الناس الكل رقود. رمى البرنوس على كتافه وخرج من الحوش، القمرة كاملة وداير بيها هالتها، مشى خطوات لين ما فهمش منين جاء هالسحاب وبدى يضلل على القمرة، ظلامت الدنيا وفرفر فرق طير ما عرفوش اشنوة لين غبرت الدنيا اللوطه في اول الشعبة وهالسرية خيل وفرسانها مدربة وراء اقليدهم ما فرزش هيته! رجع على ثنيته للدار باش يجبد المقرون، دخل للبيت جبدُه من المعلاق، كسره دك كعبتين حربي وسكره وهو خارج ويسمع في الصوت ينادي :" هيا يا مكي هيا لوقتاش تستنو"! زاد اتخلج وخرج ما في عينه بلة، ما خلط لباب الحوش لين تقشعت السحابة وضوى الليل وبات الحس تلفت يمين ويسار كايني يكذب! دار بالحوش وصل للكوري تفقد الكلاب لقاهم راقدين قريب يتكلم بينه وبين روحه! رجع على ثنيته ومن التوغويشة شبر في السماء ونوض الوجهين تفجعت الكلاب جوه يتجارو يرحبو. 

استعوذ واسنغفر وبرة عاد تو لمن باش يحكي هالغريبة ومنه باش يصدقه؟ قعد مشوار على حجرة الرومان لين هفت وبينه وبين روحه قال غدوة فيها مدبر حكيم.

قبل ما يغمض عينيه، قراره خذاه. غدوة يشد الثنية لتونس وغدوة يفصلها مع البياع بالتي هي احسن وكان لزم يمشي للمعلم والا للمدير. المدير سي البشير قابله مرة وحده. راجل طيب افاقي لا محالة مهدوي اما يلح عليه باش ما يكسرلوش خاطره.

سي البشير عطية وهب حياته لتربية الاجيال زعمة يسيبله المكي باش الله واعلم يقيده في هاك الاجبال برة وين باش يلقى مدرسة.....

طاش النوم من عقله، مرة على ليمين ومرة على اليسار، عاهده بروحه يتقلب لين سمع صيحة السردوك هز الغطاء من على راسه شاف الدنيا غبيش، تكسل وتململ وقام تلف بالبرنوس خرج قاصد الشعبة اللوطية وبدى يقص في الجرة، طلع هبط يمين يسار يهز في الحجر يثبت في الحشيش الصايف شيء...

هو مطبس ينسنس لين زعقت شهلة مرته: تي فاش تلوج على الفجار آش ضيعت؟ من غير ما تلفت شيرها بما معناه اسكتي عالروحك. في الريح لا حوافر ولا روث ولا ججر مشتع. رجع للحوش قعد نادى لشهلة وقاللها اللي ماشي لتونس باش يروح بالمكي. طقتها هي بتزغريطة على الافجار. نهرها وقاللها اسكتي اخي عندنا طهور؟

جابتله فطر ما كتب عمل شربة در بايت حامض يروي ويقوت وشد الثنية للحانوت يعرضش رفيق والا زايلة والا كريطة توصله لطريق يعرض التونزيان.

