بلاد وكانت

بلاد وكانت
اليوم اشيانت
والا من الاول مسخوطة
في جرتها بعض دعاوي
يخلـّصها الطالح والصالح
بلا تمييز بلا فرزان
مكسي مع حافي وعريان؟

***

بلاد مصايب

بلاد عجايب

الباهي فيها يوللي خايب

الغورة صارت دين الغالب

مسكين ال’ ما عنده والي

قعد لتالي

يهز علم بلاده هارب

ويكتب فوقه "ألله غالب"

***

بلاد كرز

البوهالي يقعد للدّز

في حياتُه ما يشوفش عز

يطيح ويتكربص ماللَّز

ديمة ينين اجراحه تنز

حياة خزز

في المرج وفي الهول يعاني

ويحمد في ربي عيناني

***

بلاد عجيبه

كل صباح تشوف غريبة

نهار قالوا شدوا توعيبة

حلـّولـُه النقبة من تالي

واللي بسلاحُه وتهريبَه

يُعبُرْ ويجلجل متعالي

حوّس افهم يالتصغالي

آش جاب الحجلة للتبِّيب !!!

***

بلاد الليعة

بلاد وجيعة

بلاد اتْخَلـّفـْلك تقطيعة

ما تنجم تحلم في حياتك

تعمل فيها حاجة بديعة

ما ثمة كان الكابوس

يدمّر ايامك بالغُمَّه

شيء ما فمّه

لهفة وحِمّه

تسكر تعمى تشم تدهدص

ريح شراعك بالمعكوس

لا تهنى وتنعم ساعة

لا بحُب ولا بعشق ولا فلوس