يبقالي منك أحلى ما ثمَّة

ما يفكو منك يا ترابي

يا نسمة ملات جواجية

و قطرة ماء روات ضمايا

تبقالي منك غنـَّاية

خلالة رنت

ودمعة حنَّت

مِرْوِد وعبانة وسدَّايا

عرس غنم وربيع قدالي

نجع وكوت وبرق يشالي

***

ما يفكـُّو منك يا هذبة

يا مهوى رنّتْ في خيالي

يا قرة ينَّار العاتي

ريح شلوق وموش مواتي....

تبقالي منك تنهيدة

برور بعيدة

وايام حسوم تكيد نكيدة

تطوال المدة وترجعلي

ريم الفالي

بحرك مالي

ملازيم ومواقف هرقالي

***

ما يفـُكو منك يا البيَّة

يا سرول في جنان الباشا

سخابك بروايح يتغاشى

حبي عمرو ما يتلاشى

لسود انعاتة

وحوليك العكري حرير تحاشى

حزامك والحلقة واتاتة

يبقى لي منك يا أم

برق لعج

ورعد رزم

وواد حمل

برغاوي وسيول تعم

وغزال قفز

وقت اللي الصياد زرم

***

ما يفكـُّو منك يا كبيرة

يبقالي منك تصويرة

امطار غزيرة

نجوع بلادي

يوم العِز

ولادي تنادي

يكُحْ الصَّادي

وخيل وفرسان اتدز

وبل اتواطي وتهز

جحاف تميل

رجال تحز

عمرها ما ترضى بالذل