ما تستغربش
كي غدوة يقولولك
راهو مشى
بدّل البلاد ونسى
باع اللي فوقُه
واللي في الخزاين
والتفاتف حطها في شكارة
للقاطة الخرد
***
متتشغلش كي تلقى الباب مشرع
والبيوت سقف وقاعة
والحيوط عليها بقايع التصاور
وما قعد من الروايح
كان ريحة الجافال
وباقي القريزيل
من الدرجة الثانية
***
ما تذرفش عبرة كي تلقى المحبس شايح
وعود الفل جرات في غصانُه الموت
والقفص الزاهي بدا ينخره الصديد
واصحنة الموزيكا ماشية دقداق
والسبابل تقطر حسها حزين
والبلار مغبش بعطاين السواقر
وجوابي المحبة نشحت وبيرها وسَنْ
واشجارها اذبالت وطيورها جلات
***
ما تلعنش الوقت خاطيه هالبلاء
ما تسبش ما زلق من الكلام الموذي
اللسان موش عظم يقول الشيء وضدُّه
خللي قلبك هادي ما تزيدش على اجراحو
جرحين إذا تلاقو يتلمو على بعضهم
واجراح على جراح يزيدو القلب ليعة
زُنْ غناية حلوة وانسى الحلم الماضي
نا داي يا حنيني معاشر العمر.
Aucun commentaire:
Enregistrer un commentaire