عندي اصحاب كي الناس الكل

عندي اصحاب كي الناس الكل،
صحاب قعدة و اصحاب خدمة،
اصحاب حومة و اصحاب مصيد،
اصحاب عشرة و اصحاب اللي ياخذو بقعة الخو،
اللي يفكو من الغلبة و اللي عندكش عندي،
اللي من غادي لغادي و اللي من العام للعام،
و اللي من العيد للعيد و اللي من دفن لفرق،
و اللي من خلاعة لخلاعة و اللي من البوف سور لو توا للبلاتزا،
و اللي من افتتاح قرطاج للختتام الج س س،
و اللي من فرنيساج لفرنيساج و اللي من رموقة لرموقة،
عندي اصحاب كي الناس الكل.
اللي ما نبيع فيهم و ما نشري
و اللي في قضيته يجيني بكري
و اللي بعضمته يقاقي يجري
و اللي كي يتفكرني من نص الليل يبات يسري
و اللي ما نخطر على باله كان كي يسمع بي ماشي للعكري،
و اللي يقولي ما نسيتكش يما البورطابل تسرق،
و النومرو متاعي من ذهنه زلق،
و الكمبيوتر بالمايل متاعي تبلنتا حتى لبن تفلق.
عندي اصحاب كي الناس الكل،
نملى بيهم يدي،
و وقت ما ينشدوني تعرف، نقول هذاكة ندي،
و اللي بيهم نوللي جدي،
و كيف واحد يقوللي تعرفش حد في ال....
قبل ما يكمل نقلو عندي.
محل الشاهد جبناه تقديم لمسدس العربي النجَّار على الصحبة و الصَّاحب، كليمة صغيرة عالعربي النجار هو واحد من الأربعة الكبار في مدونة الشعر الشعبي التونسي: أحمد بن موسى و احمد ملاك و احمد البرغوثي و هو رابعهم أصله من العالية عاش في نهاية القرن 19 و بداية القرن 20 يتسمى من شعراء و غناية الحيطي (الحضري) و هو آخر الشعراء اللي كان بنظم في المحجوز. نظم في كل الأغراض و غرامه كان في الأخضر يحب يقول الغزل. اتغرم بيه واحد مالطي يقولولو طونين البرجي كان النهار الكل شادد جنبه ياخذ عليه في الصنعة ياما بثنيان الركبة موش بالغدرة.
و اللي يطالعو مجلة إيبلا يلقاولو مقالات على الشعر و الغناء و على أصوات البياعة في تونس يكتب باسم ،
Antonnin Borg
و هاذا طونين مشى بيه الغرام متاع الغناء لدرجة انه ولى ينظم في الملحون التونسي انشاالله نهار نقدملكم شي من غناه.

ميزان مسدس
الصاحب اللي حسبته عڤيدة***نصبلي مكيـــــــدة
خذاني على غدر و نسى الوديدة.
*******
الصاحب اللي حسبته صميلة***نصب لي الحيلــــــة
خذاني على غدر و ركض خيله***حرڤني كما حرق راس الفتيلة
ناره شعيلـــــــــة***و النار ما صبتلوشي ضميدة
*******
الصاحب اللي حسبته عشيري*** حرق لي ضميـــــري
غدرني و ما حاكشي فيه خيري***بعد اللي كان هو خبيري
خبّل حريــــــــــري***و خسرت في خلطه اللي زهيدة
********
الصاحب اللي ظهرلي بذاخُه***نصب لي فخاخـُــــه
إدوان و غدر تبَيِــن فساخُه***خوّان في العهد لفكار داخُو
كثـّــر صراخـُـــو***غدر بي عمل لي ڤعيدة
*******
الصاحب اللي مخير ادراكه***نصب لي شراكــــه
خذاني على غدر بين افتاكه***بلا عيب يا ناس تبيّن هلاكه
نافخ احناكـــــــــه***بتحكك على النار اللي صهيدة
*******
الصاحب اللي حسبنه معبّر***علي يدبّــــــــر
خذاني بالغدر و بالسر خبّر***ڤعّــِد زنادة لسيفي مشبّر
هلّـل و كبّـــــــر***جات ضربتُه من ڤدايا بعيدة