منامة عتارس

الانتخابات كملت والبلاد مستبشرة بمجلس جديد، وحكومة جديدة.

الخريف في الايادي قبل ما تزدم علينا غسَّالات النوادر، و الصيف ما زال عامل فيها مولى الدار موش هوني يبيع و يشري و عامل دار مقام. السحاباب متعدة حيادي كايني ما ثمة حد يستنى فيها. عشية سبت الشمس معلقة مايلة للتماسي، عاطية بين بين الصفورة و الحمورة عروض نوبة رمل المايه. الأسواق نص هافتة . في سوق النحاس ما تسمع كان تنقير المطارق و التكماك على ورق النحاس اللي يتفصّل طناجر و كراون. الصناع تحك في دوزان النحاس القديم في اليلاق باش يتعدَّى للتقزدير،نهج زرقون باش يتفلق بالمكتبات، من سوق القرانة للدباغين و الحوانت مستفة بالكتب القديمة و النادرة الثمينة. شبيبة و شياب يتدازو على النصب، اللي يلوج على مرجع أساسي و اللي يفركس على نسخة قليل وجودها. هاذي حانوت عاملة بيعة بالدلالة لورثة واحد من المشايخ، يا مجلدات يا مخطوطات، السوق حامي ما بين القشارة و الوكالة. من بعض الحوانت الاخرين، موزيكة رايضة طالعة، موشحات أندلسية و شرقية و تركية، صليحة و عبد الكريم الرايس، سيد درويش و عمار الماجوري، موزار و رمسكي كورساكوف، ستوكهاوزن و ميكيس تيودوراكيس، ميطال و هارد روك.... سيديات من يد ليد و سماعات عل الوذنين. نهج البراملية احتلوه الشبيبة متاع الكمبيوتر و الانترنات حوانت تقلها زع ترحل ملغمة بالحواسب و اللي هاذا مكونكتي على مواقع الدنيا الكل من الدايلي موشيون لمواقع الأخبار المتنوعة، الكونيكسيون طايرة طيران.
المكتبة العمومية متاع نهج زارقون عاملة "كومبليت" و معهد الموسيقى يغلي بالتلامذة اللي جايين يحبو يترسمو للعام الجديد. اللي هاذا واش طالب.... صغار نافحة و الا كبار خايفين من الترك.
باب بحر حافل شبيبة عويزبات و صبايا اليد في اليد العينين مليانة بالحنان، عايلات أصغارهم قدامهم ينقزو كي العصيفرات، شجر الفيكوس ناشر ضله على الدنيا و ماليها بالبرود كماين البلدية ماشية جاية نتضف في الكياس و المادات بالماء المعطر و تبرد فيها من وهج القايلة. الخلاعة وفات، و رجعت الناس لاشغالها، ياما نهار الراحة و زيده السخانة خلّى العباد ترجع للجبايب القمراية و السراول و الشورطوات الخفاف و السوارة نص يد روب منورة زاهية دجينات ما نقلكش، زنود عراية و مرايات عل العينين، الياسمين و الفل مشامم و خجالي و شرك تعبق و تزيد القلب زهو و نشوة.
القهاوي و البارات زارعة كراسيها على برة، فوق المادات الباراصولات مضللين على الطواول اللي جات تحت الشمس. محابس نوار و حبق تفصل ما بين الطاولة و الطاولة، قراصن بنات و أولاد و جوههم نضيفة و محجمة شلاغمهم محسورة فيستات بيض و سراول كحل حديدهم واقف في الرقبة كرافات و الا بابيون، ماشيين جايين ركيض بطبقاتهم و طلبات الحرفاء: قهاوي و ليموناضة و بولو و اصحنة كمية تريلية و ببوش بحر كيسان بيرة و باستيس و روزي عرقانة و ويتيامات بوخة راقدة.
واجهات المكاتب عارضة آخر ما تنشر في الشعر و القصة و العلوم و الدراسات و الفلسفة و القانون...موسم الأدب و الكتابات الروائية و خاصة الفائزة بالجوائز المعتبرة كلها شادة الصدارة متاع الواجهات و محزمة بالشريط الذهبي اللي يميزها على غيرها من المنشورات الأخرى. الكتب بالحملة و الناس داخلة خارجة.
• ديوان الصغير أولاد أحمد الجديد تطبع منه خمسين ألف نسخة تخطفو في جمعة.
• أعمال منور صمادح الكاملة تتباع مرشي نوار.
• مسرح توفيق الجبالي نفذ من المكتبات.
• أنطولوجية الشعر الشعبي التونسي جبدو منه الطبعة الثالثة.
• المجموعة القصصية الكاملة لعزالدين المدني خارجة كي البشكوطو.
الشي شادد بعضه المطابع غاصة، و المكتبات راصة بالعمل ابن خلدون قريب يهبط من الحجرة متاعه ويشد يزاحم مع المتزاحمين في المكتبات اللي ركبتهم سخانة القراية و المطالعة.
لداخل في القهاوي و البارات المكيفات مبردة الدنيا، الكنطوارات تلمع بالنضافة و و ليدات وراهم يفهمو على الرمش حاركين ما بين الحرفاء و الصنـّاع.
