آنا نقول له ثور وهو يقول ثورة ونحلبوها

آنا نقولو البلاد في حاجة باش تخدم ولادها وتوكلهم، وهو يقوللي أشبيكم ماكمش على وضوء....
آنا نقولو راهي منظومة التنمية اللي تبعناها من أصلها خاربة ، آش ناوين تعملو ؟ وهو يقوللي هاك سكران...
آنا نقولو ربع أولادنا حارقين وربع عاطلين وربع بعد ما كملو قراو في بلاد الكفرة استقرو وما ثماش علاش راجعين، وهو يقولي موتو بغيضكم....فهمتش حاجة؟
آنا نقولو اللي استفادو من الزبونية توة 50 سنة ما زالو معششين، والفساد والفُسَّاد علينا راكبين وهو يقولي خيبر خيبر يا يهود جيش محمد سيعود
آنا نقولو صناعتنا كيفها كيف بلاش، وقريب نبيعوها خردة ما تسواش، وهو يقولي القراية في الجامعة بالنقاب والا ما ثماش...
آنا نقولو إذا كان ناويين تخليو انخرام التوازنات كيف ما هي، وحاشيتكم تعوض الطرابلسية، فاش قام عملنا هالفاتارية، وهو يقولي إشارات ربَّانية
آنا نقولو قريب شطر الميزانية متسلفين والبلاد باش تغرق في الدين وهو يقولي لاسبيل إليه فصل الدولة عن الدين
آنا نقولو يلزم نصلحو المنظومة التعليمية باش ما عادش تعطي بشهايد ما تهز لحتى ثنية، وهو يقولي يلزم نبدلو النشيد الرسمي غدوة العشية
آنا نقولو المعيشة شعلوها التجار وقفة الزوالي ولات نار ومسمار وهو يقولي يا علمانية يا كفَّار
آنا نقولو أهلنا في فريقا بعد الثلج الماء عليهم عَمْ، واهل الحواضر غرقو في الوسوخات والغرم، وهو يقولي سي ديجا بدَّلنا العلم
آنا نقولو مسران البلاد يدلدل وهو يقولي هاو جبنالها وجدي غنيم هو طهار لا محالة يطهرها ويقصلها المصران فرد مرة
آنا نقولو رانا غرقنا في الخرى وهو يقولي المشكلة أنو ماهوش باش يكفي الناس الكل...
آنا نقولو سواعد يهتز فوقها العلم نباهي بيه ويباهي بنا، وهو يقولي يا جماعة صفر فاصل موتو بغيضكم