يجيني ملك الموت
يسفرلي بالروح
ينهي تعاب حياتي
و ترفعني الأملاك
من بَرْ الهندوس
و تبعثني لدنيا جديدة
في فيافي التادجيك
و الا حذا طشقند
ممكن غادي بعيد
في دشرة منسية
بين جبال الثلج
يتبينلي خيالك نهار ف ضيق عشية
ترجعلي مهاوي قديمة
من صوت الطرخاني
مولاها شيباني عمره فوق المية
ردة بولحناش و الا بحيرة ماجنة
هز الصوت و شرقع:
"وحش السرا و بروده
يا ولفتي
وحش السرا و بروده
وحش السرا و بروده
يا من عزم شرّف على قمودةّ"
نستنى ملقاك
كي تعلـّم لافجار
و تزرق شمس بوَمْيَة
و تغرّب في ساعتها
نصبر نستناك
انقي تراب الأرض بالحبّة بالحبّة
و نربعها بستان خيلي حجر الواد
نوار خدود العكري
و شقائق نعمان
لين يتم رجوعك
يَفـَتـَّحْـلك يزيان
و تكوني الشمس الدّافية
لبياع النوار....
وتكوني بشرى وفال
لنسمات الحرية
Aucun commentaire:
Enregistrer un commentaire