الضحك ما يعجب كان نهار السدوة

أشبيك يا مولى القلموسة علينا تديِّر

 عندك معانا ثار جاي تشير

ولا رزقك دخلناه

بلا شيرتك

والا زرعك عفسناه

بلا ترخيصك؟؟؟

على اشكون تتقيوس هيا مؤقت

أنت والحاشية والساكت والمتكلم

أنا يا صاحبي ماكم عرفتوني

من أمس موش من تو وخبرتوني

كل حاكم مهما تعلـَّى صيتَه

ناوي على تنحيتَه

مهما عظم شانه وكثّر برانيصه

واستاسعت حاشيته

ما نصبر على تعريتَه

وما نحشم إذا لزم نديرْ في شاشيتَه

أنا يا صاحبي ما اتدبر علي

وبهدرتك ما تكثر عليَّا

ولا تطوال ولا تعراض ولا تسكر عليا ثنية

هوِّين باب المحكمة قدامك

الشعب خلاهالك

إشكي وشيخ واعمل اللي في بالك

لكن تفكـّر أمس وزيد تفكـّر غدوة

الضحك ما يعجب كان نهار السدوة.