قاعات معارض الرسم داخلة بقوة، ما بين معارض الرسامين الصغار من الجيل الجديد و اصحات اللوحات الخاصة من المعلمية القدم. المزاحمة عاطية مسد، هذا معرض متاع جماعة مدرسة تونس في شارع قرطاج، و هذا معرض تذكاري لفابيو روكيجياني و جوزات قرمادي و أعمال نجا المهداوي متع الستينات. هذا معرض للرسامين العصاميين في المدينة و هذا معرض للامين ساسي في القرجاني و وحد أخر للحبيب بوعبانة في الزاوية البكرية.... الحاصل النار شاعلة ما بين القاعات الخاصة بين بعضها و القاعات متاع الوزارة و من شيرة أخرى هاذم النقاد يطلعوا في الدلالة و هاذم الشراي يكسرو في بعضهم تكسير يحشم، و زيد الطلب متاع الجمهور و الذواقة اللي فات كل التوقعات خلاو المعارض يزيدو يطولو في مدة عرضهم.
نوادي السينما دخلت بقوة عندها قريب الشهرين مخرجة برامجها و أنشطتها بالتفصيل 75 نادي تنشط في ولايات تونس الكبرى النسخ متوفرة و معدات البث من الدرجة الممتازة و ظروف العرض على أحسن ما يرام الكلها دولبي ستيريو.كل ما تصور في السينما التونسية من الاشرطة القصيرة و الوثائقية و الطويلة مبرمجة للثلاثة شهر الأولى. الحملة اللي قايمين بيها بالخصوص المدونين جابت نتيجة جبارة و كبر عدد المنخرطين في النوادي لين ولى يفوق الميات الف. البقايع تحجزت على بكري الكل على طريق شبكة الانترنات و زايد الواحد جاي يتفافى باش يلقى تسكرة ليلة صلى الله.
و هذي شوية من البرمجة المنتظرة للأسابيع الجاية ما نجموش نعطيكم التفاصيل الكل في القريب العاجل نمدوكم بالروابط باش تتعرفو على الأشياء بالتفصيل.
• المسرح البلدي: الأعمال المسرحية الكاملة اللي قام بيها علي بن عياد تتقدم على طول الموسم و ياقع الاختتام بعمل ابداعي تكريم لروح القنان من أنتاج تلاميذ مدرسة الفرقة.
• في قاعة الحمراء المسرح محجوز لمسرحية من أعمال عزالدين قنون على طول العام بالتناوب مع عروض للجاز من الفرق الأمريكية بأطلانطا و نيو اورليانز.
• في فضاء التياترو عمل مسرحي جديد لتوفيق الجبالي و في مربع الفنون جولة مع باليات الرقص المتوسطي
• في قصر المؤتمرات : لمدة شهرين بن هاربر مع مجموعة أولاد السطا جمعة و قوقو ميدون.
• في قصر المعارض. لمدة ثلاثة شهر: البالي الوطني السينيغالي و مجموعة البنقة من نفطة.
• دار الأصرم و العاشورية و و بير الأحجار انتاج مشترك ما بين الفلامنكوو الإنشاد الأندلسي و العود و مهاوي الركروكي و القيثارة لمدة شهرين.
• قصر القبة بالمنزه:التخت البغدادي و أعمال منير و جميل بشير مدة شهرين.
• دار الثقافة بالتضامن و دوار هيشر: الأركاستر السمفوني التونسي مدة شهرين.
• المولاوية التركية في صحن تربة البايات الحسينيين.
• فرجة أصوات و أضواء حول تاريخ تونس في برج علي رايس و برج زوارة و برج الرابطة.فرجة متواصلة على كول العام.
• مستودع فرحات حشاد للسكك الحديدية: المجموعات الموسيقية الشابة للراب و الهرد روك و الميطال و الرقي عروض متواصلة على طول العام.
• بورصة الشغل: الأغنية العربية الملتزمة من مصر و سوريا و العراق و لبنان و تونس و ليبيا و المغرب و موريتانيا وقطر ة اليمن و السعودية بمشاركة الهادي قلة و مرسال خليفة و آمال الحمروني.
• قراءات في الشعر و القصة بصوت طلبة المعهد العالي للفنون الدرامية في متحف باردو و متحف السراجين و دار الفنون و الصنايع بالعطارين.
• مسرح دار بن عبدالله: إنتاج مسرحي جديد من إبداع نور الدين الورغي.
صالونات الشاي متع نهج ابن خلدون و نهج يوغسلافيا تملا و تفرغ في الحرفاء و العايلات داخلين خارجين للسنما و المسرح.
مع طياح الليل تضوى المدينة و تشعل الفيترينات و الممشى متاع شارع بورقيبة كاينه نهار جنينه على حاله. النواورية عل ايمين و اليسار: العباد كوبلوات و الا جماعات يحلى لهم البرود و النسمة البحرية و البرتوف يزهى، يسيبو ارواحهم للسهرية ما يردهم كان الصرد اللي ينزل في عقاب الليل و وجوه الصباح. و يتخلط تصبح على خير و صباح الخير متاع خدامة البلدية اللي يصبحو يغسلو في شوارع المدينة باش من غدوة تلبس كسوة جديدية.
أي تعياو وانتوما تقبضو....أية تصبحو على خير.....