dimanche 8 mai 2016

يا سلآك الواحلين. بيرم التونسي


بيرم التونسي اللي نعرفوه بصورة عامَّة هو بيرم متاع إبداعاته وقصائده الوجدانية هو والشيخ زكرياء أحمد والسيدة أم كلتوم، كيف الآهات والأولة في الغرام وهو صحيح وآنا في انتطارك وحلم وغيرهم. في "تغريبته" التونسية وخاصة بعد ما أسس هو ومجموعة من أصدقاؤه القراب من جماعة تحت السور، جريدة الشباب ، انسجم في الحياة الفكرية والثقافية وخاصة الاحتجاجية من خلال مقالاته وقصائده لدرجة أنه- وهذا ماهوش غريب بالمرة على عبقرية بيرم- تملك بملزومة شعبية كانت منتشرة في أوساط المهمشين اللي يغنيوا في البطاحي والساحات متاع الأسواق العمومية في الحاضرة وفي الأسواق الأسبوعية. هالملزومة المعروفة "بيا سلآك الواحلين" كانت تتغنى بنفس ترنيمة ضاعوا ليا دجاجتين بين ورتان والقوزين". كيف نقول تملك يعني استوعب الميزان متاعها ولهجتها التونسية ومعانيها الساخرة لدرجة أنها ولأت ركن خاص في جريدة الشباب وكتب فيها أكثر من ملزومة كل وجدة تهتم بموضوع حسب الأحداث والآ الحاجات اللي تطرأ في البلاد وخارج البلاد.

يا سلآك الواحلين
راني إنادي وماشي حافي *** والدربالة فوق أكتافي
ربي يعلم قلبي صافي *** ما نغدرش المخلصين
يا سلآك الواحلين
راني لإنَّادي ونرُدْ آنا *** ويجي واحد من الخوَّانه
يمشي يعمل لي سكـَّانَه *** ويكلـّخْ في الدَّواوين
يا سلآك الواحلين
راني إنَّادي وكفي بجنبي *** ويجري لساني باللي فْـقلبي
ما نخضع كان برك لربي *** اللي خلنا أجمعين
يا سلآك الواحلين
قول لي ساعة آشكون متهنِّي *** إن كان إنسي والآ جنِّي
هاك الدنيا واخذها منِّي *** ما تسواش صوردين
يا سلآك الواحلين
قالو الليرة ولـّت غاليه *** قلت الدنيا ولـّت غاليه
وكيف تغلى وجيوبنا خاليه *** الهَـمْ يولليِ همِّين
يا سلآك الواحلين
هاك الفرنك يمرمد فينا *** إذا طاح يطيح علينا
الجّربي يخبِّي في الفارينه *** ويبيعها بسوم الهيروين
يا سلآك الواحلين
والسّكر في شكاره يسِدُّه *** والفلفل بالكعبه يعِدُّه
والتابل في حُكـَّه يرذُه *** كيف الجوهر يا فطين
يا سلآك الواحلين
العيَّــــاشه والخدَّامــــه *** والسّوَّاقه والرمرامه
من هاك الحالة المسمامـَه *** فدُّوا وهـــــاهـــم مُضربين
يا سلآك الواحلين 
كثُرِ مغناي يعطيله كسرَه *** لإضرابُه سبَّب لي مضرَّه
صبَّاطـي من المشي إتهرَّى *** وركابي متخلعين
يا سلآك الواحلين
الشركة ياسر طمَّـاعَه *** تربح والخذَامة جواعـَه
والخدمَه سطـَّاش ان ساعَه *** يقطعوها محبوسين
يا سلآك الواحلين
من هاك الحاله المنحوسه *** عجوزة كيف أمّك نفوسَه
ولـّت تركب في الكرُّوسه *** كيف خليفة تاجروين 
يا سلآك الواحلين

Aucun commentaire: