عجوز أمازيغية تعترض القبائل الهلالية عند دخولها إفريقيا:
جايين طالبين صحبة و الا ناوين زغبة
الخفاجي عامر مخاطبا العلام: اسمعوا هاذم هلالية و انا عشيرللهم كان هم تفلوا فيكم القدّام راكم تلقوني وراكم نقتل منكم من حضرت ساعته، و كان هم بعايرهم تفرتت و زاغت أني تلقوني قرنتها، و كان وجب عليهم يدفعو جزية و الا مهر أني ندّي الشطر.
العجوز: قولولي يا جماعة ناوين موطنين و الا في طريق السلامة متعديين؟
كانكم متعديين تلقو الخير بعد المهلة اللي يعطيها لكم سلطان تونس.
و كانكم موطنين أحنا ما عندنا ما نقولو تبقى قولولي:
• إذا البرق شير و الرعد رزم و خريف الامة بدّر اتبعوش المحراث و تحبلوش الأرض طامعين في الصابة و تقصدوش واسع خيره؟
• تقطعوش الدقلة و العماري و تفرقوش بين الماقولي و الزيدي و تجمعوش الشملالي و الزرّازي قبل تم الليالي؟
• نبوني يا اولاد هلال على ربيعكم حل و ترحال و الا ذكّار و لقمان و ترفاس بيه البيوت امالي و عشب و خرطان للدابة منين في أوسّو ابن آدم للظل جالي؟
• البيثر تاكلوه و الا تشرّحوه و مشارحكم في أربعين من الصيف اثنين و زيدها عشرين يشبعش منها كل مسكين؟
• تعرفوش تملسو البرم على داير الأيام و ترقمو بخانيق بعد زز عرسه بالطبالي؟
• قولولي تطرزوش الفيلالي و تملخوا البلغ بقدة و مقراض
تعرفوش تبشمرو البرانص و الحوالي
تقدوش تقزدرو النحاس و القصاع و الطواجين؟
• و تنقشوش حجر و تضفروش عدايل و شوامي للعصران ضفر البنات للحرير جدايل
تملسوش طين أيام حسوم نكيدة
تبنوش أسوار و غرف و ديار و قصور عمار سيسانها غارقين؟
• تعرفوش تصبغو الفماشات و تقطرو العطورات في الوقت موش بعد لا فات؟
• تعرفو تعمرو سواني و تجمعو غلات؟
يا أولاد هلال غير الخبر هات، تصفحوا سنابك خيل و تصنعو المناجل و المسح و السيوف المهندات و تنجروش خشب و ترصعوش الذهب بالدر و المرجان و تشببوش الفضة الي بيها العذارى تزداد زينات؟
• تعرفوش كل هذا و الا فالحين كان في هانا جينا و هانا مشينا نهار و ما طوله و انتم تفسحلو هاو منا هاو منا يا زرع معفس يا زيتون مهنتش و يا هوش مطرطش..... أيـــــّه ترى.
بوزيد: احنا عرب ابادي للنا العز، و أسعاي و إبل تهز و و مراحيل بالخيل اتدز...
العجوز مقاطعة: حيها حا و عليكم هذا الكل خرّاف ضايع قال نركبو الخيل حتى احنا نركبو الخيل و نلهدو. تقولو تربو البل و الحيوان و تولدو و تحلبو وتمخضو و نززو الصوف و الوبر و الشعر و تنصبو بيوت و عشش حتى هذا احنا عندنا يا ما الدنيا ماهيش مخلطة أهل الأسعاي و البل في الرمل و اهل الغرس و الزرع في السقي و البحاير، و اهل الصنايع في حوانيتهم و اهل الكتايب في زويهم و اهل البيع و الشراء في مخازنهم و الا يكهبو على قوافلهم ، ياما هذا هوش مسيب على الأغراس و السواني هذا موش راي . أيو لمو ارواحكم و حزو سعيكم و ابعثوا من يعزب بإبلكم. الذيب ما يتربى في زريبة النعاج..
2 commentaires:
شكرا سي علي ، امتعتنا و اعدتنا لزمن الشعر و الفكر ، و إن بالفخر و الهجاء
ع. ن.
مرحبا بك ع.ن، لفد خامرتني بعض الشكوك غير أن أحوال المدونة التونسية لم تكن ل لتعطيني من الآمال ما يكفي للعثور على أثرك بعد هذا لغياب.
Enregistrer un commentaire