اعطيني قرطلتي ما حاجتي بعنب

يقول المثل الشعبي : "إذا طاح الشرشور باريك من القشور" والمقصود بيه في الخريف، كيف تهبط الغلة اللي كي الشرشور: عنب ولمسية ورطب ورمان ما يلزمش الواحد يقعد يتبع في القشور ( دلاع وبطيخ). 
بالطبيعة هذا وقت اللي كانت الغلل في فصولها موش كيف ابامنا اللي نحبو بالسيف نهبطو العمب بلاش قلوب (حقة حقة القلوب يقلقو) في عز جوان وجويلية حتى كان لزم نستورد العود من ايطاليا والا من اسبانيا على حساب العود المحلي وربما تكون شتل جينبا مبدلة وما انجموش نقراو العواقب متاعها على الاعواد والشتل المحلية.
البلدان اللي تحافظ على ترابها موش من الغزو العسكري والا الارهاب اما حتى ضد الغزو الزراعي والنباتي.
ما نيش من الدخلة والا من فريقا والا من رفراف وما عندناش اصول فلاحية اما كبرت وحليت عينيا على اربعة اشجار في بلاد قاحلة اما عام المطر تعطي اروع الغلل: الزيتون والكرم ( التين) والنخل والعنب. كبرنا على تنوع طعمهم ولونهم وحجمهم ووقت طيابهم ووقت ذكارهم وتشريح الكرموس وقطعان البلح والرطب والتمر. العنب عندنا اغلبه ذواقة ما بين عدد من الزبتون والكرم والنخل تلقى عنبة والعنبة عندنا ارضية ماهيش معلقة عنبها جيد معسل يخلف حموضة لذيذة في اخره.كنا نخافو من العنبة على خاطر ما ينجمش الواحد يعرف آش تحتها من هوايش اصالي ولفاع. اهلنا الكبار يعرفو يحيروهم باش يخرجو ويخليوهم ياخذو بايهم معاهم في عناقد عنب.
شخصيا عرفت العنب في الكبر اعوام اللي خدمت كاتب هباط في سوق الجملة المنصف باي. كنت نخدم في الثلاثة شهر متاع الصيف نخلطو على بدو العنب في اخر اوسو اللي يدوم 40 يوم . خدمت في اول الستينات عند هباط طليان وكانت ما زالت الفلاحة الطلاين والفرنسيس. 
كيف يوقف الشاري على صنادق اي غلة ما يقولش قداش العنب والا الكرموس والا النزاس اما يسالو بقداش المقرقب والا الزيدي والا السلطاني والا الفتني والا الرزاقي والا المسكي... شتل تونسية فيها اللي تركبت وتحسنت فيما بينها واللي تحسنت بالتلقيم متاع اعواد طليان. في هاك الوقت كانو يتسمى العنب على رفراف وراس الجبل وسونين والعالية الحاصل مرابع الاندلس وبتسمى على الدخلة قربة وبير دراسن وبني خلاد ومنزل تميم . وأنواعه المحلية هي المسكي متاع رفراف ومسكي التونسي والمقرقب والرزاقي والشتلة الطلبان تسمات مسكي طاليا وثمة انواع اللي تبقى للزبيب وهي من اختصاص مناطق الاندلس الزبيب العسلي الجيد والزبيب الغليض الحموري. الجيد للطياب في الكساكس والا في تشكيلات الفاكية ( نوعية اندثرت من جراء التوريد من تركيا وايران) والخشين من اختصاص الكعاكة يهود والا مسلمين يستعملوه للبولو في الغالب. وكذلك ثمة العنب متاع الداويرات الصيفية في سواني الدخلة اغلبهم للاستهلاك العايلي وكذلك دوالي الواحات في قابس والجريد والزارات وقفصة وجنانات صفاقس وما جاورها اللي نلقاو فيها برشة عنب اكحل وحموري من نوع بزول خادم وامثاله.
العنب يتفرق من بعضه باربعة مكونات: المطعم من اوله وما يخليه في اخر الفم. ولحمته مكبدة والا ذوابة والا نوقة والا حلقوم. والقشرة ملسة سلسة حرشة كيف الدباغ والا غليضة لا تتمضغ ولا تتبلع. والقلب عظمي عاتي تحت الضرس والا لين يتبلع بسهولة والا بكثرة في الكعبة والا قليل وخفيف عشرة يتهروش بين الكعبة واختها. وثمة خاصية ناس تحبها وناس ما تحبهاش هي رد الفعل متاع الكعبة تحت الضرس هاك النوع اللي يختص بيه المقرقب ويبدى طرشاق في الفم مع كبر الكعبة يعطي احساس ايروسي في ماكلته اللي تبدى بملامسة الكعبة الكبيرة بالشفايف وتعمل دورة في داخل الفم كايني حاجة جنسية وتنتهي العملية بين الزروص بترشيقة وبعدها انسياب متاع عصير يروي وكانها لذة شبقية. كيف ما عند تذوق الرزاقي اللي موش مستانس بيه لازم يشرق من شدة حلاوته...
كيف ما عناصر التراث الغير مادي الفلاحة ومنتوجها واستهلاكه مكون ورافد اساس من بلورة الهوية الوطنية، التركيز على عنصر جيني كيف تنحي القلوب مسح من خيال ومعرفة الاجيال الجديده برشة معارف ولذة ومتعة وعلمهم الكسل كيف كسكروت الشاورمة بلحم القطاطس.
يقول المثل الفرنساوي الوظيفة تخلق الجهز حولوه بطريقة تحويل وجهة حتى وللى الوظيفة تخلق الحلاوة. (L'orgasme) . احنا في جرة الحلاوة ميش الحلاوة الاخرى، يظهرلي ضيعنا الوظيفة.

خبّيلي على ما ياتي

خبيلي في شونك فرحة 

والا سرحه 

والا حتى فكرة صغيرة

نلقاها مرة في منامي 

ونتفكرها كي تجي قدامي

خبيلي حاجة من ذاتك 

طول حياتك 

نلقاها كي تظلَّمْ الايام

بعد اعوام 

كي نشوفك تزهالي الدنيا 

وتترادع كنّي في منام

خبيلي حتى بالكذب 

بلاش سبب 

بلاش حب

بسمة وضحكة وشرهة قلب

تضحكلي ايام حلوة 

ممكن توه 

والا حتى بعد اعوام