قدَّاش، قدَّاش؟

قدَّاش يلزم من أجراح

قدَّاش من ضحايا في اكفانهم

قدَّاش من أتراح

قدَّاش من مواجع يحمل هالوطن

باش ترضو يا نُكـَّار، يا ريوس النعامة

يا زارعين الشوك

على مسرب السلامة

و مرتع اليمامة

يا مكسرين اقلالنا

وقلوبنا عطاشا

ونسيم الأمل تلاشى

---

قدَّاش يلزم من أمل منكوب

وقدَّاش من حلم مصلوب

ومن عشق بحبل القهر مغلوب

و قدَّاش من نبتة فكرة

كانت نطفة فتقت في عقولنا

نرمي عليها اللعنة

ونمنع عليها النعمة

ونغُمّها بذايب الرصاص؟

وقدَّاش يلزم من فحل فنَّان

لمعة خاطفة تنقصف

بالغصب، بالظلم، بتنغيص الحياة

بقطع النفس بلا حس

بالجوع بالحقرة والعبرة

والعيشة المرة؟

قدَّاش، قدَّاش؟

لتو ما شبعتو؟

لتو مامتلت بطونكم وبشمتو؟

قد ما ملينا القصعة

واصباعكم ما لحستو.

***

آه يا قلب مذا تتحمل

آه يا عين مذا تتأمل

و يا روح الحرة

زعمة قدَّاش من زفرة

ومذا يلزم نتحمل

من حرقة وحرارة دمعة

ويا روحي مذا يلزمني من خفقة

وترنيمة وترين وشهقة

باش وطني يزيان و يبقى

***