صباح الخير يا أحلى وطن: ساعات نهارات من شعر الهادي قلة

من كلمات و ألحان الهادي قلة: "غناية ليها" من أروع الأغاني الوجدانية للهادي

ساعات..

نهارات..

تبرد فيها الشمس

في عز عمر الصيف

يغيب خيال الخلاعيّة

يولّي طيف..

شطوطها تدوان

الموج فيها يهرّب

تكفر منها الروح

في الجسم و تتغرّب..

ساعات..

نهارات..

السما و الما و ضوّ النهار

الكلام السّلام

الهوى و النوّار

الباطل..الصواب

و عيون الأحباب..ضباب..

شمعة طافية..

غناية بلا قافية..

ساعات..

نهارات..

تخلى المدينة بألوانها بديارها

تصمّ و تبكم بكبارها و صغارها

بردها و دمّارها

يوحّش أنوارها

بعسسها و كباراتها

بحسّها و عياطها

دمّها..دموعها..

بعروقها و سكاتها

بجناينها وشوكها

تفرّغ حكاياتها..

ساعتها..

نهارتها..

الغربة..و نسيان الأحباب..

الوحشة و الكساد

مع الضباب توخّر

و كل ثنيّة تعمر..

و تفيق الديار..

الشارع يذرّي الكمون عالصغار

من همسه..

من لمسه..

من تحريكة خمسه

الورد يفتّح و يفوح

بخيال الغايبه..

خيال الحاضره..

الغايبه..الحاضره

الحاضره..الغايبه

خيال أخت الروح