من يبغي وطـْنَه
يُصْبُرْ عَلْ الآدراك
ويلوي عَلْ بطنَه
***
هكة غنُّو جدودنا
والوقت صعيب
بين جور البايات ومعصار المستعمر
هاك الوقت مشى راح اتعدى وفات
نسانا ونسيناه
.. وتوة يلزم ننسى ... إنسى
قالك ...
ههههه
من يبغي وطنه ،
ههههه
زعمة يجد عليك
مازال اشكون يلوي عل بطنه
إنسى إنسى
ما ريت اليوم كان اللي يعبي في بطنه
لُوفَّام المحلولة ووجوه الممدودة
وحسابات الشيخ والشابة الخندودة
عينيهم تتغامز وشفايفهم تتهامس
ثمة حنك معاك ،
ثمة شوية لية ،
ثمة فَكرة ذايبة مع سلتة قروية
كرارز وكرعين كوارع ومسالين
قالك ....
يلوي عل بطنة
ههههه
جد عليك كلامهم العيشة خبز وماء نعرفش اشتوة
و نصبر عل الآدراك
ههههه
ما نصبر عل الآدراك ولا نلوُا عل البطن
الثنايا نقصوها والسكة نفكوها
ومن بعد يجرى اللي يجرى
واللي ما عجبوش...
ههههه
دار الخلاء من قبل معروف....
صابتها لفت وحليب الدجاجة
واللي عنده عشق للوطن
يفسي على البحر يخليه
يثوّر فيه العجاجة
Aucun commentaire:
Enregistrer un commentaire