أحمد ملآك: أصل الغنا...

الغرض :أحرش

الميزان مسدس

أصل الغنا عِشرين بمعَانيه *** وزيد أربعة ثانيه

ما كانشي سوق الغنا باريه

***

أصل الغنا عشرين في الترتيب *** وزيد أربعة تقريب

ما كانشي باريك كل صعيب

إنبيني على وغد ليك قريب *** تصـــونـــه وتحظيـــه

واذا طابت ثمرتُه تهديه (1)

***

أصل الغنا عشرين في الطرقات *** وزيد أربعة بثبات

ما كانشي اخطاك مِ الحيلات

انبيني على وغد وين يبات *** يبانلك تشبيه

يولد وليس يِرَضَّع ذراريه (2)

***

أصل الغنا عشرين في التدريق *** وزيد اربعة تلحيق

ما كانشي اخطاك م التزنديق

أش الذي ينصاب فصل الضيق *** والقلب يفرح بيه

والرُّوح معَ النفس ليس فيه.(3)

***

أصل الغنا عشرين يا فهَّام *** زيد اربعة بتمام

ما كانشي باريك كل دحام

اذا ريت واحد يكون ولد حرام *** راهو يكون سفيه

واجب عليك تقوم وتخلـِّيه
***

 أصل الغنا عشرين يا فطـَّان *** وزيد اربعة تَمـَان

ما كانشي ما تكونشي خرنان

اذا جيت تبني سبَّق السيسان *** في البني كون فريه

تخاف م الآعراف كيف تجيه

***

أصل الغنا عشرين في التمثال *** وزيد اربعة بكمال

ما كانشي خـلــِّي البلآ ينزال

ملآك بمدفعي زلزال *** بالدوبلي مـــاليـــه

واللــِّي يقرب ساحتي نكويـــه

حل الألغاز:

(1): البنت عند زواجها

(2): الحيوانات الغير ثديية

(3): المال