نهوجات فيهم أنتِ

في نهوجات محملة بعبق حكايات قديمة
نتخيلك عود كرم طـَيُّوري
والا فلة في بركون
ونقعد نتفكرأنت تشبه ﻵشكون
وفانا صفحة قريتك من برق الليل .

***

في نهوجات منورة بيسمينة زمنية
تعبق ربحة ذكية
بين ليمة وترنجة
ممكن في حوانت عاشور
والا في زنقة فقوسة
نعيى نلوج فيك في كتب الدوعاجي
والا في غناية متروكة
ما لحنها حد...

***

في نهوجات ضويقة وخطاوي مسروقة
فلة في برمقلي
ومقنين يبسبسلي
عينين ملاية كحل مذبالة لرماش
لوجت وما نلقاش
فانا حكاية ريتك زعمة من وقتاش
عند خرَيِّف والا قوللي عند اشكون

***

في نهوجات مضللة وخطاوي تترَشـّق
سقايفها بالابناك
وقباقب بالخانة
حب القمح يرن في خلاخل زعبانة  
الكذال الوردي شفته فامة رواية
سنابك خيل تسارعت تحت الصاباط
سفساريك ملولبك من فوق الفارة
ذكراهم منقوشة في كتيبة تنسات
الوقت هرب وفات
هز رحيله معاهم
وخيالك يا شسمك
سكن القلب وعشش...