ريحة السّخَاب (9)

خدمت السباسي وحلات الأفام بالحلاوي يا هردبَّة يا نوقة يا جلجلانية...

وطلع صالح بن جامع بالآه وبعدها خرج بطالع في طبع الصيكة :

باسمُه مولانا يعلم ما بالغيب

ربي سبحانه عل خلقه رقيب

الشعر بميزانه بمعنى وترتيب

تنغموا ثلاثة من السعفه ردوا عليه يزهروا كي الصيودة، بات الحس في السُّدَّار والبيوت وشرقعت تزغريتة من حدَّادية دويرية فيقت رقود الجبانة تبعتها الزعاريت من العلي والبيوت.

وخرج الاديب من بيت الغنّايا يتدرّج خطيوة خطيوة، ببكيتة شبه ابنوس والسعفة في جرّته وتعاود الطالع وقفل صالح بن جامع المعنى في آهات في طبع الصيكة كيف ما بداه، من حينك السعفة تراجعوا لبيت الغنَّايا وخلآوه وحده في المساحة اللي تفصل ما بين صف كراسي الرجال وبيت الحفَّالات، عاود الآهة وطولها شوية لين خرجت من بيت الحفالات خادم غاطصة في كسوة سواكي ومورو ومتعصفرة بمحرمة هندية مشعشعه، و لوات الملحفة الكرية والمطروزة ولمتها في شلامة لفوق باش بانوا صفوف الحفالات البعض بالسفاسر الحرير والبعض بالخامة والبعض جابدين حفال على طرف حرير... الحاصل ما يشوفوا الحاضرين منهم كان العينين والا غنبوز بعين وحدة... ورجعت هاك الخادم للبيت وفي يدها مروحة بيد فضة ومطروزة تمروح بيها على النساء الحافلات، واللي تحق فيهم ما قال العرف محمد الصغير الساسي:

حفلت بالديبـاج *** والذهب الوهاج

مكحولة الاغناج طفلة عوجـــة

ظهرت ما بين الغوالي خوجــة

****

حفلت بالكنتــيل *** وخواتم روبــــيل

فازت فوق الجيل بجمايلـها

حتى ربي في العقل كمَّلـها.

ودخل الآديب في موقف أخضر لعمُّه صالح بن يوسف بوراس يقول فيه:

أول بدو في المربع

ومولاه في النحو ينبع

يجسس ويوزن و يطبع

يصيغ المعاني الرفيعة

تسلطن وهزوه الزغاريت وبدى ينوع في المعاني والطبوع لين خلط للمكب

هَكـّه يكون المربّع

مولاع في النحو ينبع

 وفي العلم شايد مطوع

صالح مقامه رفيعة

***

بوراس بالراس ينبع

ذكره علام ن تشيع

والآعراف تشهد وتقرع

والآعراف تعطيه البيعة

وفي البيت الآخر عطى الإشارة للسعفة باش يهزوا الطالع، هز عينيه لجهة السعفة، وفي نفس الوقت تلفت سي عبد الواحد بش يشوف خروج السعفة، يدخل سي محمود هو وهالشباب المربوع القد لابس بلوزة مشقوقة كرية بالشبابك، و محرمة مطروز صفراء على أكتافه، طلعوا الزغاريت عاملين قبب في وسط الدار، حطفوا السعفة الطالع اللي فيه عبارة: الآعراف تعطيه البيعة، تلفت سي عبد الواحد لمحمد وقاله:

-         تي هاو سي الشباب جايب هو والهادي بن سليمان

-         هاني ماشيلـُه نستفسر

-         ياخي ناوي يبيتها ليلة في الآحرش بين الغنَّايا؟

-         ما يعملهاش من راسُه لازم ثمَّه اشكون وصَّاه.

.....

يتبع